Ambasaderi wa Tanzania n’uwa Libya biyemeje gutsura umubano n’u Rwanda

  • NTAWITONDA JEAN CLAUDE
  • Mata 6, 2022
  • Hashize imyaka 2
Image

Ku wa Gatatu taliki ya 6 Mata 2022, Perezida wa Repubulika y’u Rwanda Paul Kagame yakiriye impapuro zemerera Ambasaderi wa Tanzania Gen Maj Richard Mutayoba Makanzo na Ibrahim Sidy Ibrahim Matar wa Libya, guhagararira ibihugu byabo mu Rwanda.

Mu kiganiro n’abanyamakuru nyuma yo kwakirwa muri Village Urugwiro, Ambasaderi mushya wa Tanzania n’uwa Libya, batangaje imigabo n’imigambi bafite mu kurushaho gushyigikira umubano usanzwe hagati y’ibyo bihugu n’u Rwanda.

Amb. Maj. Gen. Mutayoba  Makanzo yavuze ko intego ye nyamukuru ari ugushyigikira ubutwererane bw’ibihugu by’abaturanyi mu nyungu z’abaturage ku mpande zombi.

Yavuze ko uretse ibiganiro bigenda bihuza inzego zitandukanye zituruka mu bihugu byombi, u Rwanda ari umufatanyabikorwa mwiza mu bucuruzi n’ishoramari cyane Tanzania ari cyo gihugu cy’ingenzi kiruhuza n’inyanja.

Yagize ati: “Intego yacu nyamukuru, ni uguharanira koroshya ubucuruzi hagati y’ibihugu byombi no gufatanya mu kugabanya ingorane umuryango w’abacuruzi ukomeje guhura na zo.”

Icyambu cya Dar es Salaam ni cyo kinyuraho hejuru ya 85% by’imizigo y’ibicuruzwa n’ibindi bikoresho byerekeza cyangwa binyura mu Rwanda.

Agaruka ku rugendo rukorwa n’amakamyo aturuka muri Tanzania yerekeza i Kigali, Amb. Maj. Gen. Mutayoba yashimangiye ko harimo gushakwa uburyo bwo kurushaho koroshya urujya n’uruza binyuze mu kubaka gari ya moshi ihuza ibihugu byombi ihendutse kandi yihuta kurusha amakamyo.  

Umushinga wo kubaka umuhanda wa gari ya moshi wa Isaka-Kigali umaze igihe mu biganiro, aho kuri ubu harimo no kwiga ku mushinga wo kuwongera ukava i Kigalli werekeza i Rubavu kugira ngo uzakomereze no muri Repubulika Iharanira Demokarasi ya Congo (RDC).

Muri Kanama 2021, Perezida wa Tanzania Samia Sulihu Hassan yagiriye uruzinduko mu Rwanda ahura na Perezida Kagame, batanga umurongo mu birebana no kurushaho gutsura umubano w’ibihugu byombi ndetse hanasinywa amasezerano y’ubufatanye mu nzego zitandukanye.

Ku rundi ruhande, Ambasaderi mushya wa Libya mu Rwanda Ibrahim Sidy Ibrahim Matar, na we yavuze ko azibanda ku guteza imbere umubano mwiza hagati y’u Rwanda na Libya, ibihugu byombi bikaba bifite ibyo bizungurana mu birebana n’ubunararibonye.

Yavuze kandi ko agiye kwibanda ku bintu byose bishoboka byarushaho kwimakaza umubano mwiza mu nzego zose, ati: “Hari ibintu byinshi abaturage bacu bakwigira ku Rwanda kandi n’Abanyarwanda ni uko.”

Muri Nzeri 2019, u Rwanda rwasinyanye amasezerano y’ubufatanye n’Ishami ry’Umuryango w’Abibumbye (UNHCR) ndetse n’Umuryango w’Afurika Yunze Ubumwe (AU), yo kwakira impunzi n’abashaka ubuhungiro bari baraheze muri Libya nyuma yo kunanirwa kwambuka inyanja ya Mediterranée berekeza i Burayi.

Kuva muri uwo mwaka u Rwanda rumaze kwakira abantu 943 baje mu byiciro umunani, bacumbikirwa mu nkambi y’agateganyo ya Gashora iherereye mu Karere ka Bugesera. Icyo gikorwa kirakomeje kuko ku wa 14 Ukwakira 2021 ayo masezerano yavuguruwe akongererwa indi myaka ibiri ndetse n’abo u Rwanda rwiyemeje kwakira bakiyongera.  

Mu bakiriwe mbere harimo 565 bamaze kwimurirwa mu bindi bihugu byemeye kubakira ari byo Canada imaze kwakira 186, Suwede (Sweden)  yakiriye 142, Noruveje (Norway) 113, u Bufaransa bwakiriye 66, u Bubiligi bwakira 26 na Finland yakiriye 32.

Abo bambasaderi bombi bashyikirije Umukuru w’Igihugu impapuro zibemerera guhagararira ibihugu byabo, bazaba bafite icyicaro i Kigali.

  • NTAWITONDA JEAN CLAUDE
  • Mata 6, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE