Agahinda k’abaturage b’i Musanze bagejeje imyaka 30 batarabona indangamuntu

  • NGABOYABAHIZI PROTAIS
  • Gashyantare 16, 2024
  • Hashize amezi 2
Image

Bamwe mu baturage b’Akarere ka Musanze bahangayikishijwe no kuba barinze bageza ku myaka 30 batarabona indangamuntu, ubu bikaba bibagiraho ingaruka zirimo kugorwa no kubona serivisi zose zisaba irangamuntu nko kwivuza, iza banki n’izindi.

Bamwe mu bamaze gushinga imiryango bavuga ko n’abo babyaye babura uko bandikwa mu bitabo by’irangamimerere kuko n’ababyeyi babo usanga nta byangombwa bibaranga bafite.

Bavuga ko basiragiye ku gushaka indangamuntu bikarangira bahisemo kubyihorera nyuma yo gutakaza icyizere cyo kuyibona.

Muhawenimana Adelphine w’imyaka 28 mu Murenge wa Musanze, avuga ko yirukanse ku ndangamuntu abonye bitamworoheye ahitamo kubireka.

Yagize ati: “Maze imyaka 8 nshatse, irangamuntu nyirutseho imyaka isaga 10 nakomeje kujya nza kwifotoza bakambwira ngo ibyuma ni bike ngahitamo kinumira kuko nta muntu wakwirirwa hano ukwezi ngo gushire azagaruke. Nk’ubu ndatwite kugira ngo njye kwipimisha nk’umuntu utwite birangora; hari ubwo rero uhitamo kubyarira mu rugo kandi turi benshi nibongere abaza gufotora kuko usanga hari abantu benshi batagira irangamuntu.”

Mukamasabo Aline wo mu Murenge wa Kinigi we avuga ko afite imyaka 31, ngo kubera imirimo myinshi n’icyo we yita imyumvire mike yasanze kwirirwa yiruka ku indanamuntu ari ikibazo.

Yagize ati: “Kujya kubyara biba ari ntambara kuko nta hantu ngira nanditswe ku buryo najya muri gahunda ya Mitiweli. Nta konti ngira muri banki kuko nta ndangamuntu ngira mbese nta gahunda ya Leta navuga ko mbamo. Nawe se umuntu utatora, udashobora kuba nasezerana, urumva ndi hehe? Ubu mbyarira mu rugo Imana yakomeje kumba hafi.”

Muhawenimana avuga ko ku myaka ye 28 nta ndangamuntu agira

Habanabafite Eric w’imyaka 30 avuga ko yakomeje kwirukanka ku indangamuntu yagera aho agacika intege, ariko ngo atewe inkeke no kuba abayeho nta hantu na hamwe yanditswe mu irangamimerere nk’umuntu mukuru.

Yagize ati: “Byaje kugera aho nisanga nta hantu na hamwe banyandikishije mu gitabo cy’irangamimerere, mama ni we nzi gusa. Ubu yarapfuye muri uko gusiragira ku indangamuntu rero, no gushakisha ibimenyetso byemeza ko ari we wambyaye, naje kugwa ku ifishi yo gukingiza ni ho namenyeye uwambyaye n’igihe navukiye.”

Avuga ko yifuza kuzabona amatora ageze na we afite indangamuntu akabona uburenganzira bwo gutora nk’abandi. Ikindi kandi afite impungenge ko atayibonye vuba byazamugora gusezerana imbere y’amategeko.

Ati: “Ubu nashatse kujya mu gisirikare biranga nshaka no kurongora biranga kuko ntabwo nasezerana.”

Nteziryayo Epimaque Umukozi ushinzwe irangamimerere ku Murenge wa Musanze, avuga ko gukererwa gufata indangamuntu ukagera ku myaka 30 rimwe na rimwe biterwa  n’uburangare cyangwa izindi mpamvu zikomoka ku ku babyeyi.

Yagize ati: “Hari bamwe mu bana baba batabaruwe ariko batabizi, baza twabatuma ibyangombwa babibura bagahitamo kwicecekera. Abandi baba yenda batahutse, ikindi ni uko muri ibi bice bimwe byo muri aka Karere ka Musanze hari bamwe usanga batita ku bijyanjye n’indangamuntu nk’abashumba, abakozi bo mu rugo. Tubakangurira gufata indangamuntu ku gihe.”

Akomeza avuga ko nko kuri bariya bagore baba barageze ku myaka 35 batarabona indangamuntu iyo utwite atarigeze uyifata bahita bamubarura bakamuha inomero igaragaza ko ari muri gahunda y’indangamuntu agatwara iyo numero akajya kwa muganga bakamuvura.

Gusa na we ashimangira ko kutagira imashini zifotora muri buri Murenge na byo ari bimwe mu bidindiza itangwa ry’indangamuntu.

Itegeko riteganya ko Umunyarwanda afata irangamuntu ku myaka 16.

Umukozi ushinzwe irangamimerere mu Murenge wa Musanze
Umurongo aba ari munini ku baje gufata indangamuntu
  • NGABOYABAHIZI PROTAIS
  • Gashyantare 16, 2024
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE