Amasoko ya Leta yihariye 25,2% mu makosa y’imicungire mibi y’umutungo

  • ZIGAMA THEONESTE
  • Ugushyingo 24, 2023
  • Hashize amezi 6
Image

Ubusesenguzi bwakozwe n’Umuryango urwanya Ruswa n’Akarengane Transparency International Rwanda (TI-RW), kuri Raporo y’Umugenzuzi Mukuru w’Imari ya Leta y’umwaka wa 2021 – 2022, igaragaza ko imitangire y’amasoko ya Leta hakirimo ikibazo gikomeye ku buryo yihariye 25,2% y’amakosa yose yo kudakoresha neza umutungo n’imari bya Leta.

Muri iri sesengura TI Rwanda yagaragaje ko amakosa akorwa mu mitangire y’amasoko ya Leta, yiganje cyane gutinda guhemba ba rwiyemezamirimo bakayata, gutinda gutegura masoko kandi hamwe bigakorwa binyuranyije n’amategeko, gutanga isoko hatabanje gukorwa ubugenzuzi n’ibindi.

Ni isesengura TI Rwanda yashyizwe ahagaragara, i Kigali kuri uyu wa Gatanu tariki ya 24 Ugushyingo 2023.

Ubu busesenguzi bugaragaza ko mu mwaka wa 2021 – 2022, amakosa ajyanye no kudacunga neza umutungo n’imari bya Leta hakurikijwe amategeko n’amabwiriza yiyongereye cyane.

Ni mu gihe amakosa ashingiye ku gukoresha amafaranga yo yagabanyutse ku kigero cya 75%, afite agaciro ka miliyari 5.27 z’amafaranga y’u Rwanda (Frw)  avuye kuri miliyoni 21.01(Frw)   mu mwaka w’ingengo y’imari wabanje (2020/2021).

Ubu busesenguzi bwibanda kuri raporo z’uturere n’Umujyi wa Kigali TI-RW ikaba ibukora buri mwaka guhera muri 2008.

Umuyobozi Nshingwabikorwa w’Umuryango urwanya Ruswa n’Akarengane mu Rwanda TI-Rwanda, Apollinaire Mupiganyi, yashimangiye ko hakwiye kunozwa ubufatanye n’inzego zindi zigira aho zihurira n’imicungire y’umutungo n’imari bya Leta mu kurushaho kongera ikigero inama zishyirwaho mu bikorwa kandi ko hakwiye kongerwa imbaraga mu kugabanya imishinga ihombera Leta.

Yagize ati: “Nubwo hari intambwe ikomeye yatewe, ariko bigaragara ko Leta igitakaza byinshi harimo ibikorwa remezo byubatswe ariko bitabyazwa umusaruro, ibitabwa bituzuye cyangwa bikadindizwa na ba rwiyemezamirimo ndetse n’ibiba bitujuje ubuziranenge”.

Mu mwaka wa 2021/2022, kandi, amakosa yo gukoresha umutungo n’imari bya Leta mu buryo budafitiwe ibisobanuro (nta mpapuro zibisobanura) yaragabanyutse na yo ku kigero cya 75%.

 Muri rusange amakosa ashingiye ku kutubahiriza amategeko n’amabwiriza abarirwa agaciro gasaga Miliyari FRW 1.924.

Muri ako gaciro, kudafata neza imitungo y’Uturere n’Umujyi wa Kigali byihariye nibura 60% aho bibarirwa agaciro k’asaga miliyari 1.172 y’amafaranga y’u Rwanda.

Ubwo busesenguzi bugaragaza ko imishinga y’ubwubatsi no gusana ibikorwa remezo birimo iby’imihanda, amazi n’amashuri biza ku isonga mu mishinga itakazwaho amafaranga menshi.

Ibikoresho cyangwa ibikorwa remezo byubatswe ariko bidakoreshwa na byo bibarirwa agaciro ka miliyari 3.5 z’amafaranga y’u Rwanda bivuye kuri miliyari 9.42 z’amafaranga y’u Rwanda mu mwaka wa 2020 – 2021.

Ku rundi ruhande, muri bimwe byakozwe byo gushimwa, harimo igabanyuka ry’imishinga n’ibikorwa bisigwa bitujujwe na ba rwiyemezamirimo aho byavuye ku gaciro ka miliyari 95.4 z’amafaranga y’u Rwanda mu 2019 – 2020 na miliyari 35.2 z’amafaranga y’u Rwanda mu 2020 – 2021 bikagera kuri miliyari 24.44 z’amafaranga y’u Rwanda mu mwaka wa 2021 – 2022.

Icyakora TI-RW igaragaza ko imishinga yashowemo imari n’Uturere ntibyare umusaruro, agaciro kayo kariyongereye kagera kuri miliyari 11.48 kavuye kuri miliyari 5.015 z’amafaranga y’u Rwanda mu 2020 – 2021.

Umuyobozi Mukuru muri Minisiteri y’Ubutegetsi bw’Igihugu ushinzwe ubukangurambaga n’urubyiruko rw’abakorerabushake Richard Kubana,  agaragaza nk’inzego bagiye gusuzuma ahari amakosa yo gucunga nabi imari n’umutungo by’igihugu agakosorwa hongerwa imikoranire y’inzego bireba.

Yagize ati: “Twasanze harimo byinshi twakwigiramo nk’Inzego z’ibanze, iyo duhuje imbaraga abikorera n’inzego za Leta birashoboka”.

Twasanze guha umuntu kubaka ibikorwa remezo hagomba kubaho imikoranire n’inzego zose kandi icyangombwa kurushaho ni ugukora tugahura buri mwaka yaba Minisiteri yaba Uturere, yaba Umujyi wa Kigali, kugira ngo turebe aho bitagenda hakaba hamenyekana, hagakosorwa”.

Ibyavuye muri ubu busesenguzi, bigaragaza ko mu byifuzo- nama byose 1,615 Umugenzuzi Mukuru w’Imari ya Leta yahaye Uturere n’Umujyi wa Kigali, nibura 49.4% byari byoroshye cyane gushyirwa mu bikorwa. 23.9% biroroshye, 13.5% biri ku kigero kiringaniye, 10.5% birakomeye naho 2.7% y’ibyo byifuzo birakomeye cyane kubishyira mu bikorwa.

  • ZIGAMA THEONESTE
  • Ugushyingo 24, 2023
  • Hashize amezi 6
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE