Amasomo Minisitiri Dr Utumatwishima  yigiye kuri  Perezida Kagame

  • KAMALIZA AGNES
  • Mutarama 25, 2024
  • Hashize ukwezi 1
Image

Minisitiri w’Urubyiruko n’Iterambere ry’Ubuhanzi Dr Utumatwishima Abdallah, yavuze ko Perezida wa Repubulika y’u Rwanda Paul Kagame yamwigishije amasomo menshi arimo  atatu y’ingenzi nko; kwiyoroshya, gucunga neza amarangamutima, icyizere n’imbabazi.

Yabitangarije mu Nama y’Igihugu y’Umushyikirano ku nshuro yayo ya 19 ku wa 24 Mutarama 2024.

Minisitiri w’Urubyiruko n’Iterambere ry’Ubuhanzi ashimira Perezida wabakuye kure  akabagirira icyizere kandi ari abana bakuriye mu miryango ikennye, aho ubuzima ndetse no kwiga byari bigoye ariko ubu bakaba ari abayobozi.

Dr. Utumatwishima avuga ko yigiye kuri Perezida Paul Kagame amasomo akomeye, aho irya mbere ari ukwiyoroshya.

Ati: ”Isomo rya mbere ni isomo ryo kwiyoroshya, wenda abakuru baraza kunkosora amateka atubwira ko hano mu Rwanda ngo buri wa Gatatu nyuma ya saa sita habaga imyitozo yo kujya gusingiza uwari Perezida na nyina. Iyo turebye mu bindi bihugu hari ibyo tubona bidasanzwe iyo abayobozi bagiye kunyuraho. Nyakubahwa Perezida wa Repubulika ukuntu mwiyoroshya, twakwize uburyo natwe mu gihe tuzaba turi mu nshingano ari abato n’abakuru kwiyoroshya ku kigero mwiyoroshyamo”.

Yongeyeho ko n’iyo urubyiruko rugiye guhimba indirimbo Perezida abasaba gushyiramo igihugu ariko we ntibamushyiremo mu gihe urubyiruko rumugira Perezida wa koperative akagenda abyambaye.

Avuga ku  isomo rya kabiri ryo gucunga amarangamutima neza, Minisitiri Dr. Utumatwishima yagize ati: ”Dukurikije ibyo tubona abantu batuka u Rwanda, n’abantu batuka Nyakubwa Perezida wa Repubulika, ubundi dukurikije uburyo twiyizeye n’ingabo zacu, nk’ejo mwakatubwiye muti dukenyere tugende ariko igihe tuzaba dukomerewe natwe kera abantu tuzakomeze gucunga neza uko dukemura ibibazo nk’uko Perezida abikemura”.

Yongeyeho ko urubyiruko rwarakaye ku mbuga nkoranyambaga ku buryo iyo Perezida Kagame atanga uburenganzira rwari kugenda. Yashimye uburyo Perezida abyihanganira agakurikiza amategeko mpuzamahanga ndetse aboneraho no gusaba urubyiruko kumwigiraho.

Ku cyizere n’imbabazi, Minisitiri Dr. Utumatwishima yabuze ko Perezida Kagame ahorana icyizere n’imbabazi ku bantu bose bahabwa inshingano bagatangira kuzikoresha mu nyungu zabo. 

Ati: ”Muri iyi mirimo dukora, abenshi turakosa. Nababwiye aho duturuka hari igihe uvayo ufite inzara baguha ubuyobozi ukagira ngo aka kazi kazarangira n’igihugu kizarangira. Ubujura, ruswa, murabizi amakosa tujyamo Nyakubahwa, ariko muradufata mukaduhana bwacya mu gitondo mukamenya ko burya byari amateka mukatubabarira mukongera mukatugirira icyizere. Icyizere n’imbabazi mugira abantu bose tubafasha kuyobora twakize gukomeza kumva no kugirira icyizere abantu nubwo bakosa.”

Dr. Utumatwishima avuga ko Perezida yabigishije kutemera ikibi bashobora gukoreshwa n’uwo ari we wese.

Avuga ko bakuriye mu buzima bushaririye  kubera ubuyobozi bubi bwariho ndetse ko inzozi buri mwana yari afite ari ukubyuka basanga iwabo batagannye mu buhungiro kuko abantu bahoraga bahunga.

Ku bijyanye no kwiga ngo ntabwo umuntu yatekerezaga ko aziga amashuri makuru, kuko hariho abantu bemerewe kwiga abandi batabyemerewe.

Minisitiri yongeyeho ko muri icyo gihe bavugaga ko umurimo ari uguhinga ibindi ari amahirwe nta mwana w’umukene wabaga ukomeye.

Ati: ”Havugwaga ko umurimo ari uguhinga ibindi ari amahirwe! N’ubundi umurimo usanzwe ari uguhinga nta kibazo, ariko bavugaga ko ikigomba gutunga abantu ari uguhinga ubundi agategereza amahirwe kereka iwanyu hari umutegetsi cyangwa uri umukire; uri uwo mu Majyaruguru kugira ngo ube uri umukene ngo uzarote wakomeye ni inzozi bakujyana no kwa muganga!”

Yashimiye Perezida Kagame wagiriye icyizere urubyiruko kuko rwaturutse ahantu hagoye ndetse no mu buzima bushaririye, ariko ubuyobozi arangaje imbere bukaba butuma urubyiruko ruhabwa amahirwe rutigeze rutekereza.

  • KAMALIZA AGNES
  • Mutarama 25, 2024
  • Hashize ukwezi 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE