Ambasaderi Omar Daair w’u Bwongereza mu Rwanda, kuri uyu wa Kabiri tariki 19 Ukuboza 2023 yagiranye ibiganiro n’Umunyamabanga Mukuru w’Umuryango FPR Inkotanyi, Amb Gasamagera Wellars.
Ibiro by’Umuryango FPR Inkotanyi bibinyujije ku rubuga rwa X, byemeje uguhura kw’aba bayobozi bombi.
Ibiganiro byabereye ku cyicaro cy’Umuryango FPR Inkotanyi mu Murenge wa Rusororo mu Karere ka Gasabo mu Mujyi wa Kigali.
Impande zombi zaganiriye ku mubano w’ibihugu byombi, u Bwongereza n’u Rwanda. Ziyemeje kandi gushyira imbaraga mu mubano usanzwe uranga ibihugu byombi.
U Bwongereza bufatanya n’u Rwanda mu ngeri zitandukanye zirimo iterambere ry’abaturage, aho bwafashije u Rwanda mu rugendo rwo kurandura ubukene, guteza imbere uburezi, kwita ku mibereho myiza y’impunzi n’ibindi binyuze mu Kigega cy’Abongereza cy’Iterambere DFID na UK AID.
U Rwanda rwinjiye mu Muryango Mpuzamahanga w’Ibihugu bikoresha Icyongereza (Commonwealth) mu 2009 nyuma y’imyaka 15 ruvuye muri Jenoside yakorewe Abatutsi, aho rwari rukirimo kugerageza kubaka ubukungu bwarwo n’umubano mpuzamahanga.
Muri Mutarama 2020, u Bwongereza bwatangaje ko butanze inyongera ya miliyoni 6 z’amayero mu ishoramari yiyongera kuri miliyoni 54 z’amayero yatanzwe mu rwego rw’imari n’ubuhinzi mu bihugu bigize Commonwealth.
Nta gitekerezo kiratangwa. Ba uwa mbere gutanga igitekerezo.
Andika igitekerezo
AMATEGEKO AGENGA IYANDIKA RY'IGITEKEREZO CYAWE