Amb. Busingye Johnston yashimiwe gusigasira umubano w’u Rwanda na UK

  • Imvaho Nshya
  • Ukwakira 1, 2023
  • Hashize amezi 8
Image

Guverinoma y’u Rwanda yashimye imbaraga n’umuhate Ambasaderi w’u Rwanda mu Bwami bw’u Bwongereza (UK) Busingye Johnston akomeje kugaragaza mu kwimakaza umubano w’ibihugu byombi mu nzego zitandukanye, by’umwihariko mu birebana na gahunda yo kwakira abimukira.

Amb. Busingye Johnston yashimiwe nyuma y’aho ibitangazamakuru byo ku mugabane w’u Burayi byifashishije amakuru y’amacurano yatangajwe n’Ikigo “Led By Donkeys” n’umunyamakuru Antony Barnett wigize umucuruzi ufuye mu Majyepfo y’Aziya agamije kumuharabika no gukomeza gusiga icyasha ubufatanye bw’u Rwanda na UK mu kwita ku bimukira no guharanira iterambere.

Uko ubufatanye bugamije kohereza mu Rwanda abimukira n’abasaba ubuhungiro bwabaye intangarugero mu ruhando mpuzamahanga n’umuti urambye wo guhangana n’ingorane bahura na zo bambuka inyanja, ni na ko habonetse abantu n’imiryango yakomeje ubukangurambaga bugamije kwanduza isura y’iyo gahunda igamije ineza y’abo bimukira biganjemo Abanyafurika bajya gushaka amahirwe baburiye mu bihugu byabo.

Guharabika Amb. Busingye no kugerageza kugonganisha u Rwanda n’u Bwongereza muri ubwo bufatanye, indi karita mu makarita menshi akinwa kugira ngo icyo gisubizo kiburizwemo, abimukira bakomeze  kuburira ubuzima mu mazi ya Channel no kubyazwa umusaruro n’amatsinda y’abanyabyaha abakuramo inyungu kugira ngo abambutse.

Mu itangazo ryashyizwe ahagaragara n’Umuvugizi wa Guverinoma y’u Rwanda Yolande Makolo, yashimangiye ko Amb. Busingye agira uruhare rw’ingenzi mu gushyigikira umubano w’u Rwanda na UK ukomeje gushinga imizi.

Yolande Makolo yagize ati: “Ku birebana n’ubufatanye mu kwita ku bimukira no guharanira iterambere, u Rwanda na UK bikorana binyuze mu bworoherane n’ubufatanye. Ambasaderi w’u Rwanda mu Bwongereza agira uruhare rw’ingirakamaro mu gusigasira umubano  ukomeye dufitanye n’Ubwami bw’u Bwongereza mu gihe dufatanya mu buryo butanga umusaruro mu nzego nyinshi zirimo n’ururebana n’abimukira.”

Yavuze ko inzego mpuzamahanga zita ku bimukira zikomeje kugaragaza intege nke mu kurinda abanyantege nke zongerera imbaraga amatsinda y’abanyabyaha bacuruza abo bimukira.

Ati: “Nta bumuntu na mba buri mu kwemera ko ibyo byaha bikomeza, ari na yo mpamvu u Rwanda rutewe ishema no gukorana na Guverinoma ya UK mu gushaka igisubizo.  Kubera amateka y’u Rwanda, dufitanye isano yagutse  n’abashaka ubuhungiro n’amahirwe mu butaka bushya. Ibyo niibyo bigize gahunda y’u Rwanda yo kwita ku bimukira n’abasaba ubuhungiro, kandi ni yo mpamvu  ruri mu mwanya mwiza wo gushyigikira abo ari bo bose bashaka amahirwe mashya n’aho guturiza.”

Guvernoma y’u Rwanda yongeye gushimangira ko yiyemeje kudatezuka ku ihame ryo guha buri muntu wese uburenganzira nk’ubw’abandi hatitawe ku nkomoko ye, kandi ko bizakomeza kuba izingiro ry’urugendo rwo kwiyubaka kw’Igihugu.

Yolande yagize ati: “Ivangura iryo ari ryo ryose ntiryemewe hano. Ibyo bikubiye mu Itegeko Nshinga kandi bishyigikirwa n’uko twiyemeje kubahiriza amategeko.”

Makolo yaboneyeho kugaragaza ko hari ibinyoma byatangajwe mu nkuru ya “Led By Donkeys”, anikoma Terence Fane-Saunders n’ikigo cye Chelgate cyabigendeyeho gitanga ubutumwa mu izina rya Guverinoma y’u Rwanda.

Yibukije Terence Fane-Saunders ko adahagarariye Guverinoma y’u Rwanda nyuma yo kwihereza uwo mwanya wo kuyivugira kandi atagikorana na yo nyuma y’aho amasezerano yari afite yasheshwe mu mwaka washize.

  • Imvaho Nshya
  • Ukwakira 1, 2023
  • Hashize amezi 8
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE