Ambasaderi mushya w’u Buholandi mu Rwanda ategerejwe i Kigali

  • NTAWITONDA JEAN CLAUDE
  • Kanama 15, 2023
  • Hashize amezi 10
Image

U Rwanda rwiteguye kwakira Ambasaderi mushya y’Ubwami bw’u Buholandi Joan J. J. Wiegman, ugiye gukomeza izo nshingano zakorwaga na Amb. Matthijs Wolters wahagarariye igihugu cye i Kigali guhera mu mwaka wa 2019.

Inkuru y’uko agiye gusimburwa yamenyekanye ubwo ku gicamunsi cyo kuri uyu wa Kabiri, Ambasaderi w’u Rwanda mu Buholandi Olivier Jean Patrick Nduhungirehe yatangazaga ko yakiriye Ambasaderi mushya w’Ubwami bw’u Buholandi mu Rwanda ari we Joan J. J. Wiegman.

Ku wa Gatanu w’iki cyumweru, ni bwo biteganyijwe ko Joan J. J. Wiegman azaza i Kigali aho akomeza izo nshingano zo guhagararira inyungu z’Igihugu cye mu bya dipolomasi no kurushaho kwimakaza ubutwererane n’u Rwanda mu nzego zitandukanye.

Amb. Nduhungirehe yamwijeje ko bazakomeza kugirana imikoranire myiza mu kurushaho kunoza umubano n’ubutwererane mu nzego zitandukanye zizanira inyungu abaturage b’ibihugu byombi.  

Amb. Joan J. J. Wiegman aje mu Rwanda mu gihe yari asanzwe ari Ambasaderi w’u Buholandi muri Senegal, inshingano yatangiye mu mpera z’ukwezi k’Ukuboza 2019.

Uyu mudamu w’imyaka 59 y’amavuko, afite ubunararibonye bw’imyaka ikabakaba 35 mu birebana n’ubutwererane na dipolomasi, kuko yinjiye muri Minisiteri y’Ububayi n’Amahanga y’u Buholandi bwa mbere mu mwaka wa 1991, akora mu ishami rishinzwe gukurikirana imikoranire n’Imiryango Mpuzamahanga.

Yakoze n’izindi nshingano zirimo kuba Umuyobozi ukuriye Politiki muri Ambasade y’u Buholandi i Beijing mu Bushinwa, Umuyobozi Ushinzwe Itangazamakuru, Umuco na Siporo muri Ambasade y’i Pretoria muri Afurika y’Epfo, aba n’Umuyobozi w’Ishami rishinzwe Ububanyi n’Amahanga mu birebana n’Ingufu za Nikeleyeri, na Politiki y’Umutekano muri Ministeri y’Ububanyi n’Amahanga.

U Rwanda n’Ubwami bw’u Buholandi bikomeje kuryoherwa n’umubano uzira amakemwa mu nzego zinyuranye zirimo ubukungu, imibereho myiza, Igisirikare n’umutekano, n’izindi nzego.

Ibigo byinshi bifite inkomoko mu Buholandi na byo bikomeje kunogerwa n’ikirere cyiza cyorohereza ishoramari mu Rwanda, kandi ibigo byinshi muri byo byateye imbere.

Aha hazamo nk’Ikigo gikora inzoga zisembuye n’izidasembuye cya BRWALIRWA/Heineken, Dutch Rabobank ikora mu rwego rw’amabanki hamwe n’Isosiyete ya KLM ikora ingendo zo mu kirere zihuza Kigali n’Amsterdam.

Mu bindi bigo bikomoka mu Buholandi bikorera mu Rwanda harimo Ikigo DSM gikora ubucukuzi bw’amabuye y’agaciro n’ibikomoka kuri Peteroli yatangiye gukorera mu Rwanda mu mwaka wa 2016 na UNILEVER yaguze imigabane muri rumwe mu nganda z’icyayi zo mu Rwanda.

By’umwihariko, Ikigo Nyarwanda Bella Flowers gikora ubuhinzi n’ubucuruzi bw’indabyo ku rwego mpuzamahanga gifatanya n’ibigo bitandukanye byo mu Buholandi mu kurushaho kwagura amasoko mpuzamahanga y’indabyo zo mu Rwanda.

  • NTAWITONDA JEAN CLAUDE
  • Kanama 15, 2023
  • Hashize amezi 10
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE