Amb. Rao Hongwei yanyuzwe n’uko RPF-Inkotanyi ihoza umuturage ku isonga

  • NTAWITONDA JEAN CLAUDE
  • Werurwe 16, 2022
  • Hashize imyaka 2
Image

Ambasaderi w’u Bushinwa mu Rwanda urimo gusoza ubutumwa bwo guhagararira igihugu cye, yashimye imiyoborere y’Umuryango RPF-Inkotanyi itarahwemye guhoza umuturage ku isonga mu myaka 28 umaze ku butegetsi.

Amb. Hongwei yabigarutseho mu gitondo cyo kuri uyu wa Gatatu taliki ya 16 Werurwe 2022, ubwo yasuraga Umunyamabanga Mukuru wa RPF-Inkotanyi François Ngarambe amusezeraho kuko igihe cyo guhagararira inyungu z’igihugu cye kiri kugera ku musozo.

Amb. Hongwei yavuze ko imiyoborere ya RPF-Inkotanyi mu myaka 28 ishize ifitanye isano n’iy’Ishyaka Communist Party of China (CPC) riri ku butegetsi mu Bushinwa guhera mu mwaka wa 1921.

Yakomeje ashima umubano uzira amakemwa ukomeje kurangwa hagati y’iyo mitwe ya Politiki yombi imaze kuba ubukombe kandi ikaba inafite icyerekezo gihamye cy’iterambere ritagira n’umwe risigaza inyuma, yongeraho ko imyaka itanu ya manda ye mu Rwanda yabaye imbarutso yo kurushaho gushyigikira umubano ushingiye ku byo iyo mitwe ya politiki yombi ihuriyeho.

Yanavuze kandi ko nubwo icyorezo cya COVID-19 cyagabanyije ibikorwa bihuza abantu imbonankubone ariko hakomeje kubaho imikoranire no kubaka ubutwererane hifashishijwe ubundi buryo burimo ubwifashishije ikoranabuhanga.

Yanaboneyeho umwanya wo gushimira Guverinoma y’u Rwanda yamworohereje mu gihe cy’imyaka itanu amaze mu nshingano, yiyemeza ko azakomeza kuba ambasaderi w’u Rwanda aho azajya hose kandi ko azajya agaruka no kurusura.

Ati: “Nzakomeza kugira uruhare mu guteza imbere umubano wacu n’u Rwanda ndetse no gukora ubuvugizi bugamije gushora imari muri iki gihugu no gukangurira abandi gusura u Rwanda.”

Umunyamabanga Mukuru wa RPF-Inkotanyi Ngarambe, yavuze ko mu myaka itanu ishize hari byinshi byakozwe harimo n’uruzinduko rwa Perezida w’u Bushinwa Xi Jinping mu Rwanda ndetse icyo gihugu ngo cyongereye ubufatanye mu nzego zitandukanye.

Ati: “Umubano w’imitwe ya Politiki yombi na wo wariyongereye muri manda yawe, ndagusaba ngo uzakomeza ube Ambasaderi mwiza w’u Rwanda aho uzajya hose nyuma y’ubu butumwa. Ikindi kandi uzakomeza kuza wisanga mu Rwanda igihe cyose uzifuza kugaruka kudusura.”

Mu ntangiriro za Nyakanga 2021, ubuyobozi bw’Umuryango RPF-Inkotanyi bwifatanyije na CPC kwizihiza isabukuru y’imyaka 100 iryo shyaka rimaze ku buyobozi bw’u Bushinwa.

Hon. Ngarambe yashimye uburyo muri iyo myaka CPC yagaragaje umurava udasanzwe mu guharanira iterambere ry’abaturage kuri ubu u Bushinwa bukaba buri mu bihugu by’ibihangange ku Isi.

Ati: “Mu myaka 100 ishize, ubuyobozi bufite icyerekezo  bwabaye imwe mu nkuru zikomeye ku Isi kandi bwahaye Igihugu umwanya ukwiye mu bubanyi n’amahanga. Kugeza ubu, u Bushinwa bufatwa na benshi nk’ahantu h’intangarugero ndetse n’ubuyobozi buharanira impinduka.”

Yongeyeho ko RPF-Inkotanyi iha agaciro gakomeye ingengabitekerezo yo guharanira inyungu zishingiye ku baturage nk’ihame rikomeye ry’ubuyobozi mu guteza imbere imibereho myiza y’abaturage.

  • NTAWITONDA JEAN CLAUDE
  • Werurwe 16, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE