Action Aid yagaragaje ingaruka zo kudaha agaciro imirimo ikorwa n’abagore

  • NTAWITONDA JEAN CLAUDE
  • Nyakanga 19, 2022
  • Hashize imyaka 2
Image

Umuryango utari uwa Leta ‘Action Aid’ mu Rwanda utangaza ko hari ingaruka nyinshi ku mirimo idahabwa agaciro ikorwa n’abagore bityo bikaba bishobora no kudindiza iterambere ry’umuryango n’igihugu.

Hatungwa agatoki imirimo yo mu rugo idahemberwa (Unpaid Care Work), ko ari yo ishobora kudindiza iterambere ry’umuryango mu gihe yaba idahawe agaciro.

Clare Katwesigye, umukozi wa Action Aid mu Rwanda, ahamya ko imirimo ikorwa n’umugore iramutse idahawe agaciro byagira ingaruka zikomeye.

Mu kiganiro gito aherutse guha Imvaho Nshya, yagize ati “Umugore aramutse adahawe amahirwe, bitewe n’imbogamizi z’akazi ko mu rugo kadahabwa agaciro, bishobora gutuma iterambere ry’umuryango n’iry’igihugu bidindira”.

Katwesigye agaragaza ko hari urwego rutaragerwaho, aho abantu bose bazajya bajya ku kazi cyangwa bakajya mu mirimo ibyara inyungu bafite aho basiga abana babo.

Ati: “Haramutse hagiyeho amarerero ahantu hashoboka, byafasha ba babyeyi basigaraga barera abana noneho bakabona umwanya wo kujya mu mirimo ibyara inyungu.

Habonetse amazi meza hafi y’ingo n’ibigega by’amazi ibyo biri mu bintu byaba ingenzi mu kugabanya imirimo idahemberwa ikorwa n’abagore.

Impamvu tuvuga ko izo mvune zigera ku bagore, hakozwe ubushakashatsi bwari bugamije kugaragaza imirimo n’icyakorwa kugira ngo umugore agire amahirwe mu mirimo yindi igamije guteza imbere umuryango kandi ikawinjiriza amafaranga”.

Ubushakashatsi bwakozwe n’umuryango wa Action Aid mu Rwanda, bwagaragaje ko abagore ari bo bakora amasaha menshi imirimo yo mu rugo ukurikije abagabo bayikora.

Mu mujyi abagore bakora akazi kabo gasanzwe, bakora nibura amasaha abiri ku munsi, aho umugabo ashobora gukora isaha imwe mu gihe ari mu rugo.

Ni mu gihe umugore wo mu cyaro akora imirimo yo mu rugo amasaha agera kuri atandatu.

Bivuze ko uwo mugore aba atabonye igihe cyo gukora indi mirimo ibyara inyungu cyangwa imwinjiriza. Umugabo wo mu cyaro, we akora amasaha abiri.

Action Aid itangaza ko iyi mirimo yo mu rugo akenshi ngo bigaragara ko ari imvune ku mugore ugereranije n’umugabo.

Action Aid yongeraho ko harimo gukorwa ubuvugizi kugira ngo hageho umushahara fatizo ku bantu bose bakora.

Imirimo yo mu rugo idahemberwa, byagaragaye ko atari ikibazo kiri mu Rwanda gusa, ni ikibazo kireba Isi yose kandi bigoye ko cyashakirwa igisubizo.

  • NTAWITONDA JEAN CLAUDE
  • Nyakanga 19, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE