Amanegeka si inzu, si karitsiye- Minisitiri Kayisire

  • Imvaho Nshya
  • Kanama 21, 2023
  • Hashize amezi 9
Image

Abantu benshi iyo bumvise ahantu hiswe amanegeka bumva ari ahantu hahanamye, cyangwa hegereye ku manga, bikaba bigorana akenshi iyo uwari umaze ahantu atuye imyaka irenga 20 abwiwe ko ari mu manegeka kandi agasabwa kwimuka.

Hari bamwe banga guhita bimuka bavuga ko aho bakuriye bakahasazira nta kibazo bahabona, ariko abahanga mu bijyanye n’imicungire y’ibiza bemeza ko aho umuntu yari asanzwe afitiye umutekano hashobora guhinduka amanegeka kubera impinduka zinyuranye zirimo no kuba abamuzengurutse barushaho kwiyongera.

Nk’uko bitangazwa na Minisitiri ushinzwe Ibikorwa by’Ubutabazi Madamu Kayisire Marie Solange, ahantu hitwa amanegeka kuko hashyira ubuzima bw’abantu mu kaga kandi ngo haba harimo ibice byinshi.

Yavuze ko amanegeka atari karitsiye runaka cyangwa inzu umuntu atuyemo ahubwo ngo wabitekereza ku miterere y’aho atuye, ku bishobora kuhototera, ku myubakire cyangwa imiterere y’ibikorwa remezo bihajya birimo n’inzu z’abaturage, ariko n’uburyo ibihe bigenda bihinduka.

Yatanze urugero agira ati : ” Umuntu ashobora gutura ahantu imyaka 20 ariko bigahinduka kuko abaturage biyongereye, ibikorwa bihakorwa byiyongereye, hanyuma bikazatinda bimwototera bishyira ubuzima bwe mu kaga. Ubwo rero tuvuga hafi y’imigezi, mu manegeka akomeye, ahantu hari ubuhaname bukomeye, ariko binajyana n’uburyo iyo nzu yubatse. Kuko hari abantu bubaka ku misozi ariko bijyanye n’iyo misozi. Hari abantu bubaka ahantu ubona hatoroshye ariko bakabyubaka mu buryo bujyanye n’iyo miterere.”

Yavuze ko iyo aho umuntu yari atuye hahindutse ahashyira ubuzima bwe mu kaga bigoye kuba utabibona, ariko ngo bikajyana n’imyumvire y’umuntu kuko hari abagira ubushishozi mu gihe abandi bo babona ntacyo bibatwaye kugeza igihe ibiza biziye bikabasenyera cyangwa bikagira abo bitwarira ubuzima.

Ati : “Urumva umuntu yatuye ahantu, yarahakuriye, ba se na ba sekuru barahabaye, gusubira inyuma ngo avuge ati aha hantu ntabwo nahaba, bisaba kuba babyumvise. Ariko ni cyo tuberaho nk’ubuyobozi, nka Leta, ni ugukomeza tubabwira ko aho hantu batuye amazi atakiri ya yandi.”

Gusa yakomeje avuga ko hari n’uburyo umuntu wugarijwe n’amanegeka ashobora gufashwa akahatura igihe bigaragara ko bidakabije, ari byo bita “adaptation” aho hashobora kugira ibikorwa bikorwa ahantu runaka bigakura ba baturage mu manegeka.

Aho ni ho yahereye agira ati : “Amanegeka si quartier, amanegeka si inzu, amanegeka ni ibyo byose navuze. Reka tuvuge utuye ahantu, murabizi iyo baca umuhanda bakata umusozi. Wari utuye ahantu hari umusozi udakase bataranyuzamo umuhanda, noneho icyo cyo gukata umusozi gishobora gutuma umuntu wari uhatuye ajya mu manegeka kubera ko icyafataga uwo musozi cyacitsemo kabiri.

Abaturage bagorwa no guhindura imyumvire igihe aho bamenyereye babwiwe ko hashyira ubuzima bwabo mu kaga

Urumva ko si karitsiye, si n’inzu ahubwo ni ikintu cyabaye cyatumye aho hantu hatakiri aho guturwa. Hari abantu bagera ahantu bakahatura mbere, ibikorwa bakoze bikaba ari ibikorwa biri hasi cyane, uko abantu bagenda babatura haruguru, baboherezaho amazi, bikaba amanegeka.”

Gusa ku rundi ruhande ngo haari n’abantu batura mu manegeka bahabona ko hashyira ubuzima bwabo mu kaga. Abo barimo aburira umusozi cyangwa bagatura mu bishanga.

Abagituye mu manegeka bashobora kwibasirwa n’imvura y’Umuhindo

Amakuru atangazwa n’Ikigo cy’Igihugu cy’Iteganyagihe (Meteo Rwanda) agaragaza ko hateganyijwe “El Niño” mu mpera za 2023 ishobora gutuma hagwa imvura nyinshi mu Muhindo.

Buri wese akaba akwiye kwitegura hakiri kare, agakurikiza ingamba zihari zo gukumira no kugabanya ingaruka ziterwa n’ibiza bishobora guturuka kuri iyi mvurra.

Nk’uko bikomeza bitangazwa n’icyo kigo, igihe cy’impeshyi, aba ari igihe cyiza cyo gukumira ingaruka z’ibiza bishobora kuzaterwa n’imvura y’umuhindo, akaba ari ngombwa gukaza ingamba zo gukumira ibiza zirimo kuzirika ibisenge by’inzu ku buryo bihuzwa n’inkuta, ibiti bifashe igisenge na byo bikazirikwa neza kuri mwikorezi, hakoreshejwe imikwege yabugenewe n’imisumari.

Kurinda inzu kwinjirwamo n’amazi zizengurutswa fondasiyo zikomeye, guhoma ibibambasi, kuzishyiraho imireko n’imiyoboro y’amazi, kubaka muri site zagenewe imiturire abantu bakimuka mu manegeka.

Gusaba inzu zishaje n’izangiritse, gusibura inzira z’amazi, kurwanya isuri birimo guca no kurwanya isuri mu mirima, gufata ubwishingizi bw’ibikorwa by’ubuhinzi n’ubworozi nabyo ni ingenzi kuko bigoboka uwabufashe mu bihe by’amage.

Minisiteri ishinzwe ibikorwa by’Ubutabazi itangaza ko mu myaka 5 ishize abasaga 1 200 bishwe n’ibiza  by’inkangu, imyuzure, inkuba n’ibindi. Inzu zisaga ibihumbi 40 zarasenyutse, hangirika ibikorwa remezo bitandukanye birimo imihanda, amashuri n’ibindi.

Yanditswe na NYIRANEZA JUDITH

  • Imvaho Nshya
  • Kanama 21, 2023
  • Hashize amezi 9
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE