Amb. Omar Daair yishimiye miliyari 39 Frw yo gushyigikira AfCFTA

  • NTAWITONDA JEAN CLAUDE
  • Werurwe 30, 2022
  • Hashize imyaka 2
Image

Ambasaderi w’u Bwongereza mu Rwanda Omar Daair, yashimiye inkunga ya miliyoni 35 z’Amayero (amafaranga y’u Rwanda asaga miliyari 39) igihugu cye cyageneye gahunda y’Isoko Rusange ry’Afurika (AfCFTA), agaragaza ko u Rwanda rwiteguye gukomeza gukorana n’u Bwongereza mu gushyigikira uburumbuke, iterambere ry’ubucuruzi n’ishoramari ku Mugabane w’Afurika.

Iyo nkunga yatangajwe n’Umunyamabanga wa Leta y’u Bwongereza ushinzwe ubucuruzi Anne-Marie Trevelyan, igamije gushyigikira ishyirwa mu bikorwa ry’Isoko Rusange ry’Afurika rizaba ribaye irya mbere ryagutse ku isi kandi rikaba rinitezweho gukura mu bukene bukabije abaturage b’Afurika basaga miliyoni 30.

Biteganyijwe ko binyuze muri iyo gahunda yo gushyigikira ishyirwa mu bikorwa rya AfCFTA, Ikigega Mpuzamahanga gishinzwe iterambere n’ubutwererane bw’Umuryango w’Ibihugu bikoresha Ururimi rw’Icyongereza (FCDO) ari cyo kizatanga iyo nkunga izifashishwa mu koroshya ubucuruzi no gushyigikira ubunyamabanga bwa AfCFTA hamwe n’ibihugu by’ibinyamuryango binyuze mu Muryango TradeMark East Africa (TMEA), Iigo gishinzwe Iterambere Mpuzamahanga (ODI) n’indi miryango.

Ayo makuru yatangajwe mu gihe Umunyamabanga Mukuru wa AfCFTA Wamkele Mene yagiriye uruzinduko i London mu bigeniro bigamije kungurana ibitekerezo by’uko u Bwongereza bwarushaho kugaragaza uruhare rwarwo mu gushyigikira itrambere ry’Isoko Rusange ry’Afurika.

Ambasaderi Omar Daair yagize ati: “ U Bwongereza n’u Rwanda ni abafatanyabikorwa bakomeye bashyigikiye iterambere ry’ubucuruzi ku mugabane w’Afurika. Bityo byari iby’agaciro gakomeye kubona Anne-Marie Trevelyan atangaza gahunda ya miliyoni 35 z’amayero yo gushyigikira ibiganiro n’ishyirwa mu bikorwa ry’Isoko Rusange ry’Afurika rifite intego ihamye.”

Nk’isoko rusange rya mbere rigari ku Isi, AfCFTA itanga amahirwe asesuye yo kwihutisha iterambere ry’ubukungu bw’Afurika bujyana n’ubwiyongere bw’inganda n’ibyongererwa agaciro kuri uyu mugabane bitabaye ngombwa gutwara umutungo kamere hanze yawo.

Ibyo bizajyana no guhanga imirimo ihagije ku banyafurika na byo bikazagira amahirwe yo gukumira umubare munini w’urubyiruko rwerekezaga i Burayi n’ahandi rugiye gushaka imirimo rimwe na rimwe mu buryo bushyira ubuzima bwarwo mu kaga.

Ku bijyanye n’ubucuruzi u Bwongereza bukorera kuri uyu mugabane, Isoko Rusange ry’Afurika ryitezweho kuzakuraho imbogamizi zose zashoboraga gukumira kugera ku masoko yo mu bihugu bigize umugabane, korohereza abashoramari b’Abongereza kohereza ibicuruzwa mu bihugu by’Afurika uko ari 54.

Anne-Marie Trevelyan yavuze ko u Bwongereza bushyigikiye bwivuye inyuma gahunda y’Isoko Rusange ry’Afurika ndetse bazakomeza gushyigikira ibiganiro bigamije kurishyira mu bikorwa.

Yagize ati: “Iyi nkunga igaragaza ko ubucuruzi ari imbaraga zigamije ibyiza, kandi izatugeza ku kongera ubucuruzi, ishoramari ndetse n’uburumbuke kuri Afurika n’u Bwongereza.”

Minisitiri ushinzwe Afurika Vicky Ford na we yongeyeho ko ukwihuza kw’ibihugu byo kuri uyu mugabane kuzagira uruhare rukomeye mu kwihutisha ubukungu ku mugabane, kurema amahirwe mashya no gufasha abaturage b’Afurika kuva mu bukene bwari bwarababereye akarande.

Ati: “U Bwongereza bwiyemeje kuba umufatanyabikorwa muri iyi ntego nziza. Inkunga yatanzwe izarushaho kwimakaza ubufatanye bw’igihe kirekire hagati y’ibihugu by’Afurika kandi inashyigikire urugendo rw’umugabane rwo kurushaho kwaguka mu bukungu no mu kubungabunga ibidukikije.”

Umunyamabanga Mukuru wa AfCFTA Wamkele Mene, na we yongeyeho ati: “Twishimiye kwakira iyi nkunga ya Leta y’u Bwongereza uko iratwinjiza mu bufatanye bushimangira ubutwererane bugamije koroshya Politiki y’ubucuruzi n’ibirebana na za gasutamo ku mugabane w’Afurika.”

Yagaragaje ko mu myaka itanu ishize hagiye hagaragara ubufatanye bw’Imiryango ihuza uturere tw’Afurika, akaba ari amahirwe akomeye ashimangira ko Isoko Rusange ry’Afurika rishoboka. Muri iyo myaka kandi ngo hagaragaye ubushake bw’abikorera mu guharanira kubyaza umusaruro ibikubiye mu masezerano yo gushyiraho isoko rusange ritagira n’umwe risigaza inyuma.

Intego nyamukuru ngo ni iyo kwimakaza ibicuruzwa byakorewe muri Afurika (Made in the AfCFTA) ku mugabane wose, guhanga imirimo n’andi mahirwe y’ubukungu ku Banyafurika by’umwihariko abagore n’urubyiruko.

Wamkele Mene ati: “Turashaka kurushaho korohereza Abanyafurika mu bucuruzi, by’umwihariko abagore bacu n’urubyiruko bakora ubucuruzi bwambukiranya imipaka.”

Mu gihe cy’ubuyobozi bw’u Bwongereza mu muryango w’Ibihugu 7 bikize cyane ku Isi (G7), Ikigo Mpuzamahanga cy’Ishoramari (BII) cyiyemeje gukorana n’ibindi bigo by’imari bya G7 mu gushora miliyari 80 z’amadolari y’Amerika mu rwego rw’abikorera bitarenze mu mwaka wa 2027.

Inkunga yo gushyigikira imishinga yo muri Afurika iva mu Bwongereza na yo yongerewe ku buryo budasanzwe, ikaba yitezwe gushorwa mu mishinga yo guteza imbere ibikorwa remezo mu bihugu bitandukanye.

Gahunda nshya yo gushyigikira Isoko Rusange yuzuriza ubufatanye bw’u Bwongereza n’Umuryango w’Afurika Yunze Ubumwe nk’umuryango uhuje ibihugu by’Afurika mu kwimakaza indangagaciro mpuzamahanga.

  • NTAWITONDA JEAN CLAUDE
  • Werurwe 30, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE