Kuva tariki ya 29 kugeza tariki ya 30 Ukuboza mu Kigo cya Don Bosco Gatenga TSS mu Karere ka Kicukiro, hateganyijwe imurikabikorwa ryateguwe n’abize imyuga mu bigo byitiriwe Mutagatifu Don Bosco mu bice bitandukanye.
Iryo murikabikorwa ryitezweho kuzitabirwa n’amashuri ya Tekiniki, Imyuga n’Ubumenyi Ngiro (TVET) ya Don Bosco uko ari atatu ari yo Don Bosco Gatenga TSS riri mu Murenge wa Gatenga Akarere ka Kicukiro, Don Bosco Rango TVET School riherereye mu Karere ka Huye ndetse na Don Bosco Muhazi TVET School riherereye I Gikomero mu Karere ka Gasabo.
Iri murikabikorwa rizerekanirwamo ibikorwa by’amatsinda y’abanyeshuri 8 abarizwa muri izo TVET ndetse hazanamurikirwemo ibikorwa by’abarangije muri ayo mashuri kuri ubu bari ku isoko ry’umurimo.
Uretse imurikabikorwa, hateganyijwe n’inama nyunguranabitekerezo izagaragarizwamo ibibazo bigaragara muri TVET muri rusange, ndetse n’ibisubizo by’ibyo bibazo.
Uzaba kandi umwanya wo kuganira na buri wese uzitabira imurikabikorwa ndetse no gusangira ubunararibonye hagamijwe kugera ku myigishirize y’ubumenyingiro isubiza ibibazo bigaragara ku isoko ry’iumurimo.
Uretse abanyeshuri ndetse n’abize mu mashuri ya Don Bosco, iyi gahunda yatumiwemo abahagarariye inzego za Leta, Urwego rw’Abikorera, ababyeyi b’abana biga muri izo TVET ndetse n’abaturage muri rusange.
Ubuyobozi bw’Abasaleziyani ba Don Bosco buvuga ko iyi ari gahunda y’igihe kirambye igamije gushishikariza urubyiruko kwiga amasomo y’ubumenyi ngiro ndetse n’imyuga, hagamijwe gushyigikira gahunda Leta y’u Rwanda yihaye yo kugira ubukungu bushingiye ku bumenyi.
Ibi kandi biri muri gahunda yo gutegura ejo heza h’urubyiruko n’ah’Igihugu muri rusange, cyane ko byagaragaye ko ibihugu byimakaza gutoza urubyiruko ubumenyi ngiro byihuta cyane mu iterambere.
Nta gitekerezo kiratangwa. Ba uwa mbere gutanga igitekerezo.
Andika igitekerezo
AMATEGEKO AGENGA IYANDIKA RY'IGITEKEREZO CYAWE