Aborozi basabye Leta kubafasha gukemura ikibazo cy’ibiryo by’amatungo bihenze

  • NTAWITONDA JEAN CLAUDE
  • Nyakanga 14, 2022
  • Hashize imyaka 2
Image

Ikibazo cyo kubona ibiryo by’amatungo gikomeje kuba ingorabahizi ku borozi kuko babibona bibagoye kandi biri ku giciro kiri hejuru, bakaba basaba Leta y’u Rwanda ko yabafasha kuziba icyo cyuho kuko gituma n’umusaruro uboneka ku isoko uhenze.

Babigarutseho ubwo uyu munsi ku wa 14 Nyakanga 2022, hasozwaga Imurikabikorwa rya 15 ry’ubuhinzi n’ubworozi ryaberaga ku Mulindi mu Karere ka Gasabo.

Uhagarariye abamuritse ibikorwa byabo mu bworozi, Munyangeyo Themistocles  ukora ubworozi bw’amafi, yavuze ko bafite ibibagoye bitewe n’icyorezo cya COVID-19 yashegeshe uru rwego, aho ubu kubona ibigaburirwa amatungo bibagoye.

Ati: “Tubibona bigoranye n’ibiciro biri hejuru cyane, turashima igikorwa Leta yakoze izamura ingengo y’imari mu buhinzi n’ubworozi, twizeye ko izadufasha kuziba icyo cyuho kugira ngo twihaze mu biribwa n’amatungo yacu abashe kubona ibyo arya”.

Yongeyeho ati: “ …twabashije kwihaza mu biribwa tukabona ibidufasha kubona ibiryo by’amatungo nta gushidikanya ko tuzagera ku ntego nk’abahinzi-borozi kugira ngo ibiribwa bibashe kuboneka mu Gihugu”.

Minisitiri  w’Ubuhinzi n’Ubworozi Dr Mukeshimana Gerardine yijeje ko iki kibazo ndetse n’ibindi bibangamiye ubuhinzi n’ubworozi muri rusange bazakomeza gushaka uburyo bikemuka binyuze mu bufatanye n’abari muri uru rwego.

Yagize ati: “Hari byinshi byavuzwe bikeneye kugenda byongerwamo, hari ibihurirana n’ibihe turimo; Isi ihanganye n’ibintu 3 bikomeye; ibyorezo by’indwara nka COVID, imihindagurikire y’ikirere n’ibibazo by’amakimbirane akomeza kugaragara ku isi, bikaba birimo kugira ingaruka ku buryo ibitunga abantu ndetse n’amatungo bigenda bihenda kurushaho, ibyo ngibyo ni ikibazo duhanganye na cyo nk’Isi, ni ikibazo duhanganye na cyo nk’Igihugu. 

Tuzakomeza gukorana nk’uko twakoranaga kugira ngo duhangane n’ibyo bibazo ndetse tunagana mu nzira yo kubisohokamo”.

 Minisitiri Dr Mukeshimana yagarutse  ku mihindagurikire y’ibihe, avuga ko ari ikibazo gikomeye cyane cyariho na mbere kandi   gihangayikishije isi, kugisohokamo bikaba bisaba kwimakaza ikoranabuhanga.

Ni mu gihe abari mu rwego rw’ubuhinzi n’ubworozi na bo  bifuza ko iri koranabuhanga ryarushaho kubegera aho bari.

Uharagariye abamuritse ibikorwa byabo mu buhinzi Nyirazaninka Antoinette ati: “ Abahinzi turifuza ko ikoranabuhanga ryakomeza gukataza ritugana aho turi hariya mu buhinzi, mu midugudu no mu masibo, rikagendana na za tekiniki zorohereza abahinzi imvune kugira ngo umusaruro ukomeze kwiyongera mu bwiza no mu bwinshi”.

Iri murikabikorwa ry’Ubuhinzi n’Ubworozi ryari rifite insanganyamatsiko igira iti: “Kubaka ubudahangarwa mu buhinzi n’ubworozi hifashishijwe Ikoranabuhanga.”

Mu kurisoza hahembwe abamuritse neza ibikorwa byabo bakanagaragaza udushya barimo  kompanyi Tri-Seed Co Ltd  yerekanye ko imbuto z’ibigori zavuye mu bushakashatsi imbere mu Gihugu zishobora gutanga umusaruro mwiza kandi mwinshi. Mu rwego rw’ubworozi hahembwe Muyumbu Pig Breeding Ltd kompanyi yagaragaje uburyo bwo kuvugurura icyororo mu bworozi bw’ingurube itanga intanga ifatanyije na Zipline Company zikagera ku borozi hakoreshejwe  utudege tutagira abapilote.

Hahembwe na Agriresearch Unguka Ltd yagaragaje ko ku buso buto hashobora guhingwa hakaboneka umusaruro mu butaka no hejuru y’ubutaka, mu butaka hakaba haboneka  umusaruro w’ibirayi, hejuru hakaboneka uw’inyanya.

Hanahembwe Open Construction and Related Services Ltd itanga ibikoresho byo kuhira, Feed the Future Rwanda Orora Wihaze yamuritse imodoka itwarwa n’amashanyarazi, icomekwa mu minota 15 ikagenda ibirometero 100 igatwara umusaruro, n’abandi.

Abamuritse ibikorwa byabo muri iri murikabikorwa barenga 300.

  • NTAWITONDA JEAN CLAUDE
  • Nyakanga 14, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE