Amakoperative ahombywa n’ubumenyi buke no kuba ntawuyashinzwe ku Murenge

  • NSHIMIYIMANA FAUSTIN
  • Mutarama 18, 2024
  • Hashize amezi 4
Image

Mu gihe abanyamuryango b’amakoperative mu Karere ka Rwamagana bavuga ko ubumenyi buke bw’abayobora amakoperative bigira ingaruka ku micungire y’imitungo, bikaba bidindiza iterambere ryabo ndetse bigateza n’igihombo, bifuza ko bajya bahabwa amahugurwa.

Abanyamuryango b’amakoperative bagaragaza ko ubumenyi buke bw’abayayobora biteza ibibazo birimo gusesagura umutungo wa koperative no kudafasha abanyamuryango kugerwaho n’amakuru y’uburyo bwo guhanga imirimo, abayobozi bafata ibyemezo bitabanje kwemezwa n’Inteko rusange y’abanyamuryango n’ibindi bikorwa bituma habaho ibihombo.

Singayumukiza Emmanuel yavuze ko ibiranga akajagari k’abayobozi b’amakoperative usanga komite ngenzuzi n’inama y’ubuyobozi batazi inshingano zabo bakaba basohora umutungo mu buryo butemewe n’amategeko agenga umutungo w’amakoperative ukarangira nta kintu gifatika koperative igezeho.

Yagize ati: “Mu kudasobanukirwa imikorere y’imicungire y’amakoperative bivamo ibibazo byo kudindiza amakoperative bitewe nuko hari abatabyaza umusaruro umutungo uhari kuko hari amakoperative abika akayabo k’amamiriyoni mu bigo by’imari ntibayafate ngo bigire hamwe umusaruro bashobora kuyabyaza ukazanira koperative inyungu. Mbona ibi byose biterwa no kudasobanukirwa n’ibyo bakora, akaba ari yo mpamvu bahawe ubumenyi bwisumbuye ku bwo basanganywe byazamura amakoperative.”

Umuyobozi wa koperative EjoHeza Rugende ihinga umuceri mu gishanga cya Rugende gihuriweho n’Akarere ka Rwamagana na Gasabo, Mukandayisaba Libertha yavuze ko mu bihe bya mbere amakoperative ashingwa bagiye bahomba kubera ubumenyi buke bw’imiyoborere ndetse n’imicungire.

Yagize ati: “Mu bihe bya mbere amakoperative ashingwa twagiye duhomba kubera ubumenyi buke bw’imiyoborere ndetse n’imicungire. Amahugurwa arakenewe kuko kwiga ni uguhozaho, birakwiye ko Leta yongerera abo mu makoperative amahugurwa kuko twagira koperative zubakitse kandi bya bihombo tujya tugira ntibyakongera kubaho.”  

Umuyobozi w’Akarere ka Rwamagana, Mbonyumuvunyi Radjab yasabye abanyamuryango b’amakoperative kujya bahitamo kuyoborwa n’inyangamugayo kuko hari abacungamari banyereza imitungo bari gukurikiranwa n’inkiko; dore ko hari n’abahamwe n’ibyaha ndetse no kujya bakurikirana umunsi ku munsi imicungire y’umutungo wa koperative.

Abanyamuryango b’amakoperative bifuza ko bakwegerezwa ushinzwe amakoperative ku Murenge

Meya yavuze ko bateganya gushyiraho umukozi ushinzwe amakoperative ku rwego rw’Umurenge uzajya ufasha mu guhugura no kongerera ubumenyi amakoperative.

Yagize ati: “Ubu Akarere katanze itangazo ry’akazi ndetse bamaze no kugasaba ku buryo muri uku kwezi kwa Mutarama dutanga ibizamini by’ushinzwe amakoperative uzajya muri buri Murenge akaba ashinzwe gukurikirana ubuzima bwa buri munsi bw’amakoperative no kuyongerera ubumenyi. Ubundi byakorwaga n’agoronome wenyine nk’ushinzwe ubuhinzi kuko umukozi ushinzwe amakoperative yabaga ku Karere gusa.”

RCA isaba Uturere gushyiraho uhagarariye amakoperative mu Murenge

Ikigo cy’Igihugu cy’Amakoperative gisaba Uturere gushyiraho ushinzwe amakoperative ku rwego rw’Umurenge kuko kuba adahari biri mu bituma abayobozi n’abanyamurayango  b’amakoperative batagira ubumenyi buhagije ku micungire y’amakoperative bikabateza igihombo.

Umuyobozi mukuru w’Ikigo gishinzwe guteza imbere amakoperative RCA, Dr Patrice Mugenzi yavuze ko aho abakozi batarajya bashinzwe gukurikirana amakoperative ku Murenge ari intege nke z’Uturere kuko ari umurongo wa Politiki y’Igihugu n’intego yo kugira amakoperative agamije impinduka mu bukungu n’imibereho y’abaturage yashyizweho muri Kanama 2018.

Yagize ati: “Binyuze muri Misiteri ifite mu nshingano Uturere ari yo MINALOC, twasabye ba Guverineri b’Intara na ba Meya ko Uturere twose twashyiraho abakozi bashinzwe amakoperative mu Mirenge kuko barakenewe kandi ni ingirakamaro mu iterambere ry’Akarere.”

Yasabye Uturere n’Intara kugenda bagashyiraho umukozi ushinzwe amakoperative mu Murenge akaba ari we uzajya akurikirana ibikorwa by’amakoperative no kuyahugura.

Politiki nshya iteganya impinduka zikenewe mu guteza imbere imiterere n’inzego by’amakoperative, ariko zigakorwa mu buryo butuma habaho iterambere ry’amakoperative kandi hakaba n’ibikorwa birebana n’iyo politiki bibumbiye muri gahunda yo gushyira mu bikorwa iyo politiki.

Mu Karere ka Rwamagana hari amakoperative 216 akora neza kandi ari mu Ikoranabuhanga ry’Imicungire yAmakuru yAmakoperative (Information Management System/CIMS) ya RCA muri 384 afite ubuzima gatozi. Abanyamuryango babarizwa mu makoperative ni 13,755 barimo abagabo 5,594 n’abagore 8,161.

  • NSHIMIYIMANA FAUSTIN
  • Mutarama 18, 2024
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE