Arabie Saoudite: Abayobozi bitabiriye inama basabye Loni guhagarika intambara

  • Imvaho Nshya
  • Ugushyingo 11, 2023
  • Hashize amezi 7
Image

Mu nama yabereye i Riyadh mu murwa mukuru wa Arabiya Saoudite, kuri uyu wa 10 Ugushyingo 2023, Abayobozi b’abarabu b’abayisilamu banze icyifuzo cya Isiraheli cyo ‘kwirwanaho’ muri Gaza, kandi basaba ko ibikorwa bya gisirikare byibasira umutwe w’iterabwoba wa Hamas birengeje ukwezi byahagarara.

Itangazo rya nyuma ry’inama yabereye mu murwa mukuru wa Arabie Saoudite, ryerekana ko abayitabiriye batabona ko iyi ntambara ari ukwirwanaho cyangwa kuyisobanura, nta mpamvu iyo ari yo yose.

Abayobozi basaba ko Akanama k’Umuryango w’Abibumbye gashinzwe umutekano ku Isi kafata “icyemezo gifatika kandi kigomba kubahirizwa” kugira ngo Isiraheli ye gukomeza kugaba ibitero muri Gaza.

Itangazo rya nyuma risobanura ko “kutabikora ari ubufatanyacyaha butuma Isiraheli ikomeza igitero cy’ubugome cyica inzirakarengane (…) kandi gihindura Gaza amatongo”.

Abayobozi kandi banze icyifuzo icyo ari cyo cyose cyo gutandukanya Gaza na Cisjordanie mu gihugu cya Palesitine. Iri tangazo ryerekana akamaro ko “ubumwe bwa Gaza na Cisjordanie nk’ubutaka bw’igihugu cya Palesitine,” na Yeruzalemu y’Iburasirazuba nk’umurwa mukuru wacyo.

Ni mu gihe kandi kuri uyu wa Gatandatu imirwano ikaze yakomeje hafi y’ibitaro bya Gaza, kubera intambara yatangijwe na Hamas kuri Isiraheli ku ya 7 Ukwakira 2023, ubu ikaba itangiye icyumweru cya 6.

Abantu 300.000 bari mu mihanda ya Londres, nk’uko bitangazwa na Polisi, kuri uyu wa Gatandatu mu rugendo rushyigikiye Palesitine rukurikiranwa n’abapolisi benshi mu mpera z’iki cyumweru yo kwibuka Intambara ya mbere y’Isi. Indi myigaragambyo nayo yakozwe kuri uyu wa Gatandatu i Paris, Bruxelles.

Imirwano ikaze hagati y’ingabo za Isiraheli n’abarwanyi ba Hamas yakomeje ijoro ryose ry’uyu wa Gatanu kugeza kuri uyu wa Gatandatu hafi y’ibitaro bya al-Shifa, binini cyane mu karere ka Gaza. Umuyobozi w’ibitaro, Mohammed Abou Salmiya, yatangaje kuri uyu wa Gatandatu mu gitondo ko “al-Shifa ijoro ryose yibasiwe n’ibitero by’umuriro wa rutura”.

Umuryango w’Abarabu n’Umuryango w’ubufatanye bwa Kisilamu (OIC) bakoranye inama ihuriweho kuri uyu wa Gatandatu muri Arabiya Sawudite igomba gushimangira ko byihutirwa guhagarika ibitero bya Isiraheli kuri Gaza mbere y’uko amakimbirane akwira mu karere.

Kuri uyu wa Gatandatu kandi ingabo za Isiraheli zatangaje ko abantu bagera ku 200.000 berekeje mu majyepfo mu minsi itatu ishize, bava mu majyaruguru y’akarere ka Gaza, aho imirwano yo kurwanya Hamas yakajije umurego.

Perezida w’u Bufaransa, Emmanuel Macron arasaba Isiraheli guhagarika ibisasu bihitana abasivili muri Gaza. Ku wa Gatanu mu kiganiro na BBC yagize ati: “Dusangiye akababaro ka [Isiraheli],, ariko, uyu munsi, abaturage batewe ibisasu ari abana, abagore, abasaza batewe ibisasu birabica”.

Minisiteri y’ubuzima ya Palesitine yatangaje ko ku wa Gatanu umubare w’abantu bapfuye bazize ibisasu bya Isiraheli mu karere ka Gaza wageze ku bantu 11.078 kuva intambara yatangira ku ya 7 Ukwakira, barimo abana 4.506.

Kuva kuri iyo tariki, Abisiraheli barenga 1.200 barishwe, ingabo za Isiraheli zivuga ko abantu 239 bafashwe bugwate na Hamas.

NYIRANEZA JUDITH

  • Imvaho Nshya
  • Ugushyingo 11, 2023
  • Hashize amezi 7
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE