Akarere ka Bugesera kagaragaje uko imibanire y’Abaturage ihagaze

  • KAYITARE JEAN PAUL
  • Ugushyingo 22, 2023
  • Hashize amezi 3
Image

Muri gahunda ya Guverinoma y’imyaka 7 kuva 2017 kugeza 2024 (NST1), mu nkingi y’imiyoborere hazongerwa imbaraga mu kwigisha indangagaciro z’umuco nyarwanda kugira ngo zikomeze kuba umusingi w’amahoro, ubumwe n’ubwiyunge.

Hazakomeza kwimakazwa ubumwe n’ubwiyunge mu Banyarwanda hashyirwa mu bikorwa gahunda ya “Ndi Umunyarwanda” n’iy’Abarinzi b’Igihango bizakorerwa mu Nzego z’ibanze.

Amatsinda y’Ubumwe n’Ubwiyunge azongerwa kandi agezwe ku rwego rw’Umudugudu.

Ibi bikorwa byose bizatuma igipimo cy’ubumwe n’ubwiyunge kizamuka kigere kuri 96% kivuye kuri 92,5%.

Mu kiganiro Mutabazi Richard, Meya w’Akarere ka Bugesera mu Ntara y’Iburasirazuba aherutse kugirana n’abanyamakuru yavuze ko uko imibanire y’abaturage muri aka Karere ihagaze.

Ati: “Abaturage babanye neza ndetse n’iyo twafata abakorewe Jenoside n’abakomoka mu miryango yayikoze naho turabona ubumwe bwabo bwarazamutse ku kigero gishimishije”.

Nubwo nta bushakashatsi bwihariye bwakozwe mu Karere ka Bugesera ku mibanire y’abahatuye ariko ngo iyo ubuyobozi burebeye mu mibanire no mu bibazo bwakira, busanga imibanire imeze neza. 

Ku rundi ruhande, Meya Mutabazi agaragaza ko hakiri imbogamizi zirimo iz’ibikomere bitari iby’umubiri ahubwo by’umutima kuko ngo abantu bose ntabwo barakira neza, baracyabana nabyo.

Ati: “Ahantu hari ibikomere, gutonekara ni ako kanya. Ibyo n’ibyo turebera hafi ariko indi mbogamizi ya kabiri ni uko hakigaragara ibikorwa by’ingengabitekerezo ya Jenoside yakorewe Abatutsi, nabyo utavuga ko ari byinshi”.

Mu bikorwa byo kwibuka Jenoside yakorewe Abatutsi mu 1994, haracyumvikana amagambo arimo ingengabitekerezo ya Jenoside.

Umwaka ku wundi ubuyobozi ngo buzakomeza kubikurikirana kugira ngo barebe ko yaranduka mu bantu.

Meya Mutabazi ati: “Ariko nta nubwo twakwizeza ko ingengabitekerezo yashira mu bantu hari izashirana na ba nyirayo nabo bashize”.

Hagiye kwandikwa igitabo cy’amateka y’u Bugesera

Ubuyobozi bumaze igihe bugaragaza ko hari igitabo kigiye kwandikwa kigaragaza amateka ya Jenoside yakorewe Abatutsi mu Karere ka Bugesera.

Ati: “Ni ubushakashatsi twakoze tubushyira no mu ngengo y’imari kugira ngo tumenye amateka byuzuye kuko hari ayo tuzi namwe muzi tugenda twumva ariko twashakaga uburyo bwo kuyandika kugira ngo urwo ruhererekane ruzahoreho”.

Haciye imyaka hafi 30 Jenoside ihagaritswe bivuze ngo n’abantu batanga ubuhamya n’abarokotse Jenoside bari bakuru muri icyo gihe, baragenda bakura.

Aha ni ho ubuyobozi bwa Bugesera buhera bugira buti “Ni ngombwa ko dukusanya byinshi dushobora kumenya, tukabyandika ari nacyo cyatumye dushyiraho iyo gahunda”.

Akarere ka Bugesera gatangaza ko gakomeje kwigisha abaturage gahunda z’ubumwe n’ubudaheranwa kugira ngo bakomeze gusigasira ibyiza bamaze kugeraho.

KAYITARE JEAN PAUL

  • KAYITARE JEAN PAUL
  • Ugushyingo 22, 2023
  • Hashize amezi 3
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE