APR FC yasinyishije umukinnyi mwiza w’umwaka muri Shampiyona ya Burkina Faso

APR FC yatangaje ko yasinyishije Umunyaburukina Faso, Memel Raouf Dao ukina inyuma ya ba rutahizamu amasezerano y’imyaka ibiri.

Iyi kipe yabitangaje kuri iki Cyumweru Tariki ya 22 Kamena 2025, ibinyujije ku mbuga nkoranyambaga zayo.

Yagize iti: “Tunejejwe no kwakira DAO. R MEMEL mu muryango mugari wa APR FC”

Uwo mukinnyi w’imyaka 21 yari asazwe akinira AS Sonabel Ouagadougou y’iwabo muri Burkina Faso aho umwaka ushize w’imikino yatsinze ibitego bitanu.

Memel Dao yaherukaga kandi kubanza mu kibuga ubwo Burkina Faso yatsindwaga na Tunisia ibitego 2-0 mu mukino wa gishuti wabaye tariki ya 2 Kamena 2025.

Uyu mukinnyi abaye uwa mbere iyi kipe y’ingabo itangaje muri iyi mpeshyi.

Nkuko byatangajwe na Chairaman wa APR Brig Gen Deo Rusangwa mu kiganiro n’abanyamakuru giheruka iyi kipe y’Ingabo z’Igihugu isigaje kugura umukinnyi umwe w’umunyamahanga uzaba ari rutahizamu ushaka ibitego.

APR FC ni yo izahagararira u Rwanda muri CAF Champions League ya 2025/26, aho ijonjora rya mbere rizakinwa tariki ya 19-21 na 26-28 Nzeri 2025.