Amakipe yo mu Rwanda azitabira irushanwa ryashibutse kuri COP28

  • SHEMA IVAN
  • Ukuboza 28, 2023
  • Hashize amezi 5
Image

Amakipe atandukanye yo mu Rwanda agoye kubona amahirwe yo kwitabira irushanwa “Eco Spart Cup” ryashibutse ku Nama ya 28 y’Umuryango w’Abibumbye yika ku Mihindagurikire y’Ibihe (COP28) yabereye i Dubai muri Leta Zunze Ubumwe z’Abarabu (UAE) hagati tariki ya 30 Ugushyingo kugeza ku ya 12 Ukuboza 2023.

Ni amakuru yamenyekanye nyuma y’uko Ikigo Eco Arts Rwanda gishyize umukono ku amasezerano cyagiranye n’Ikigo Creative Hub-UAE cyita ku Bidukikije cyo muri UAE.

Eco Arts Rwanda yatangiye gutegura gahunda kujyana amakipe n’abahanzi mu irushanwa rigamije guteza imbere umuco wo kwita ku bidukikije n’ubukerarugendo binyuze muri siporo n’ubuhanzi.

Irushanwa “Eco Spart Cup” rizajya rihuza amakipe yo mu bihugu bitandukanye, mu mikino irimo Basketball, umupira w’amaguru (Football), Volleyball, Handball n’uwa Cricket.

Iryo rushanwa kandi rizanahuza abahanzi, ababyinnyi ba gakondo n’abakoresha izigezweho, n’abanyarwenya.

Amasezerano y’imikoranire yasinyiwe mu Nama Mpuzamahanga yiga ku bijyanye n’Imihindagurikire y’ibihe [COP28] yabereye muri Leta Zunze Ubumwe z’Abarabu.

Iyi nama yahuje ibihugu bigize Umuryango w’Abibumbye, imiryango itegamiye kuri Leta, ibigo by’abikorera, ba rwiyemezamirimo n’abandi bose bakoresha ijwi ryabo mu kubungabunga ibidukikije.

Muri iyi nama, Eco Arts Rwanda ni bwo yemeje gukorana na Creative Hub-UAE mu gutegura irushanwa rizahuza amakipe atandukanye ndetse n’abahanzi baturutse mu bice binyuranye.

Mu bizagenderwaho mu guhitamo amakipe arimo ay’abagabo n’abagore, harimo kuba iyo kipe isanzwe ikora, kuba ifite ubushake bwo gukora ubukangurambaga ku ihindagurika ry’ibihe no kuba imaze hagati y’imyaka 10 na 20.

Biteganyijwe ko ibindi bizagenderwaho bizatangazwa bitarenze tariki 30 Ukuboza 2023.

Iri rushanwa riteganyijwe kubera mu Mujyi wa Sharjah muri Leta Zunze Ubumwe z’Abarabu, hagati ya tariki 24 na 28 Werurwe 2024.

  • SHEMA IVAN
  • Ukuboza 28, 2023
  • Hashize amezi 5
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE