Abikorera bibukijwe kuyoboka amasoko u Rwanda rwagura mu mahanga

  • NTAWITONDA JEAN CLAUDE
  • Gicurasi 10, 2022
  • Hashize imyaka 2
Image

Abayobozi bagera kuri 450 b’inzego zitandukanye z’Urugaga rw’Abikorera mu Rwanda (PSF) bari mu mwiherero w’iminsi itatu mu Karere ka Bugesera, baganirijwe ku buryo bwo kwagura ibikorwa byabo, bakabyaza umusaruro amasezerano y’ubuhahirane n’ubucuruzi u Rwanda rugirana n’ibindi bihugu.

Umujyanama muri Minisiteri y’Ububanyi n’Amahanga Amb. Mukaruliza Monique yagarutse ku nyungu ziri mu masezerano y’ubucuruzi n’ubuhahirane u Rwanda rugirana n’ibindi bihugu no kuba  ruri mu miryango mpuzamahanga itanga amahirwe akomeye ku bikorera, abasaba guhaguruka bakamenya ibyo byose  bakabikoresha mu guteza imbere ibikorwa byabo.

Ati: “Ni amahirwe mukwiye gukoresha kandi nka Minisiteri twiteguye kubashyigikira mu kubona ibikenewe binyuze muri za Ambasade ziri mu bihugu bitandukanye”.

Hon Bazivamo Christophe, Umunyamabanga Mukuru wungirije w’Umuryango w’Ibihugu by’Afurika y’Iburasirazuba (EAC), na we yabwiye abikorera ko mu Karere hari amahirwe menshi y’ishoramari bakwiye kubyaza umusaruro anashimangira ibijyanye no kwita ku buziranenge bw’ibicuruzwa kuko bizabafasha kwitwara neza ku isoko mpuzamahanga  kandi  bagaharanira guhaza isoko babonye.

Minisitiri  w’Ubucuruzi n’Inganda Habyarimana U. Beata, yabashishikarije kongera ingufu no kunoza ibyo bakora, kugira ngo birusheho kujyana n’ibikenewe mu ruhando mpuzamahanga.

Ati: “Uko ibihe bigenda bihita, iterambere ry’inganda ririmo kugenda rikura, birasaba ko dukomeza guhanga udushya, ariko rero uko uhanga ikintu runaka, jya unihutira kucyandikisha muri RDB hato igihangano cyawe kitazitirirwa abandi”.

Yanabasabye guharanira ko inyungu babona ubu yakwiyongera. Ati: “Niducuruza nk’uko twacuruzaga ubushize, tuzunguka nk’uko twungukaga ubushize, nyamara si byo dushaka, ahubwo dukeneye gushyiramo imbaraga kurushaho, kugira ngo tununguke kurushaho”.

Yakomeje agira ati: “Ubu turitegura gucururiza ku isoko rusange nyafurika, biradusaba rero kwita ku bijyanye n’ubuziranenge, kugira ngo ibyo dukora bibashe guhangana ku isoko mpuzamahanga”.

Minisitiri Habyarimana U. Beata yagaragaje ko ahari uburyo bwo gucuruza ari henshi, akaba ari igihe cyo kubyaza umusaruro ayo mahirwe. Ati: “Mutinyuke kandi Leta irabashyigikiye.”

Abikorera banagiriwe inama yo kureka kuba ba nyamwigendaho ahubwo bagahuza imbaraga kugira ngo babashe guhatana ku masoko.

Hon Bazivamo Christophe, Umunyamabanga Mukuru wungirije wa EAC
  • NTAWITONDA JEAN CLAUDE
  • Gicurasi 10, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE