Amasomo Bwiza yakuye ku gukurira mu muryango w’Abaskuti

  • Imvaho Nshya
  • Gashyantare 18, 2024
  • Hashize amezi 2
Image

Kurengera ibinyabuzima ni itegeko rya gatandatu mu mategeko 10 agenga Abaskuti (scouts) ku Isi yose, ryafashije cyane umuhanzikazi Bwiza Emerence wakuriye mu mumuryango w’Abaskuti.

Ni muri urwo rwego, uyu muhanzikazi wamamaye ku izina rya Bwiza yifatanyije n’Umuryango w’Abaskuti mu Rwanda mu kwesa umuhigo wo gutera ibiti by’imbuto 200 000 mu gihugu hose, hagamijwe kurushaho kubungabunga urusobe rw’ibinyabuzima.   

Ni nyuma y’aho Umuryango w’Abaskuti mu Rwanda wasinyanye amasezerano y’umwaka umwe ashobora kongerwa yo gutera ibiti by’imbuto n’inzu itunganya umuziki KIKAC ikanafasha Bwiza.

Ayo masezerano yasinywe ku wa 16 Gashyantare 2024, hagati y’uyu Muryango n’ubuyobozi bwa KIKAC buhagarariwe na Uhujimfura Jean Claude.

Iki kikaba ni igikorwa cyatangije ibikorwa by’icyumweru cya Giskuti cyatangirijwe mu Karere ka Burera tariki ya 17 Gashyantare 2024 kikazasorezwa kuri Sitade y’Akarere ka Muhanga ku wa 25 Gashyantare 2024.

Umuhanzikazi Bwiza, yabwiye Imvaho Nshya ko yakuriye mu muryango w’Abaskuti akabona agomba gukora inshingano zo kurengera ibimera n’inyamaswa nk’uko biteganywa n’itegeko rya 6 ry’Abaskuti.

Yagize ati: “Njyewe nakuriye mu Muryango w’Abaskuti umpa ubumenyi bwo kurinda urusobe rw’ibinyabuzima nk’uko itegeko rya 6 ridusaba kubahiriza ibidukikije no kurengera ibimera n’inyamswa. Numva natanga umusanzu ku gihugu cyanjye niyemeza ko nzagerageza gufasha imiryango itandukanye kugira nibura igiti kimwe ku rugo cyafasha no kuzamura imibereho y’imiryango harimo no kurwanya imirire mibi n’igwingira.”

Itegeko rya 6 ry’Abaskuti rigaruka ku kugira ubuntu, rigira riti: “Fata abandi uko ushaka ko nawe bagufata. Ntukababaze cyangwa ngo wice ikinyabuzima nta mpamvu ifatika ihari.”

Komiseri w’Umuryango w’Abaskuti mu Rwanda Uzabumugabo Virgile, avuga ko bashimishijwe no gukorana n’umwe mu barerewe mu muryango w’Abaskuti bakunze umuryango.

Yasabye n’abandi Baskuti aho bari mu Rwanda kuza bagakorana bagafasha urubyiruko rw’u Rwanda kwiteza imbere mu mikorere izana ubukungu no kuzamuka mu bwenge.

Yavuze ko 95% by’ibiti bizaterwa bifuza ko byakwitabwaho n’abana b’Abaskuti kugira ngo bibungabungwe ndetse binatange icyizere cyo gutanga umusaruro byitezwweho nko kurwanya imirire mibi mu miryango no gusagurira amasoko.

Umuyobozi wa KIKAC Uhujimfura Jean Claude avuga ko aya masezerano azamara umwaka umwe ashobora kwiyongera hagamijwe kurinda ibidukikije no gufasha Abaskuti n’abandi kuzirikana akamaro ko kurengera ibidukikije ku buzima bwabo.

Yagize ati: “Aya masezerano azamara umwaka ariko ashobora kwiyongera bitewe n’imikoranire yacu n’uyu Muryango wareze umuhanzikazi Bwiza dukorana, waje afite gahunda yo gutera nibura igiti kimwe ku muryango hanarwanywa imirire mibi n’igwingira. Ariko tukibutsa abantu ko ibidukikije bifatiye runini igihugu cyacu kandi ibi biti tuzatera bizanafasha mu kurwanya isuri muri rusange.”

Icyumweru cy’Ubuskuti cyatangijwe gifite insangamatsiko igira iti: “Muskuti gira uruhare mu kwimakaza ubufatanye bugamije imbere heza.”

Ni icyumweru kizibanda ku bikorwa birimo gutera ibiti, ibiganiro bigamije kwimakaza amahoro no kwihanganirana, uburinganire n’ubwuzuzanye, ubukangurambaga ku buzima bwo mu mutwe, no kugira uruhare mu kubungabunga urusobe rw’ibinyabuzima.

Hazatangwa kandi ibiganiro ku bumwe n’ubudaheranwa mu rubyiruko n’uburere mboneragihugu, kurwanya ikoreshwa ry’ibiyobyabwenge no kwipimisha ku bushake virusi itera SIDA.

Umuryango w’Abaskuti mu Rwanda ufite abanyamuryango bagera ku bihumbi 50 ariko ku rwego rw’Isi habarurwa abasaga miliyoni 57 bari mu bihugu 174, aho urubyiruko ruri hagati y’Imyaka 5 na 25 ari bo Baskuti naho abayirengeje bakaba abarezi n’abajyanama b’abato.

  • Imvaho Nshya
  • Gashyantare 18, 2024
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE