Abunganira abacuruzi barishimira ko nta bicuruzwa bigitinda muri gasutamo

  • NTAWITONDA JEAN CLAUDE
  • Gicurasi 15, 2022
  • Hashize imyaka 2
Image

Abunganira abacuruzi muri za gasutamo barishimira ko ibicuruzwa bihanyuzwa bitagitindamo nka mbere biturutse ku ikoranabuhanga bavuga ko ryabigizemo uruhare.

Ikigo cy’Igihugu cy’Imisoro n’Amahoro (RRA) mu ishami rishinzwe serivisi za gasutamo cyashyize imbaraga mu kuvugurura serivisi zitangirwa mu biro bya za gasutamo.

Abagana serivisi za gasutamo z’u Rwanda hari byinshi bashima ku ikoranabuhanga RRA yashyize muri za gasutamo mu rwego rwo kongera serivisi zihatangirwa.

Kalisa François, uwunganira abacuruzi muri gasutamo, agira ati: “Mbere hari harimo ingorane nyinshi ikoranabuhanga ritarabaho.  Icyo gihe umuzigo washoboraga kuza ntitumenye aho ugeze ariko ikoranabuhanga aho rigeze uyu munsi dushobora kumenya aho umuzigo ugeze”.

Avuga ko iyo akoresheje ikoranabuhanga ashobora guhita amenya ko imodoka ye yageze ku mupaka, ahamya ko kera byatindaga kuko byari ibintu bitakoreshwaga ikoranabuhanga.

Nyuma yaho Ikigo k’Imisoro n’Amahoro gishyiriyeho AEO (Authorized Economic Operator) ngo byabafashije mu kudakereza imizigo yabo.

Hari impamvu nyinshi zituma u Rwanda rwarashyize imbaraga mu ikoranabuhanga rikoreshwa muri za gasutamo mu rwego rwo kunoza serivisi zihatangirwa.

Kugeza ubu mu misoro yose ikusanywa n’Ikigo k’Imisoro n’Amahoro, ikomoka kuri serivisi za gasutamo iri hagati ya 30% na 35% muri za serivisi z’ikoranabuhanga rikoreshwa muri za gasutamo z’u Rwanda.

Hari irindi koranabuhanga rizwi nka ‘Electronic Single Window’ rihuriweho n’ibihugu byo mu muryango wa Afurika y’Iburasirazuba.

Iri ryifashishwa cyane mu kumenyekanisha ibicuruzwa, kwishyura imisoro n’amahoro ndetse no gukurikirana ibicuruzwa guhera byinjiye mu gihugu kugeza bisohotse, bikajya ku isoko bigiye gucuruzwa.

Uretse kuba ubu buryo bw’ikoranabuhanga bwarafashije mu kugabanya umwanya ibicuruzwa byamaraga muri gasutamo, yanagabanije ikiguzi kuko mbere abacuruzi bakoreshaga amamenyekanisha menshi kuri buri mupaka ari nako bahatakariza umwanya munini.

Abacuruzi bamenye umusoro ukwiye bagomba kwishyura ndetse ubuyobozi bwa gasutamo nabwo bushobora kubika amakuru ajyanye n’ubucuruzi bwabo.

Mukankubana Suzan wunganira abacuruzi muri gasutamo, asobanura uburyo hari ‘Single Window’ ibafasha kugenzura akazi uko karimo gukorwa.

Iyo umaze gukora akazi ushaka gukora ububiko burindwi ugashaka ko bihaguruka bikaza, icyo gihe igikozwe kuri iyo dosiye cyose urakibona hifashishijwe Single Window.

Yagize ati: “Icyo abakozi ba RRA bari i Dar Es-Salaam cyangwa ku cyambu cya Mombasa bakoze kuri iyo dosiye, urabibona ukamenya ko umuzigo uhagurutse, ukaza ukagera ku mupaka.

Iyo ugeze ku mupaka abakozi bo muri RRA urabibona ko hari icyo bakoze hanyuma ugategereza ko umuzigo ukugeraho hano MAGERWA”.

Avuga ko iyo bimaze kuhagera batangira imenyekanisha ryo kugira ngo umucuruzi yishyure umusoro, iyo atawishyuye bikiri ku cyambu.

Ahamya ko  Single Window yagerageje kwihutisha uburyo bwajyaga bukoreshwa kugira ngo igicuruzwa kigere kuri nyiracyo.

Mu kurushaho gukoresha ikoranabuhanga rikoreshwa muri serivisi za gasutamo, andi makuru meza nuko ubu buryo bw’ikoranabuhanga ‘Electronic Single Window’ bukoreshwa cyane muri za gasutamo z’u Rwanda, na yo yavuguruwe.

Ibi byose bikorwa mu rwego rwo kugabanya umwanya munini abakeneye serivisi bajyaga bamara.

Uretse kugabanya umwanya abacuruzi bamaraga ku biro bya za gasutamo, iri koranabuhanga ryanagabanije amwe mu makosa yakorwaga n’abacuruzi bakora ubucuruzi bwambukiranya imipaka.

Hari abashoferi b’imodoka nini z’ibicuruzwa bakoraga magendu, bagapakururira ibicuruzwa mu nzira bitaragera iyo bijya mu rwego rwo kugabanya umusoro bagombaga gutanga.

Ni mu gihe abandi wasangaga banyereza ibicuruzwa ku buryo bene byo babiburira irengero.

Kugeza ubu RRA imaze imyaka igera kuri 5 itangije ikoranabuhanga rizwi nka ‘Electronic Cargo Tracking System’ rikoreshwa mu kugenzura imodoka zikorera ibicuruzwa byambukiranya imipaka.

Iyo umushoferi aparitse ahantu akagira icyo akora ku kinyabiziga, Ikigo cy’Imisoro n’Amahoro kibibona hifashishijwe iryo koranabuhanga.

Mwumvaneza Felicien, Komiseri wa za Gasutamo muri RRA, avuga ko ikirimo gikomeye cyane, ari uko bashaka guhuza ikoranabuhanga ryabo rya za gasutamo n’ubundi buryo bw’ikoranabuhanga bw’ibindi bigo bya Leta bakorana nabyo mu rwego rwo kugenzura ibicuruzwa byinjira mu gihugu.

Agaragaza ko hari inzego zishinzwe kugenzura ubuziranenge, ikigo gishinzwe kugenzura iby’imiti n’ibiribwa izo nzego zose bifuza gukuraho uburyo butuma umucuruzi agomba gukora imenyekanisha rye muri gasutamo akongera kujya gusaba iby’ubuziranenge muri ibyo bigo anyuze muri iryo koranabuhanga.

Ati: “Yaba iri koranabuhanga ryashyizwe muri serivisi za gasutamo ndetse n’ibindi byose, byakozwe hagamijwe ko serivisi zihatangirwa zarushaho kunogera abacuruzi”.

Bukuru Clement, Perezida w’Urugaga rw’Abunganira abasora muri gasutamo, avuga ko bishimira intambwe imaze guterwa n’Ikigo k’Imisoro n’Amahoro by’umwihariko ishami rya gasutamo.

  • NTAWITONDA JEAN CLAUDE
  • Gicurasi 15, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE