Amashirakinyoma ku nzu bivugwa ko ari iya Bamporiki yatangiye gusenywa 

  • KAYITARE JEAN PAUL
  • Mutarama 16, 2024
  • Hashize amezi 2
Image

Ku gicamunsi cyo kuri uyu wa Kabiri tariki 16 Mutarama 2024 ku mbuga nkoranyambaga hasakaye amashusho y’inzu bivugwa ko ari iya Bamporiki irimo gusenywa.

Ni inzu iherereye mu Mudugudu wa Radari, mu Kagari ka Busanza, mu Murenge wa Kanombe mu Karere ka Kicukiro mu Mujyi wa Kigali.

Inzu ya Kompanyi yitwa Nyungwe House Ni Iwacu Gakondo Ltd ihagarariwe na Mike Karangwa, bivugwa ko yagurishijwe umuntu utuye mu mahanga ariko ngo ntarakorerwa mitasiyo.

Imvaho Nshya yamenye ko uwaguze iyo hoteli byavuzwe kenshi ko ari iya Bamporiki, yashakaga kuyihindura ikagirwa ibitaro ariko ko Umujyi wa Kigali utari wamusubiza.

Mu gihe bimeze bityo, Mike Karangwa uhagarariye Nyungwe House Ni iwacu Gakondo Ltd yahise atangira kongeraho inyubako zitasabiwe uruhushya. 

Ku rubuga rwa X rwahoze ari urwa Twitter rukoreshwa n’uwitwa Mike Karangwa, yagize ati “Zimwe mu nyubako za Hotel Nyungwe za bwana Bamporiki ziri gusenywa mu Busanza”. 

Imvaho Nshya ntiyashoboye kuvugana na Karangwa uhagarariye iyo kompanyi kuko telefoni ye atayifata, ntarasubiza ubutumwa bugufi yandikiwe.

Ibaruwa Imvaho Nshya ifitiye kopi yanditswe tariki 05 Mutarama 2024 n’Umujyi wa Kigali, igaragaza ko hari inyubako nshya yongewe kuri iyo hotel itabifitiye uruhushya.

Urwandiko rwandikiwe Umuyobozi wa Nyungwe House Ni iwacu Gakondo Ltd, rugaragaza ko inyubako zirimo gusenywa zubatswe mu buryo butubahirije ibiteganywa n’amabwiriza ajyanye n’imitunganyirize y’Imijyi n’imyubakire.

Amabwiriza avuga ko iyo wubatse ibintu by’akajagari usabwa kubikuraho, utabikuraho inzego zibishinzwe zikabikuraho, ukazirengera ikiguzi cyabyo. 

Ubugenzuzi bwakozwe tariki 03 Mutarama 2024 bushimangira ko hari ibitari bisanzwe ku nyubako byongeweho nta ruhushya.

Ba nyiri hoteli basabwe guhagarika imirimo yose y’ubwubatsi kandi banikuriraho inyubako nshya zose zongeweho mu gihe kitarenze iminsi Itatu.

Umujyi wa Kigali wafashe umwanzuro wo kuvanaho akajagari kandi ikiguzi cyabyo kikazishyurwa na ba nyiri Kompanyi.

Inyubako yatangiye gusenywa
  • KAYITARE JEAN PAUL
  • Mutarama 16, 2024
  • Hashize amezi 2
TANGA IGITEKEREZO
Muhawenimana Valens says:
Mutarama 16, 2024 at 8:30 pm

Ok

Andika igitekerezo

AMATEGEKO AGENGA IYANDIKA RY'IGITEKEREZO CYAWE