Amavubi atarimo Sahabo na Manzi yahamagawe mu gushaka itike y’Igikombe cya Afurika

Umutoza w’Ikipe y’Igihugu y’u Rwanda ‘Amavubi’, Stephen Constantine yahamagaye abakinnyi 28 azakuramo abo azifashisha ku mikino yo gushaka itike y’Igikombe cya Afurika cya 2027, kizabera muri Tanzania, Kenya na Uganda.

Mu ijoro ryo kuri uyu wa kabiri, tariki ya 8 Nzeri 2026, Ishyirahamwe ry’Umupira w’Amaguru (FERWAFA) ryashyize uru rutonde rugaragaraho Niyomugabo Claude udafite ikipe. Ni mu gihe rutagaragaraho Hakim Sahabo ukinira AEK Athens yo mu Bugereki, na Manzi Thierry utarabona ikipe.

Mu bahamagawe harimo abanyezamu bane. Abo ni Niyongira Patient (Police FC), Hakizimana Adolphe (APR FC), Ntwari Fiacre (Kruger UTD) na Mugisha Yves (Rayon Sports). Kwizera Olivier udafite ikipe ntarimo.

Abakina mu mutima w’ubwugarizi ni Mutsinzi Ange (Zira FK), Niyigena Clement (Smouha SC), Kavita Phanuel (Birmingham Legion) na Nkulikiyimana Nganji Darryl (Standard Liege).

Abandi bahamagawe harimo Imanishimwe Emmanuel (Chennaiyn FC), Mickels Leroy (Waldhof Mannheim), Emeran Noam (FC Stade Lousanne Ouchy), Niyomugabo Claude, Kwizera Jojea (Rhode Island FC), Byiringiro Jean gilbert (APR FC), Uwumukiza Obed (Rayon Sports) na Mugisha Gilbert (Jwaneng Galaxy).

Abakina mu kibuga hagati ni Mugisha Bonheur (AL Hazem), Bizimana Djihad (CS Constantine), Gueelette Samuel (UTA Arad), Hamis Hakim (Kiyovu SC), Nsanzimfura Keddy (Kiyovu SC) na Muhire Kevin (Jamus FC).

Abataha izamu ni Nshuti Innocent (AL Wafaq Ajdabia), Mbonyumwami Taiba (Ethiopian Coffee SC), Biramahire Abeddy (AL BATIN FC), Mickels Joy Lance (Sabah FK), Uwiyaremye Fidal (APR FC), Mickles Slayd (Hibernians).

Amavubi azatangira urugendo rwayo ku wa 25 Nzeri 2026, ubwo azaba yakiriye Liberia. Nyuma y’iminsi ine gusa, ku wa 29 Nzeri 2026, Amavubi azafata urugendo rwerekeza i Praia muri Cap-Vert, aho azakinira umukino wa kabiri w’itsinda.

Cap-Vert ni imwe mu makipe akomeye yo muri iri tsinda, aho iheruka mu Gikombe cy’Isi cya 2026 ku nshuro ya mbere mu mateka yayo, isezererwa na Argentine muri 1/16.

U Rwanda rufite intego yo gusubira mu Gikombe cya Afurika nyuma y’igihe kinini rutagaragara muri iri rushanwa. Inshuro rukumbi Amavubi yaryitabiriye ni mu 2004 ubwo ryaberaga muri Tunisia.

Imikino yo gushaka itike ya CAN 2027 izahuza amakipe 48 yashyizwe mu matsinda 12 agizwe n’amakipe ane muri buri tsinda.