Amerika yamaganye igitero Iran yagabye kuri Iraq

  • KAMALIZA AGNES
  • Mutarama 16, 2024
  • Hashize amezi 2
Image

Leta Zunze Ubumwe z’Amerika zamaganye ubuyobozi bwa Iran nyuma y’igisasu cya Misile yarashe mu Majyaruguru ya Iraq mu gace ka Irbil, zivuga ko ari ‘ibitero bititondewe kandi bidakwiye.’

Abasirikare ba Iran bavuze ko ibyo bisasu babirashe ahari ibirindiro by’abatasi ba Leta ya Isiraheli mu Ntara ya Kurdistan.

BBC yatangaje ko ibyo bitero byishe abantu bane abandi barakomereka nk’uko byemejwe n’Inama y’Umutekano ya Kurdistan.

Guverinoma ya Iraq na yo yamaganye icyo gitero cyagabwe nyuma y’uko ingabo zishinzwe impinduramatwara ya Kisilamu za Iran zigabye ibyo bitero bya misile ku mitwe irwanya Tehran ndetse no ku “cyicaro gikuru cy’ubutasi” cya Isiraheli muri Erbil, umujyi utuwe cyane muri Iraq.

Minisiteri y’Ububanyi n’Amahanga ya Iraq yavuze ko yahamagaye Ambasaderi wa Iran mu rwego rwo kwamagana icyo gitero cya misile cyahitanye ubuzima bw’abasivili bane.

Iki gitero kivugwa ko ari ukuvogera ubusugire bwa Iraq, kandi binyuranyije n’amategeko mpuzamahanga kandi bihungabanya umutekano w’Akarere.

Minisiteri yongeyeho ko abayobozi ba Iraq “bazafata ingamba zose zemewe n’amategeko” zikenewe, harimo no gutanga ikirego mu Kanama ka Loni gashinzwe umutekano ku Isi.

Ibiro Ntaramakuru bya Iran byavuze ko ibyo bitero byasenye “icyicaro gikuru cy’ubutasi” ndetse  kinafata n’umutwe w’iterabwoba urwanya Iran uherereye muri Erbil.

Minisiteri y’Ububanyi n’Amahanga y’Amerika yasohoye itangazo ryamagana ibyo “bititondewe”, ishimangira ko “bihungabanya umutekano wa Iraq”.

Igitero cya misile kije mu gihe hari impungenge z’uko amakimbirane yakwiyongera mu Burasirazuba bwo Hagati, kuva intambara hagati ya Isiraheli na Hamas muri Palestine yatangira  ku ya 7 Ukwakira 2023.

Ariko nanone abafatanyabikorwa ba Iran na bo bivugwa ko binjiye muri Liban, Siriya, Iraq na Yemen.

Ibiro Ntaramakuru byabo bya Sepah byatangaje ko Umutwe  w’ingabo z’impinduramatwara  ya Kisilamu za Iran (IRGC) na wo wagabye  ibitero  bya misile zo mu bwoko bwa ballistiqe muri Siriya ku hantu hakunze guteranira abayobozi bakomeye.

Ikigo cy’ubugenzuzi bw’intambara n’uburenganzira bwa muntu cya Siriya cyatangaje ko igisasu cyumvikanye muri Aleppo no mu cyaro cyayo, aho nibura misile 4 zaturutse mu cyerekezo cy’inyanja ya Mediterane”.

  • KAMALIZA AGNES
  • Mutarama 16, 2024
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE