APR FC na Rayon Sports zatsikiye

  • SHEMA IVAN
  • Ugushyingo 25, 2023
  • Hashize amezi 3
Image

APR FC na Rayon Sports zatsikiye, ku munsi wa 11 wa Shampiyona kuko APR FC yanganyije na AS Kigali naho Rayon Sports inganya na Etincelles FC

 Mu mpera z’iki cyumweru shampiyona y’icyiciro cya mbere mu mupira w’amaguru mu bagabo yakomeje nyuma y’iminsi yari imaze itaba kubera ko abakinnyi bari mu karuhuko k’imikino y’amakipe y’ibihugu.

Kuri uyu wa Gatandatu tariki 25 Ugushyingo 2023 hakinwe imikino ine mu munani iteganyijwe ku munsi wa 11 wa shampiyona.

Kuri Kigali Pele Stadium, APR FC yifuzaga gutsinda umukino ikarara ku mwanya wa mbere ufitwe na Musanze FC yananiwe kubigeraho kuko yanganyije na AS Kigali igitego kimwe kuri kimwe.

Ikipe y’Ingabo z’Igihugu yinjiye neza mu mukino kuko ku munota wa gatandatu yari yamaze gushyiramo igitego cya mbere cyinjijwe na Victor Mbaoma aba atsinze igitego cye  cya karindwi muri uyu mwaka w’imikino wa 2023-2024.

Igice cya mbere cyarangiye APR FC itsinze As Kigali igitego 1-0.

Mu gice cya kabiri ku munota wa 48 AS Kigali yabonye penaliti yavuye ku ikosa Nshimiyimana Yunussu yakoreye Lottin Kone mu rubuga rw’amahina.

Iyi Penaliti yashyizwe mu izamu neza na Ishimwe Fiston intizanyo ya APR FC ndetse wanagiyemo asimbuye Iyabivuze Osée wagize imvune ku munota wa 35.

Ku munota wa 80 Nshuti Innocent yashyizemo igitego cya kabiri asimbuye ariko umusifuzi wo ku ruhande avuga ko habanje kubamo ikosa mu gihe uwo hagati yari yamaze kwemeza ko ari cyo.

Ku munota wa gatatu w’inyongera Nshuti yongeye kubona amahirwe yo gutsinda igitego kuri penaliti yakoreweho ariko umunyezamu wa AS Kigali, Niyonkuru Pascal, awukuramo ndetse Nshuti asubijemo ujya hanze.

Umukino warangiye amakipe yombi anganyije igitego kimwe kuri kimwe.

Kuri stade Umuganda mu Karere ka Rubavu, ikipe ya Etincelles yatangiye umukino yifitiye icyizere nyuma yo gushyirirwaho agahimbazamutsi ka miliyoni eshanu.

Iyi kipe yabonye igitego cya mbere ku munota wa 40 cyatsizwe na Nzabonimpa Deogratias.

Byasabye Rayon Sport gutegereza ku munota wa 60 w’igice cya kabiri ibone igitego cyo kwishyura cyatsinzwe na Luvumbu Nzinga kuri penaliti.

Umukino warangiye amakipe anganyije igitego kimwe kuri kimwe.

Police FC yatsinze umukino wa gatandatu yikurikiranya

Mu Karere ka Huye, Amagaju yari yakiriye Police FC yari imaze gutsinda imikino itanu yikurikiranya.

Muri uyu mukino ibitego byose byabonetse mu gice cya kabiri cy’umukino.

Police FC ni yo yafunguye amazamu ku gitego cyatsizwe na Abubakar Djibrine Akuki ku munota wa 65 nyuma y’iminota itatu, Umurundi Bigirimana Abedi ashyiramo icya kabiri nanone nyuma y’iminota itatu rutahizamu Rukundo Abderhaman yashyiriyemo Amagaju FC icy’impozamarira.

Umukino warangiye Police FC itsinze Amagaju ibitego 2-1 yuzuza umukino wa gatandatu  idatsindwa muri shampiyona y’uyu mwaka.

Kuri Stade y’Akarere ka Nyagatare Sunrise FC yari yakiriye Kiyovu Sports gusa uyu mukino waje guhagarara kubera imvura nyinshi yaguye kuri iki kibuga bituma ku munota wa karindwi uhagarikwa n’umusifuzi.

Undi mukino wabaye uyu munsi Bugesera FC y’umutoza Haringigo Francis watozaga umukino wa mbere nk’umutoza mushya yatsindiwe mu rugo na Marines FC igitego 1-0.

Kuri iki cyumweru tariki 26 Ugushyingo 2023 imikino irakomeza, aho Gasogi united izakira Musanze FC saa cyenda kuri Kigali Pele Stadium

Mukura VS izakira Muhazi United saa cyenda kuri stade Mpuzamahanga ya Huye hanasubukurwe umukino wa Sunrise FC na Kiyovu Sports bahereye ku munota wa 7 umukino wahagarikiweho kubera imvura.

  • SHEMA IVAN
  • Ugushyingo 25, 2023
  • Hashize amezi 3
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE