APR FC yatsinze Police FC ishimangira umwanya wa mbere

APR FC yatsinze Police FC igitego 1-0 mu mukino w’umunsi wa 17 wa shampiyona, ishimangira umwanya wa mbere ku urutonde rw’agateganyo rwa shampiyona.

Uyu mukino wabaye kuri iki Cyumweru tariki 21 Mutarama 2024, kuri Kigali Pele Stadium.

Umukino watangiye wihuta ku mpande zombie, umupira uva ku izamu ujya ku rindi.

Ku munota 14, APR FC yabonye uburyo bwo bw’igitego ku mupira Omborenga Fitina yahinduye imbere y’izamu rya Police FC ukurwaho na Onesime akoresheje ibipfunsi.

Police FC na yo yabonye uburyo bwo gutsinda igitego ku mupira mwiza Rutonesha yahaye Bigirimana Abedi uwukinishije umutwe, Umunyezamu Ndzila araryama awukuramo.

Ku munota wa 20′ APR FC yongeye kubona uburyo bw’igitego ku mupira Kwitonda Alain Bacca yinjiranye mu rubuga rw’amahina awuhinduye, usanga Ruboneka Bosco uwufungisha agatuza, ateye ishoti ukurwaho na Kwitonda Ally.

Ku munota wa 36 ‘APR FC yahushije uburyo bwiza bw’igitego ku mupira Kwitonda Bacca yahinduye mu rubuga rw’amahina, Niyomugabo Claude awukinishije umutwe umanukira ku kirenge cya Ruboneka, uhita ufatwa n’Umunyezamu Rukundo Onesime wa Police FC.

Nyuma y’imyaka 2 gusa Police FC yabonye Coup-Franc nziza ku mupira Muhadjiri yari yahaye Savio, agushwa inyuma gato y’urubuga rw’amahina na Ishimwe Christian.

Hakizimana Muhadjiri yahannye iri kosa, umupira ujya hejuru y’izamu.

Iminota 45 ibanza y’umukino yarangiye amakipe yombi anganya ubusa ku busa.

Mu gice cya kabiri, APR FC yatangiranye impinduka Mugisha Gilbert asimbura Niyibizi Ramadhan.

Ku munota wa 52, APR FC yabonye uburyo bw’igitego aho  Kwitonda Alain Bacca yacenze abakinnyi babiri ba Police FC, ateye ishoti nyuma y’urubuga rw’amahina, umupira ujya ku ruhande rw’izamu.

Ku munota wa 62′ Bacca yahinduye umupira mwiza usanga Shaiboub mu rubuga rw’amahina, ashyizeho umutwe, Onesime ashyira umupira muri koruneri.

Ku munota wa 65′ APR FC yabonye igitego cya mbere cyatsinzwe na Ruboneka Jean Bosco ku mupira yahawe mu rubuga rw’amahina na Omborenga Fitina akinishije imoso.

Iminota icumi ya nyuma y’umukino mbere y’uko bongeraho iminota y’inyongera, yihariwe na Police FC yashakaga igitego cyo kwishyura.

Ku munota wa 88 Police FC yabonye uburyo bw’igitego ku mupira mwiza wahawe Hakizimana Muhadjiri uvuye muri koruneri, arawukaraga ku bw’amahirwe ye make ujya ku ruhande rw’izamu.

Mbere y’uko umukino urangira ku munota 90+4′  Police FC yongeye kubona amahirwe ku mupira Hakizimana Muhadjiri yateye uteretse, ushyirwa muri koruneri na Ndzila Pavelh.

Uyu mukinnyi wa Police FC yongeye gusubiza mu izamu, uyu munyezamu w’Umunyekongo afata neza umupira.

Umukino warangiye APR FC itsinze Police FC igitego 1-0, ishimangira umwanya wa mbere muri shampiyona.

APR FC yahise igira amanota 36 n’umukino w’ikirarane w’umunsi wa 16 na Marines FC.

Police FC yafashe umwanya wa gatatu n’amanota 31.

Uko indi mikino y’umunsi wa 17 wa shampiyona yagenze

Rayon Sports 1-0 Gorilla FC

AS Kigali 1-0 Kiyovu Sports

Bugesera FC 0-2 Musanze FC

Etincelles 0-1 Amagaju

Etoile de l’Est 2-2 Sunrise

Muhazi United 0-0 Gasogi United

Marine 1-1 Mukura Victory Sport