Amb. Karega yavuye imuzi urwango RDC ifitiye abavuga Ikinyarwanda

  • Imvaho Nshya
  • Ugushyingo 9, 2023
  • Hashize amezi 6
Image

Amb. Vincent Karega, wari Ambasediri w’u Rwanda mu gihugu cya Repubulika Iharanira Demokarasi ya Congo (RDC), yagaragaje ko nta gihe ikibazo cy’umutwe wa M23 kitazahuzwa n’u Rwanda kuko rudahwema gutabariza abo uyu mutwe uvuga ko urwanira bavuga Ikinyarwanda bambuwe uburenganzira ku gihugu cyabo.

Ambasaderi Vincent Karega, ahereye ku mateka, yagaragaje ukuntu abavuga Ikinyarwanda babaye ikibazo gikomeye muri RDC, mu gihe basanzwe mu bihugu byose bituranye n’u Rwanda kubera impinduka zishingiye ku bukuloni, ubwo ubutaka bwagabwaga bamwe bakitirirwa ibindi bihugu kandi bari Abanyarwanda.

Ahaboneka abo baturage bafite inkomoko y’u Rwanda ni mu bihugu birimo Tanzania, RDC na Uganda aho bagiye mu myaka yo hambere biturutse ku bukoloni ndetse no ku butegetsi bwa cyami bwagendaga bwagura imipaka y’u Rwanda.

Yagarutse kuri ayo mateka mu kiganiro yagejeje ku bayobozi b’amashuri ya tekinike, imyuga n’ubumenyi ngiro bari mu Itorero i Nkumba, ku mizi y’ibibazo biri mu Burasirazuba bwa Congo n’ingaruka bifite ku Rwanda.

Ati: “Abakoloni b’Abadage bakoroniza u Rwanda n’Ababiligi  bakoroniza Congo, mu mwaka wa 1910 ni bwo impaka z’imipaka zakemuwe, hari n’abavuga Ikinyarwanda bajyanywe n’abakoloni babongera muri Uganda. Mbese iyo urebye abari mu Bufumbira mu Bugande n’abaturage ba Byumba na Musanze bavuga  ururimi rumwe  ndetse n’ibisekuruza bimwe.

Ari mu gihugu cya Uganda ho nta kibazo gihari kuko Itegeko Nshinga ryemera ko hari ubwoko bwitwa Abanyarwanda no muri Tanzania muri Karagwe harimo Abanyarwanda bitwa Abaha, ni ibyerekana ko abazungu baje batatanya Abanyarwanda.”

Amb. Karega yagaragaje ko urwango abavuga Ikinyarwanda bafitiwe muri RDC ruturuka ku butegetsi bubi bw’iki gihugu, aho ukeneye gutorwa abagirira urwango agatangira kubangisha abaturage, no kugaragaza ko babambuye ibyabo kandi bibereye muri gakondo yabo.

Ati: “Ikibazo ni uko Congo iyobowe nabi, hari ibibazo by’amacakuri nk’ibyo twagize mu gihe cya 1959 no muri 1994, by’ivangura ku buryo nk’abashaka gutorwa muri ibyo bice by’abantu bavuga Ikinyarwanda bagerageza gusunika abo banyagihugu kugira ngo badahatana na bo.

Ahanini baba barize ari abakozi bazwi ku buryo bahatana na bo bakabita ko baje ijobundi n’ubwo abo bakongomani bari basanzwe bababona bagashaka kubitiranya n’abandi Banyarwanda bahungiyeyo muri 1959 no muri 1994, kuko u Rwanda igihe rwayoborwaga n’amacakubira nta gihe rwamaraga imyaka 10 cyangwa 15 abantu badahunze.

Rero babahuza n’Abanyarwanda bahunze kandi abenshi bari barahunze bagarutse Inkotanyi zimaze gufata ubutegetsi mu 1994, abarenga 90% uretse FDLR yasigaye.”

Amb. Karega akomeza avuga ko ubutegetsi bwa Congo bwanga aba bavuga Ikinyarwanda bugashaka no kubirukana, ariko akavuga ko niba bwanze abo baturage bugahitamo kubirukana bukwiye kubarekurana n’ubutaka bwabo.

Ati: “Bagombye kubanga ariko babangana n’ubutaka bwabo. Congo yo ishaka kubanga ariko ikagumana ubutaka, ni nk’umuntu wakwifuza kukwimura ariko ntaguhe ingurane.”

