Amajyepfo: Abasaga 90,000 bacukijwe ku kwishyurirwa Mituweli

  • Imvaho Nshya
  • Nyakanga 26, 2023
  • Hashize amezi 10
Image

Muri gahunda nshya yashyizweho yo kuba bamwe mu baturage batazongera kwishyurirwa na Leta umusanzu w’ubwisungane mu kwivuza, mu Ntara y’Amajyepfo abaturage 33 139  ni bo gusa bazishyurirwa mu gihe abasaga 90 000 bacukijwe kuko bageze ku rugero rwiza rw’iterambere. 

Ibi bishingiye ku kuba hari imiryango yageze ku gipimo gishimishije cyo kwikura mu bukene nk’uko byatangajwe na Guverineri w’Intara y’Amajyepfo, Kayitesi Alice.

Yabigarutseho mu kiganiro n’abanyamakuru, aho yagaragaje uko Intara y’Amajyepfo ihagaze mu nzego zitandukanye.

Mu rwego rw’ubuzima yavuze ko hari benshi bishyurirwaga Mituweli bacukijwe bageze ku kigero cyiza biyishyurira.

Yagize ati: “Mbere Intara y’Amajyepfo twari dufite abaturage 124 914 bari mu miryango 561 bishyurirwaga na Leta Mituweli, kuri ubu tuzishyurira gusa 33 139.”

Yavuze kandi ko umwaka wa 2022/23 washize Mituweli igeze kuri 98,2%.

Guverineri Kayitesi yasobanuye ko bamwe mu baturage bari batishoboye bagejejweho gahunda zitandukanye zibafasha kwikura mu bukene.

Ati: “Abaturage babaruwe bazafashwa  muri gahunda zo kwikura mu bukene  binyuze muri gahunda za Leta n’iz’abafatanyabikorwa ni  347 381.”

Igishimishije ni uko abo baturage bacukijwe mu kwishyurirwa Mituweli bageze ku kigero gishimishije, nta kibazo cyagaragayemo.

Guverineri Kayitesi yagize ati: “Icyo wenda navuga gishimishije kurushaho ni uko abacukijwe mu kwishyurirwa Mituweli kuri ubu bageze ku kigereranyo gishimishije bayiyishyurira. 

Nta kibazo bagize, twabanje gukererezwa n’uko sisitemu yatinze gufungura, ariko rwose barishyura neza, kugeza ubu nta bibazo bidasanzwe twari twakira”.

Intara y’Amajyepfo ifite ibitaro 14, ibigo nderabuzima 127 n’amavuriro y’ingoboka  299.

Yanditswe na NYIRANEZA JUDITH

  • Imvaho Nshya
  • Nyakanga 26, 2023
  • Hashize amezi 10
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE