Agaciro k’ibyo u Rwanda rwohereje mu mahanga kagabanyutseho 8.7%

  • KAYITARE JEAN PAUL
  • Gashyantare 22, 2024
  • Hashize amezi 2
Image

Banki Nkuru y’u Rwanda (BNR) yatangaje ko icyuho mu buhahirane n’amahanga cyiyongereye mu gihembwe cya Kane cy’umwaka wa 2023.

Byagarutsweho kuri uyu wa Kane tariki 22 Gashyantare 2024 mu kiganiro n’abanyamakuru ku cyiciro cya Banki Nkuru giherereye mu Mujyi wa Kigali.

BNR yavuze ko agaciro k’ibyoherezwa mu mahanga kagabanyutseho 8.7% bitewe n’igabanuka ry’ibiciro ku isoko mpuzamahanga n’ingaruka z’ihindagurika ry’ikirere ku musaruro w’ikawa n’icyayi.

Ni mu gihe ibitumizwa mu mahanga byagabanutseho 0.2% biturutse ku igabanyuka ry’ibikomoka ku ngufu nka peteroli, ibicuruzwa nkenerwa mu nganda n’ibikoresho biramba.

Ibyo byatumye icyuho hagati y’ibyoherezwa n’ibitumizwa mu mahanga cyiyongereyeho 5.4%, mu gihembwe cya nyuma cy’umwaka.

Mu gihe cy’umwaka wose wa 2023, icyuho hagati y’ibyoherezwa n’ibitumizwa mu mahanga cyiyongereyeho 10% kubera ibitumizwa mu mahanga byazamutseho 6.8%, mu gihe ibyoherezwayo byazamutseho 1.7% gusa.

Umusaruro wavuye muri serivisi z’ubukerarugendo n’amadovizi yoherezwa n’abanyarwanda baba mu mahanga byatumye icyuho hagati y’ibijya n’ibiva mu mahanga kitazamuka cyane.

Ku isoko ry’ivunjisha, agaciro k’ifaranga karagabanyutse bitewe n’ukwaguka kw’icyuho hagati y’ibyoherezwa n’ibitumizwa mu mahanga, no kwiyongera kw’agaciro k’idoIari ry’Amerika ku mpamvu z’izamuka ry’igipimo cy’inyungu fatizo ya Banki Nkuru ya Leta Zunze Ubumwe z’Amerika.

Umwaka wa 2023 warangiye, agaciro k’ifaranga kagabanyutseho 18.05% ugereranyije n’idolari ry’Amerika.

Banki Nkuru y’u Rwanda yavuze ko mu mpera z’Ukuboza 2023, u Rwanda rwari rufite ubwizigame mu madovizi buhagije bwafasha mu gutumiza hanze ibicuruzwa na serivisi mu gihe cy’amezi 4.4.

  • KAYITARE JEAN PAUL
  • Gashyantare 22, 2024
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE