Abiga mu ishuri rikuru rya gisirikare rya Nyakinama basuye ingoro yo kubohora igihugu ku Mulindi

Abanyeshuri bagize icyiciro cya 25 biga amasomo ajyanye n’imiyoborere y’ingabo mu Ishuri Rikuru rya Gisirikare rya Nyakinama, mu Karere ka Musanze, ku wa 07 Ukwakira 2025 basuye Ingoro y’u Rwanda y’urugamba rwo kubohora igihugu ku Mulindi mu Ntara y’Amajyaruguru.

Ni mu rwego rw’urugendoshuri rujyanye no gusobanukirwa byinshi ku rugamba rwo kubohora igihugu rwagizwemo uruhare n’Ingabo zari iza RPA (Rwanda Patriotic Army).

Uru rugendoshuri ni rumwe mu zigamije gusura ahantu ndangamateka mu ntara zitandukanye z’u Rwanda, ahatangirijwe ndetse hakanabera ibyiciro by’ingenzi  by’urugamba rwo kubohora igihugu.

Minisiteri y’Ingabo igaragaza ko uru rugendoshuri rufite intego yo gukomeza gutoza no kongerera ubumenyi ba ofisiye, binyuze mu masomo ajyanye n’urugamba.

Urugendoshuri kandi rufasha abanyeshuri gusobanukirwa byimbitse amateka y’urugamba rwo kubohora u Rwanda.

Aba banyeshuri bahawe ibiganiro na ba ofisiye bakuru bari mu kiruhuko cy’iza bukuru bagize uruhare mu rugamba rwo kubohora igihugu, aho babahaye ubuhamya bugaragaza imbogamizi bahuye na zo ku rugamba, n’ibyemezo by’ingenzi bya gisirikare byagiye bifatwa bikagira uruhare rufatika mu guhindura isura urugamba.

Ibiganiro byagarutse ku byafashije ingabo za RPA gutsinda urugamba, birimo ubuyobozi buhamye, imyitwarire myiza y’ingabo, uburyo bw’imirwanire ifite intego, gushyigikirwa n’abaturage ndetse n’umurava n’umuhate by’ingabo.

Nk’uko biri muri gahunda y’urugendoshuri, aba banyeshuri bazakomeza gusura ibindi bice ndangamateka by’ingenzi bifitanye isano n’urugamba rwo kubohora igihugu ndetse n’urugamba rwo guhagarika Jenoside, kugira ngo barusheho gusobanukirwa amateka y’u Rwanda n’umurage w’amateka y’urugamba rwo kubohora igihugu.

Amafoto: MoD