APR FC yanganyije na Rayon Sports, abafana buzuye Sitade

  • Imvaho Nshya
  • Ukwakira 29, 2023
  • Hashize amezi 4
Image

Ikipe ya APR FC yanganyije na Rayon Sport ubusa ku busa, mu mukino w’umunsi wa cyenda wa shampiyona y’icyiciro cya mbere,  wabaye kuri iki Cyumweru tariki 29 Ukwakira 2023 kuri Kigali Pele Stadium.

Mbere yo gutangiza umukino habanje gufatwa umunota umwe wo kwibuka Umudage Mike Feller nyiri “La Galette”, wari umukunzi ukomeye cyane w’Ikipe ya APR FC n’Ikipe y’Igihugu ‘Amavubi’ witabye Imana ku wa Gatandatu tariki 28 Ukwakira 2023 azize uburwayi.

Nyuma yaho umusifuzi mpuzamahanga Twagirumukiza Abdulkarim yatangije umukino hagati y’impande zombi.

Ni umukino watangiye amakipe yombi asatirana cyane by’umwihariko Rayon Sports yabonye koruneri enye kuri imwe ya APR FC mu minota itanu ya mbere y’umukino.

Rayon Sports yatsinze igitego cya Musaa Esenu cyiza cyangwa n’umusifuzi kubera ko yari yaraririye.

APR FC yakomeje gusatira, ku munota wa 22′ Mugisha Gilbert yacitse ba myugariro ba  Rayon Sports, ashatse kuroba umuzamu Tamale umupira ntiwagera mu izamu, Pitchou yongeyemo  ukurwamo na Mitima mbere y’uko asubizamo n’umutwe ukajya ku ruhande.

Rayon Sports yarokotse kwinjizwa igitego nyuma y’uko umuzamu Tamale ananiwe gutera umupira wari usubijwe inyuma  na Mitima, ku bw’amahirwe ntiwajya mu izamu.

Rayon sport yabuze igitego ku mupira uteretse Luvumbu, umunyezamu Ndzila agorwa no kuwufata nyuma yo kwidunda, ushyirwa muri koruneri na Clement Niyigena.

Mbere y’uko igice cya mbere kirangira, APR FC yahushije uburyo bw’igitego ku mupira wahinduwe na Omborenga, ushyirwaho umutwe na Mbaoma  ariko ujya ku ruhande.

Igice cya Mbere cyarangiye amakipe yombi anganya ubusa ku busa.  Mu gice cya kabiri, Rayon sport yatangiranye impinduka Kalisa Rachid asimburwa na Charles Bbaale.

Rayon sport yabonye Kufura (coup-franc) ku ikosa ryakozwe na Niyomugabo Claude, Luvumbu yateye umupira Mitima Isaac awushyize mu izamu ufatwa na Pavelh Ndzila.

Ku munota wa 53′ Taddeo Lwanga yahawe ikarita y’umuhondo asunitse Ojera amugusha hasi. Ni nyuma y’uko uyu mwenewabo w’Umunya-Uganda yari ashatse gukinira nabi Ishimwe Christian.

Ku munota wa 58, Ojera yahinduye umupira mu rubuga rw’amahina usanga Esenu washyizeho umutwe, ujya hejuru y’izamu.

Ku munota wa 64′ Charles Bbaale yahushije igitego ku mupira yahawe na Joackiam Ojera ateye ishoti rijya hejuru y’izamu ririnzwe na Ndzila.

APR FC yakomeje gusatira inyuze mu mpande ariko ba myugariro ba Rayon Sport bakomeza kwihagararaho.

Mbere y’uko umukino urangira, umusifuzi wa kane Rulisa Patience, yongeyeho iminota ine y’inyongera.

Ku munota wa 90+1′ Rayon Sports yakoze ‘contre-attaque’, Luvumbu agushwa ku murongo w’urubuga rw’amahina, umusifuzi Twagirumukiza atanga “coup-franc” n’ikarita y’umuhondo kuri myugariro wa APR FC.

Luvumbu yahannye ikosa yakoreweho, umupira awutera mu rukuta. Umukino warangiye amakipe yombi anganyije ubusa ku busa mu mukino w’umunsi wa cyenda wa shampiyona.

Ikipe y’Ingabo z’Igihugu (APR FC) yahise igira amanota 18 iguma ku umwanya wa kabiri mu gihe Rayon Sports yagize amanota 13 ifata umwanya wa karindwi.

Uko indi mikino y’umunsi wa cyenda wa shampiyona yagenze.

Gorilla FC 2-3 Marines

Kiyovu Sports 6-1 Etoile de l’Est

Bugesera 2-2 Amagaju

Gasogi United 0-1 Police FC

Mukura Victory Sport 1-0 Etincelles

Musanze 1-0 As Kigali

Sunrise 1-2 Muhazi United

Urutonde rwagateganyo rwa shampiyona ku munsi wa cyenda

1. Musanze FC ifite amanota 20

2. APR FC ifite amanota 18 (-1)

3. Police FC ifite amanota 16

4. KIYOVU ifite amanota 15

5. MUKURA ifite amanota 15

6.Rayon Sports ifite amanota 13 (-1)

SHEMA IVAN

  • Imvaho Nshya
  • Ukwakira 29, 2023
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE