Amatsinda y’Ubumwe n’Ubwiyunge yakuye isomo ku Rwibutso rwa Jenoside rwa Kigali

  • NTAWITONDA JEAN CLAUDE
  • Gicurasi 3, 2022
  • Hashize imyaka 2
Image

Abaturage batuye mu Murenge wa Masaka mu Karere ka Kicukiro mu Mujyi wa Kigali bibumbiye mu Matsinda y’Ubumwe n’Ubwiyunge, bavuze ko hari byinshi bigiye ku Rwibutso rwa Jenoside rwa Kigali ruherereye ku Gisozi mu Karere ka Gasabo.

Babitangaje kuri uyu wa 03 Gicurasi 2022, ubwo basuraga Urwibutso rwa Jenoside rwa Kigali ruruhukiyemo abasaga 250,000 bishwe muri Jenoside yakorewe Abatutsi.

Aya matsinda yahurijwe hamwe n’Umuryango Rabagirana Ministries mu rwego rwo gufasha mu isanamitima.

Kimitsinga Théodosie utuye i Rusheshe mu Murenge wa Masaka, avuga ko Jenoside yakorewe Abatutsi yamutwaye Se umubyara, basaza be na mukuru we.

Nyuma yo gusura Urwibutso rwa Jenoside rwa Kigali, yagize ati: “Isomo mpakuye ni uko ibyabaye bitazongera, ikindi ni uko nabonye ifoto ya Papa nkahita nibuka ahantu bari baramutabye kuko bamaze kumwica baramuduteruje tumushyira ahantu mu muringoti”.

Avuga ko Se umubyara ashyinguye mu Rwibutso rwa Jenoside rwa Kiziguro ariko ngo yabonye ifoto ye bwa mbere mu Rwibutso rwa Jenoside rwa Kigali, ahita amwibuka.

Yongeraho ko umuryango we wari warabuze aho wabona ifoto y’umubyeyi wabo ariko ko ayibonye mu rwibutso rwa Gisozi.

Avuga ko Rabagirana Ministries yabafashije mu bikorwa by’isanamitima nko kwegerana na bagenzi babo badahuje amateka.

Abayobozi ba Rabagirana Ministries n’abagize amatsinda y’ubumwe n’ubwiyunge bo mu karere ka Kicukiro bunamiye Abatutsi bashyinguye mu rwibutso rwa Gisozi (Foto Kayitare J.P)

Ati: “Kabone nubwo twaba duhuje amateka cyangwa tutayahuje, kugenda twegerena rimwe na rimwe tunaganira tunahuje ibitekerezo bigenda birushaho gusana imitima yacu tukumva turi kumwe n’abandi”.

Dushimirimana Olive, umwe mu rubyiruko rwasuye urwibutso rwa Jenoside yakorewe Abatutsi rwa Gisozi, avuga ko yavutse nyuma ya Jenoside yakorewe Abatutsi.

Ati: “Ndasaba urubyiruko guhuriza hamwe imbaraga tugakumira ibi bintu ntibizongere kuba kuko ndabona ari ibintu biteye ubwoba cyane. Nabonye uko abantu bagiye babica nabi mbese ukabona ko bidasanzwe, biteye ubwoba”.

Mukunzi Louange, Umuyobozi uhagarariye Umuryango ‘Rabagirana Ministries mu Rwanda, asobanura ko bafashe bamwe mu bagize amatsinda y’ubumwe ngo basure Urwibutso rwo ku Gisozi kugira ngo barebe ibyo bigishwa.

Yabwiye Imvaho Nshya ko basuye Urwibutso rwa Jenoside rwa Kigali kugira ngo bashobore kwigira ku byabaye bityo bagende babibwire abandi.

Mukunzi yavuze ko gusura urwibutso bifasha mu isanamitima ariko ko hari n’uwagaragaye mu bo bazanye, witabiriye gahunda zo kwibuka cyangwa izo gusura urwibutso.

Ati: “Harimo umumama umwe wigeze kuvuga ngo sinajya kwibuka kubera ko yarokokeye ku mugabo arangije aramubohoza. Urumva ko kujya kwibuka kuri we biba bimeze nko kwihimura kuri uwo mugabo wamuhishe. Kuko baje ari amatsinda y’ubumwe yavuze ati reka nanjye ngende, urumva ko kuza hano byamugiriye umumaro kandi yabohotse”.

Ubuyobozi bwa Rabagirana Ministries butangaza ko urugendo rw’isanamitima rutajya rurangira badasuye inzibutso zitandukanye mu Rwanda.

Nyuma y’ibyo Rabagirana Ministries yigisha inereka abantu amateka agaragara nko gusura inzibutso.

Hari amatsinda agera kuri 14 mu Mudugudu wiswe ‘Ubumwe Village’. Buri tsinda rigizwe n’abantu 40 kandi ubukangurambaga ngo buracyakomeje hibandwa ku rubyiruko. 

Kimistinga Theodosie yaruhutse umutima nyuma yo kubona ifoto ya Papa we mu Rwibutso rwa Jenoside rwa Kigali (Foto Kayitare J.P)
  • NTAWITONDA JEAN CLAUDE
  • Gicurasi 3, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE