Amerika n’u Rwanda byatangiye umushinga w’ubuhinzi wa miliyari 305 Frw

  • NTAWITONDA JEAN CLAUDE
  • Gashyantare 20, 2022
  • Hashize imyaka 2
Image

Ikigega Mpuzamahanga cy’Abanyamerika gishinzwe iterambere (USAID) cyatangaje ko cyatangiye ubufatanye na Leta y’u Rwanda bwo gukusanya ishoramari ry’amafaranga y’u Rwanda asaga miliyari 305 (miliyoni 300 z’amadolari y’Amerika), muri gahunda yiswe “Kungahara Wagura Amasoko” igamije guteza imbere ubuhinzi bw’ibyoherezwa mu mahanga.

Iyo gahunda y’imyaka itanu ishyirwa mu bikorwa  binyuze mu mushinga mpuzamahanga “Feed the Future” ugamije kuzahura umutekano w’ibiribwa ku Isi watangijwe mu mwaka wa 2010 ubwo Leta Zunze Ubumwe z’Amerika zayoborwaga na Barack Obama.

Ku wa Gatanu w’iki cyumweru, ni bwo ubuyobozi bwa USAID bwatangije iyo gahunda n’inkunga ya miliyari zisaga 15 z’amafaranga y’u Rwanda mu guteza imbere urwego rw’ubuhinzi bugezweho bw’ibyoherezwa mu mahanga buhereye ku gihingwa cy’ikawa, icyayi, indabyo, imboga n’imbuto, ibirungo, ibikomoka ku bworozi nk’amata n’impu.

Iyo gahunda izakorwa ku bufatanye na Leta y’u Rwanda, Urwego rw’Aibikorera na Sosiyete Sivile hagamijwe koroshya ishyirwa mu bikorwa rya Politiki idaheza kandi iramba, aho inzego zose zizajya zikurikirana uko ishyirwa mu bikorwa ari na ko hakomezwa gukora ubukangurambaga ku bijyanye n’ishoramari rikorwa mu bufatanye bwa Leta n’abikorera mu kongera ibicuruzwa by’ubuhinzi bigezweho byoherezwa mu mahanga.

Ubwo uwo mushinga watangizwaga ku wa Gatanu taliki ya 18 Gashyantare 2022, Umuyobozi wa USAID mu Rwanda Jonathan Kamin, yavuze ko intego nyamukuru ari iyo kugera nibura ku nyongera ya 12% y’umusaruro w’ubuhinzi woherezwa mu mahanga buri mwaka.

Yakomeje agira ati: “Amafaranga yinjizwa n’abahinzi agomba kwiyongera akava kuri 50% akagera kuri 705 ku ngo zitari munsi ya 100,000 ndetse hanakusanyijwe ishoramari rya miliyoni 300 z’amadolari y’Amerika binyuze mu bufatanye n’ibigo bya Leta y’u Rwanda.”

Umunyamabanga wa Leta muri Minisiteri y’Ubuhinzi n’Ubworozi (MINAGRI) Dr. Jean-Chrysostome Ngabitsinze, yavuze ko ubwo bufatanye n’urwego rw’abikorera ndetse n’imiryango ya sosiyete sivile ari ingenzi cyane kuko buzagira uruhare rukomeye mu bwiyongere bw’abacuruzi bohereza ibicuruzwa bigezweho mu mahanga.

Uretse ishoramari ry’amafaranga y’u Rwanda asaga miliyari 305, gahunda ya Kungahara Wagura Amasoko yitezweho ko agaciro k’ibyoherezwa mu mahanga ku rwego rw’Igihugu

kagomba kugera ku 168% ndetse n’amafaranga yinjizwa n’ingo zibarirwa mu 127,0000 aturutse mu buhinzi akiyongeraho 50%.

Biteganyijwe kandi ko u Rwanda ruzarushaho kunoza politiki y’ubuhinzi n’ubworozi, bikaba byitezwe ko hazashyirwaho politiki z’ubuhinzi n’ubworozi zitabangamira ibidukikije zigera kuri 30.

Inganda zigera kuri 500 zikora mu rwego rw’ubuhinzi n’ubworozi zizahabwa inkunga itangwa na Guverinoma ya Leta Zunze Ubumwe z’Amerika.

Gahunda ya “Future Rwanda Kungahara Wagura Amasoko” yatangiye gushyirwa mu bikorwa ku bufatanye buyobowe n’Ikigo RTI International n’abandi bafatanyabikorwa nka J.E. Austin Associates, Dalberg Advisors, LixCap, na Vanguard Economics. 

  • NTAWITONDA JEAN CLAUDE
  • Gashyantare 20, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE