Abikorera biyemeje ko bagiye guhindura isura y’Umujyi wa Kayonza

  • NTAWITONDA JEAN CLAUDE
  • Mata 26, 2022
  • Hashize imyaka 2
Image

Umuyobozi w’Akarere ka Kayonza yayoboye inama nyunguranabitekerezo ihuje abikorera n’ubuyobozi bw’Akarere, aho bunguranye inama ku iterambere ry’Umujyi wa Kayonza, abikorera biyemeje ko bagiye kubigira ibyabo.

Atangiza iyi nama nyunguranabitekerezo, Meya w’Akarere ka Kayonza Nyemazi John Bosco yabanje gushimira abikorera bitabiriye, ababwira ko igamije kurebera hamwe uko bafatanya mu guharanira iterambere ry’Akarere.

Ati: “Impamvu twabatumiye muri iyi nama, turifuza kuganira nk’abikorera bo mu Karere ka Kayonza kandi bahafite ibikorwa kugira ngo turebere hamwe uko twateza umujyi wacu imbere.”

Yongeyeho ati: “Turifuza kandi kuganira ku mishinga irambye, muri uyu mujyi hari abafite ibibanza bitubatse hari abahafite inzu zitavuguruye, tukaba tugomba kungurana ibitekerezo kugira ngo uyu mujyi wacu wubakwe ku buryo bujyanye n’igihe”.

Meya yagaragaje ko igihugu kitegura kwakira inama ya CHOGM. Yabwiye abitabiriye inama ko igihugu kizaba gifite abashyitsi benshi bakeneye serivisi zitandukanye, abasaba kubitegura bavugurura inzu, bakubaka za Hotel ariko bakita cyane ku isuku.

Umuyobozi w’abikorera mu Karere ka Kayonza yashimiye ubuyobozi bw’Akarere kuba bukomeje gushyigikira umuco mwiza wo kujya inama.

Ati: “Tugomba kwishakamo imbaraga tukishyira hamwe kugira ngo dukore imishinga minini, tubyaze amahirwe akarere kacu turabizi ko ari Akarere k’ubukerarugendo. Tugomba gukora imishinga migari ijyanye n’isura Kayonza ikwiye kugira.

Abitabiriye inama batanze ibitekerezo bitandukanye, bose bakaba bashimiye ubuyobozi bw’Akarere bwateguye iyi inama nyunguranabitekerezo.

Biyemeje ko bagiye kuvugurura umujyi basiga amarangi ku nzu, bakanatera ibiti byiganjemo imikindo imbere y’inzu z’aho bakorera ndetse no ku mihanda.

Meya yasoje ashimira abitabiriye inama uburyo batanze ibitekerezo, abasaba gushyira mu bikorwa imyanzuro yafatiwe muri iyo nama.

Umuyobozi w’Akarere ka Kayonza John Bosco Nyemazi yashishikarije abikorera bo muri ako Karere guhindura isura y’Umujyi wa Kayonza ( Foto Akarere ka Kayonza)
  • NTAWITONDA JEAN CLAUDE
  • Mata 26, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE