Afurika y’Epfo: yatawe muri yombi azira guteza inkongi yahitanye 76

Umugabo utatangajwe umwirondoro yatawe muri yombi nyuma yo kuvuga ko ari we nyirabayazana w’inkongi y’umuriro yabaye muri Afurika y’Epfo yahitanye abantu 76 igakomeretsa abarenga 80.

Uyu musore w’imyaka 29 y’amavuko yatunguranye atanga ubuhamya mu iperereza rikomeje gukorwa ku cyateye iyi nkongi y’umuriro, yibasiye mu nyubako y’amagorofa atanu yo mu mujyi wa Johannesburg muri Afurika y’Epfo muri Kanama 2023.

The Independent yatangaje ko ibitangazamakuru byo muri Afurika y’Epfo bivuga ko uyu mugabo utaramenyekana umwirondoro we, yari yavuze mu iperereza ko yishe undi mugabo amukubise ndetse akanamuniga mu ijoro iyi nyubako yibasirwaga n’inkongi.

Yavuze ko yahise asuka lisansi ku mubiri w’uyu mugabo umurambo awuhisha mu magorofa yo hasi yo muri iyi nyubako.

Yavuze ko yanywaga ibiyobyabwenge ariko ko uwamusabye kwica uyu mugabo ari ucuruza ibiyobyabwenge wabaga muri iyi nyubako.

Ku wa 23 Mutarama 2024, Polisi yavuze ko bataye muri yombi uyu ubwo bari mu iperereza.

Uyu mugabo wahawe izina rya X avuga ko yemera ko yateje inkongi y’umuriro yapfiriyemo abana 12, hagakomereka abagera kuri 80.

Polisi yakomeje itangaza ko uyu mugabo azitaba urukiko vuba ariko nta gihe cyatangajwe.