Amakoperative abonwa nk’umusingi w’iterambere ry’u Rwanda

  • NTAWITONDA JEAN CLAUDE
  • Nyakanga 3, 2022
  • Hashize imyaka 2
Image

Ku wa Gatandatu, taliki 2 Nyakanga 2022; u Rwanda rwifatanyije n’Isi kwizihiza Umunsi Mpuzamahanga wahariwe Amakoperative, wizihijwe ku nshuro ya 100, wabereye mu Karere ka Muhanga ku rwego rw’Igihugu, hagaragajwe ko koperative ari umusingi w’iterambere ry’Igihugu.

Insanganyamatsiko y’uyu mwaka ikaba igira iti ‘Amakoperative yubaka Isi nziza’. Guverineri w’Intara y’Amajyepfo, Kayitesi Alice, yibukije ko koperative zicunzwe neza zizamura abanyamuryango.

Mu ijambo nyamukuru yagejeje ku bitabiriye ibi birori, Guverineri Kayitesi Alice yibanze ku gushima uruhare rw’Amakoperative mu guteza imbere Igihugu ndetse asaba abanyamuryango b’Amakoperative kurushaho gucunga neza umutungo wayo kuko iyo ucunzwe neza wunguka.

Ati: “Iyo koperative zicunzwe neza zirunguka …. Turifuza ko koperative zicungwa neza zikunguka, tuzirikana uruhare rw’amakoperative mu guteza imbere Abanyarwanda”.

Yongeyeho ko kwibumbira mu makoperative biteza Igihugu imbere. Ati: “Abanyamuryango mugomba gukorera mu mucyo. Turashimira uruhare rw’amakoperative mu giteza imbere Igihugu cyacu, akaba agaragara mu bikorwa by’amajyambere bifatika birimo kongera umusaruro uva mu buhinzi, kuzamura umusaruro mu byo twohereza hanze, guteza imbere urwego rwa serivisi, gutwara abantu n’ibintu, ubworozi n’ibibukomokaho, kubaka amasoko ya kijyambere,  guteza imbere ubukorikori, ubudozi n’ibindi”.

Yavuze ko imiyoborere myiza ifasha kwiteza imbere abantu bishyize hamwe mu makoperative. Imiyoborere ishyize imbere iterambere ry’Abanyarwanda twese binyuze mu makoperative.

Guverineri Kayitesi yagarutse ku nsanganyamatsiko y’uyu mwaka asobanura ko kugira ngo hubakwe Isi nziza bisaba gukora cyane, guhindura imikorere kurusha uko byakorwaga no kwirinda icyo ari cyo cyose cyasubiza inyuma urwego rw’amakoperative.

Yasabye abayobozi kuba intangarugero, gucunga neza amakoperative n’umutungo w’abanyamuryango ba koperative no kwirinda icyo ari cyo cyose cyatuma abanyamuryango banga cyangwa batishimira koperative zabo ndetse no kongera umubare w’abanyamuryango kugira ngo bifashe abaturage benshi gutera imbere binyuze muri koperative kuko abishyize hamwe nta kibananira kandi abashaka kugera kure bakorana n’abandi.

Yashimiye koperative zahize izindi ari ku rwego rw’Intara ndetse no ku rwego rw’Igihugu.

Umuyobozi Mukuru w’Ikigo cy’Igihugu cy’Amakoperative (RCA) Prof. Harelimana Jean Bosco, yagarutse ku nsanganyamatsiko avuga ko koperative zihindura Isi ikarushaho kuba nziza.

Umunsi Mpuzamahanga wahariwe amakoperative witabiriwe cyane ( Foto Nyiraneza J.)

Yagaragaje imibare ya za Koperative kugeza ubu zibarurwa mu Rwanda, hari koperative 10786 zikorera mu nzego zitandukanye z’ubukungu, zifite  abanyamuryango barenga gato miliyoni 5 n’ibihumbi 300 n’imari shingiro irenga gato miliyari 54 n’ibigo bicuruza imari 438 harimo 416 biri muri gahunda y’Umurenge SACCO.

Yagize ati: “Turishimira intambwe tumaze gutera urebye ku ishoramari riri mu makoperative, tukareba ku bwizigame buri mu makoperative, gufashanya, impinduka ziri mu buhinzi, mu bworozi, mu bucuruzi muri rusange, gufatanyiriza hamwe tugakora ibitagashobotse. Ni umujyo udasubira inyuma tuzakomeza gukorera hamwe”.

Umuyobozi Wungirije w’Akarere ka Muhanga ushinzwe ubukungu n’Iterambere Bizimana Eric, yashimiye kuba uwo munsi wizihirijwe mu Karere ka Muhanga akaba ari amahirwe azatuma amakoperative arushaho gukora neza. Yavuze ko afitiye abaturage akamaro kanini,  kuko abazamura ubwabo ndetse n’Igihugu mu guhanga udushya no guteza imbere Igihugu.

Yongeyeho ko mu gihe cya Covid-19 amakoperative yagobotse abanyamuryango bayo, akabaha ubwasisi.

Mukankusi Alphonsine wo muri Koperative IABM wavuze ahagarariye amakoperative, yavuze ko amakoperative yagize akamaro kanini cyane cyane abagore n’abakobwa bashimira Ubuyobozi bw’Igihugu bwashyigikiye amakoperative ndetse bugaha ijambo abagore kuko amakoperative yabagiriye akamaro cyane.

Ati: “Ndasaba abantu kwitabira amakoperative kuko kugeza ubu ni yo yubatse ingo zacu, ni yo atuma abana bajya ku mashuri, tubona inguzanyo tukajya mu dusanduku tw’amakoperative tutwunganira mu buryo bwo kwiteza imbere”.

Amakoperative yahize andi yashyikirijwe ibihembo

Ni ibirori byabanjirijwe n’imurikabikorwa by’amakoperative atandukanye, hanatangwa ibihembo ku makoperative yahize ayandi.

Mu Ntara y’Amajyepfo uyu mwaka ni ho hari koperative yahize izindi ku rwego rw’Igihugu ni koperative ABATERANINKUNGA ba Sholi, ikorera mu Murenge wa Cyeza mu Karere ka Muhanga yatangijwe n’abagore 30 none igeze ku banyamuryango 431 ihinga kawa ikayivana mu murima ikayigeza ku meza, ubu ifite igikombe cya 3 muri Afurika uyu mwaka. Ifite abakozi 205 ihemba. Yahembwe icyemezo cy’ishimwe, igikombe na miliyoni y’amafaranga y’u Rwanda.

Koperative yahize izindi ku rwego rw’Igihugu ni koperative ABATERANINKUNGA ba Sholi yahawe n’igihembo cya miliyoni (Foto Nyiraneza J.)

Mu Ntara y’Amajyaruguru koperative yahize izindi ni IAKIBU ikorera mu Karere ka Gicumbi ifite abanyamuryango 4004 ifite gahunda yo guteza imbere ubworozi by’umwihariko ifite amakusanyirizo y’amata 11. Yahawe igikombe, ibahasha y’amafaranga y’u Rwanda 500,000 n’icyemezo cy’ishimwe.

Koperative yahize izindi mu Mujyi wa Kigali ni koperative Umutima Cooperative igizwe n’abanyamuryango 20, ikora Ibikorerwa mu Rwanda (Made in Rwanda) kandi yahaye akazi abakozi bagera kuri 25 yanafatiye ubwishingizi bwo kwivuza muri RSSB. Bahawe icyemezo cy’ishimwe, igikombe n’ibihumbi 500.

Mu Ntara y’Iburengerazuba iyahize izindi ni koperative COOTHE MWAGA -GISAKURA ihinga icyayi, yashinzwe mu 1970, ifite abanyamuryango 697.

Mu Ntara y’Iburasirazuba koperative yahize izindi ni COPRORIKI Cyunuzi, ihinga umuceri ifite abanyamuryango 3981, ihuje Uturere twa Ngoma na Kirehe. Bafite ubwizigame burenze miliyoni 300. Bahembwe igikombe, icyemezo cy’ishimwe n’ibihumbi 500 by’amafaranga y’u Rwanda.

Koperative zo kubitsa no kugurizanya, iyahize izindi ni SACCO SERUKA Gisenyi ifite ubwizigame bungana na 1,243,867,334 yatanze inguzanyo zingana na 1,165,536, 684 n’abanyamuryango 14773. Nayo yahawe icyemezo cy’ishimwe, igikombe n’amafaranga y’u Rwanda ibihumbi 500.

Abayobozi batandukanye basuye imurikabikorwa ry’amakoperative (Foto Nyiraneza J.)
  • NTAWITONDA JEAN CLAUDE
  • Nyakanga 3, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE