Abiyise “Abateruzi” baterurana n’ibyabo abagana Gare ya Musanze

  • NGABOYABAHIZI PROTAIS
  • Gashyantare 28, 2024
  • Hashize amezi 2
Image

Bamwe mu bagenzi bakoresha Gare ya Musanze mu Karere ka Musanze, babangamiwe n’insoresore zizwi ku izina “ry’Abateruzi” ribaterurana n’ibyabo ribashyira imodoka zibatwara muri kampani ziba zishakira abagenzi, bakaba bifuza ko uburenganzira bw’umugenzi bwakubahirizwa.

Gare ya Musanze ikoreshwa n’imodoka zitwara abagenzi bava ndetse bajya mu Mujyi wa Kigali no mu Karere ka Rubavu, ariko kuri ubu usanga huzuyemo insoresore zitagira ibiziranga, abagenzi kimwe n’abakoresha iyi Gare bakavuga ko zibateye inkeke kuko zibahungabanyiriza umutekano.

Umwe mu bagenzi witwa Mukankusi Marita yagize ati: “Rwose ba nyiri kompanyi zitwara abagenzi nibakore uko bashoboye badukize Abateruzi. Ngira ngo ubonye ukuntu bankurubanye hano bakangeza mu kirere nashoboraga no kuba navunika cyangwa se bakaba banancuza utwanjye! Ubundi umuntu aba azi aho ajya n’aho ava sinibaza rero impamvu umuntu aza akagukweshura ngo jya mu modoka iyi n’iyi, ikibabaje hano hari abasekirite ariko baba babirebera duhohoterwa.”

Mbarushimana Esron avuga ko akunze gukorera imirimo ye y’ubushabitsi i Kigali imusaba kuzinduka, ariko ngo ababazwa n’uko insoresore z’Abateruzi zimukura mu masangano y’imihanda ihuza Umujyi wa Musanze na Kigali ndetse na Rubavu bamukweshebana kugeza muri gare.

Yagize ati: “Abateruzi buriya abenshi bakoresha ibiyobyabwenge, uzarebe baba bafite uducupa ukibwira ngo ni amazi baba barimo binywera ibyuma (inzoga zikarishye). None ugira ngo birirwa basakuza kuriya ari bazima? Mbabazwa n’ukuntu bakuzenguruka buri wese avuga ibye bagusakuriza, kandi tuba rimwe na rimwe twarushye. Ariko tekereza umuntu kugukorana metero 200 agusakuriza akunukiriza ibitabi n’ibyo byuma? Ibi bintu ubuyobozi bwa Gare ya Musanze rwose bubyiteho.”

Mbarushimana akomeza avuga ko kompanyi zitwara abagenzi zikwiye kugurira umwambaro w’akazi umukozi wayo, cyangwa se akaba yambaye ikarita y’akazi, cyane ko umugenzi aba azi neza aho agiye.

Yagize ati: “Umuntu ava mu rugo azi aho yerekeje, ariko birababaza noneho gutotezwa ngo jya aha aha nk’aho utari umuntu mukuru. Buracya ukabona umusore ntiyoga ibyanwa byarashokonkoye (byabaye byinshi), ntamesa ngo aje kuyobora abagenzi. Ibi kandi ntabwo biri i Musanze gusa nabonye n’i Kigali bibaho, ubuyobozi bwa RFTC bwite kuri iki kibazo nyamara kirimo n’ubujura.”

Abateruzi bo muri Gare Musanze haba ubwo bashwana ubwabo, abagenzi bavuga ko irondo ryivanze n’abajura

Mukampogazi Jeannine we avuga ko bigeze kumukweshura nyuma yigenzuye asanga telefoni ye yabuze.

Yagize ati: “Muri uko kuguterura, bagukurura bagutesha umutwe kubera ibigambo baba bafite byinshi hari ubwo uhaburira ibintu ndetse n’ikintu washakaga gukora muri Gare ntibishoboke. Njye nahaburiye telefoni yanjye mbura n’uwo nyirihisha, nyamara numva Leta ivuga ko nta muntu ukwiye guhungabanya umugenzi, ariko abakarasi biyise Abateruzi hano muri Musanze barenze umubare w’abagenzi muri Gare nibadutabare ni ukuri turagowe.”

Umuyobozi wa Gare ya Musanze Innocent Rwamuhizi, ashimangira ko hari abasore bashakira abakiliya kompanyi zitwara abagenzi muri iyi gare, ibi bintu ngo bakaba bahora babyiyama abayobozi b’izi kompanyi ariko byarananiranye

Yagize ati: “Ibi bintu by’Abateruzi rwose niba ariko biyise bimaze kurambirana hano muri iyi gare. Njye nk’umuyobozi wa Gare buri gitondo ikompanyi runaka impa urutonde rw’abakozi 5 bashinzwe gufasha abagenzi nko gushyira imizigo yabo mu modoka n’ibindi. Bagomba kuba bambaye impuzankano, bafite amakarita abaranga, ariko ujya kubona ukabona hajemo abandi bantu batigeze bakwereka ibyo bikakuyobera kandi itegeko tugenderaho nta n’umuntu ugomba gukora ku mugenzi kuko ava iwe azi aho agiye kuko Abanyarwanda bamaze kujijuka.”

Rwamuhizi akomeza avuga ko uburenganzira bw’umugenzi bugomba kubahirizwa, aho gukomeza kumuhungabanya banamuhutaza aho usanga ngo hari insoresore zishobora guterura umuntu mu birere kugeza ubwo hari n’ingingo bashobora kumuvuna nk’amaboko, ijosi cyangwa se amaguru.

Yagize ati: “Nk’ubu njye ngera muri gare sa kumi n’imwe mbigisha kubaha abagenzi n’uko buri wese akora inshingano ze. Ibyo wibonera muri gare nanjye ni byo mbona byaranyobeye kuko abo bose ubonamo simba nzi iyo bavuye, ndasaba ba nyiri ikigo gukurikiza amategeko tugenderaho n’amabwiriza ya RURA uko abiteganya, kandi ko ku bufatanye na Polisi bariya bose bazacikamo.”

Uyu muyobozi atunga agatoki amakompanyi yose akorera muri gare atatinye no kuvuga amazina yazo ko akwiye guhindura imikorere.

Gare ya Musanze ihurirwamo n’imodoka ziva n’izijya Rubavu-Musanze, Musanze-Kigali, Musanze-Cyanika n’ibindi byerekezo binyuranye mu Ntara y’Amajyaruguru. Abo bose rero bakaba bavuga ko babangamiwe n’Abateruzi.

  • NGABOYABAHIZI PROTAIS
  • Gashyantare 28, 2024
  • Hashize amezi 2
TANGA IGITEKEREZO
lg says:
Gashyantare 29, 2024 at 9:18 am

ibibyose birangirira aho kubivuga ntagikorwa ntacyo bimaze guca abakarasi muli gare ibyo ninko guca amagare mumihanda nijoro cyangwa kubabuza gufata kumodoka

Andika igitekerezo

AMATEGEKO AGENGA IYANDIKA RY'IGITEKEREZO CYAWE