Impunzi z’Abanyekongo bahungiye mu Rwanda na zo ntizihwema kwamagana ivangura n’itsembabwoko rikorerwa Abatutsi bo muri icyo Gihugu

Amb. Karega kandi yakomeje agaragaza amateka y’ukuntu abavuga Ikinyarwanda  nyuma yo kubona ko banzwe cyane bashinze umutwe urwanya ubutegetsi, bitangirira ku butegetsi bwa Mubotu, ku bwa Muzehe Laurent Desire Kabila bwahanganye n’umutwe witwaga RCD ugizwe n’abavuga Ikinyarwanda birwanagaho.

Yagaragaje ko igihe cyageze Joseph Kabila, umuhungu wa Muzehe Kabila, agiye ku butegetsi abavuga Ikinyarwanda bari bahejwe yabemeye bakavangwa mu gisirikare, ariko na bwo nyuma haza kuvuka ibibazo aho abenshi mu bari muri iki gisirikare bishwe.

Aba Banyekongo bavuga Ikinyarwanda, nyuma yo kubona bakomeje kwicwa bashinjwa kuba ari Abacengezi mu ngabo za Congo, baje gushinga umutwe bise CNDP nyuma Congo yitabaza amahanga ngo abarwanye biba ngombwa ko bahungira mu Birunga muri Uganda abandi bahungira mu Rwanda.

Ibyo byanajyanye ko imiryango y’abakorerwaga iryo vangura nayo yahungiye mu bihugu bitandukanye birimo n’u Rwanda, aho kuri ubu u Rwanda rucumbikiye abarenga 90,000.

Haje gusinywa amasezerano hagati y’abahejwe na Guverinoma ya Congo tariki ya 23 Werurwe 2009, ari ho haje kuvuka umutwe wa M23 witiriwe iyi tariki (Mouvement du 23 Mars) nyuma yo kubona ibikubiye mu masezerano Leta ya Congo itabyubahirije;  kuri ubu uwo mutwe ukomeje imirwano n’ingabo za FARDC zifatanyije n’imitwe y’iterabwoba.

Amb. Karega yagaragaje ko ibibazo bya Congo bigira n’ingaruka ku Rwanda kubera ko abagiye bahezwa kenshi bafitanye isano y’amateka n’u Rwanda rwa mbere y’ubukoloni, akanahamya ko  ikibazo cya M23 nta gihe Congo itazagihuza n’u Rwanda mu gihe idashaka kugikemura ihereye mu mizi yacyo.

Yavuze ko kandi n’u Rwanda rutazakomeza kurebera ihohotera abavuga Ikinyarwanda muri Repubulika Iharanira Demokarasi ya Congo bakorerwa rigamije kubatsemba kandi nyamara rwariyemeje kurwanya Jenoside hose ku Isi, ari na yo mpamvu rutanga amatangazo rubyamagana ubutitsa.

Ati: “Mu gihe cyose  M23 izaba iriho ibibazo byayo bitakemutse, nta kuntu bazayitandukanya  n’u Rwanda, kandi ntabwo twareka ngo batsembwe. Kandi ingaruka ni twe zigarukaho iyo birukanwe ari impunzi, iyo bavukijwe ibyabo bagakena bisa n’aho ari twe  twasabwe gusubiza ikibazo cyabo cyo gukena.”

Karega Vincent yavukiye i Katanga ho muri Kongo Kinshasa hafi ya Lubumbashi mu 1963, akaba yarakuriye ndetse akaniga muri Congo icyitwa Zaire. Yakuriye i Masisi, i Kirotshe, Butembo, n’i Goma, ndetse akaba afite n’impamyabumenyi yakuye muri Kaminuza ya UNILU y’i Lubumbashi.

Vincent Karega yaje bwa mbere mu Rwanda mu 1995 nyuma yo kubohora u Rwanda, akora inshingano zinyuranye muri Guverinoma, aho yanabaye Ambasaderi w’u Rwanda muri Afurika y’Epfo ndetse no muri Repubulika Iharanira Demokarasi ya Congo.

Mu 2022 ni bwo Vincent Karega yavuye muri Repubulika Iharanira Demokarasi ya Congo (RDC) nyuma yo guhabwa amasaha 48 na Leta y’icyo gihugu, kubera umubano w’ibihugu byombi utifashe neza kugeza magingo aya.

ZIGAMA THEONESTE

  • Imvaho Nshya
  • Ugushyingo 9, 2023
  • Hashize amezi 6
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE