Abatwara abantu n’ibintu mu kiyaga cya Mugesera biteje imbere

  • NSHIMIYIMANA FAUSTIN
  • Ukuboza 6, 2023
  • Hashize amezi 3
Image

Abakora imirimo yo gutwara abantu n’ibintu mu bwato bakorera mu kiyaga cya Mugesera bava cyangwa bajyana abantu n’ibintu mu Karere ka Rwamagana na Ngoma bavuga ko bibafasha mu buhahirane n’urujya n’uruza kandi ngo bimaze guteza imbere imibereho yabo n’ubukungu.

Koperative ‘Ambutsa Abagenzi’ ikorera mu kiyaga cya Mugesera ku ruhande rw’Akarere ka Rwamagana mu Murenge wa Karenge yatangiye kwambutsa abantu n’ibintu kuva mu mwaka wa 2002, ikaba ifite abanyamuryango 32.

Ibyo bishimira bamaze kugeraho birimo kuba bakoresha amato akoresha moteri ane atwara abantu n’ibintu gusa ,ariko by’umwihariko ku munsi w’isoko riba ku wa Mbere no ku wa Kane bashobora kwinjiza amafaranga y’u Rwanda arenga 50,000.

Ni mu gihe mu minsi isanzwe amake bashobora gukorera no ni amafaranga y’u Rwanda 35,000. Bavuga ko bafite n’umutungo utava kuri konti ungana na miliyoni n’igice z’amafaranga y’u Rwanda yifashishwa mu gihe amato yagize ikibazo.

Nzayitabankuze Philemon, Perezida w’iyo Koperative, yavuze ko abanyamuryango batangirwa ubwisungane mu kwivuza kuri buri muryango w’umunyamuryango, ubwizigame bwa EjoHeza ndetse buri munyamuryango akabona amafaranga arenga 50,000 ku kwezi biva kuyo baba batwariye abantu udashyizemo ubutaka burenga burimo ibibanza bitanu biguriye bufite agaciro ka miliyoni enye z’amafaranga y’u Rwanda.

Nzayitabankuze Philemon yavuze ko amafaranga bagabana buri kwezi yamufashishije kwikenura no kwikemurira ibibazo byo mu rugo.

Yagize ati, “Amafaranga tugabana buri kwezi amfasha kwishyurira abana amashuri no gukemura ibibazo byo mu rugo ku gihe. Iyo nyabonye hari igihe nyagura imyambaro cyangwa nkaguriramo abana imyambaro n’umugore.”

Dusabimana Theresa, umunyamuryango wa Koperative, yavuze ko inyungu abikuramo uretse amafaranga abona buri kwezi harimo kuba abo mu muryango we bambutswa ku buntu iyo bagiye mu mirimo mu Karere ka Ngoma.

Yagize ati: “Uretse Mituweli na EjoHeza dutangirwa muri Koperative, biranadufasha kuba umunyamuryango wese yambukira ubuntu ndetse n’uwo mu muryango we. Nahoze ndi umuhinzi mpinga mu Murenge wa Mugesera, Akarere ka Ngoma, ngatanga amafaranga ndetse nkishyurira n’abahinzi ariko ubu kwambuka ni ubuntu mbikesha kuba ndi muri Koperative.”

Bamwe mu bagenzi umunyamakuru wa ImvahoNshya yasanze bambukira ku mwaro wa Kabimbi uri mu Murenge wa Mugesera, Akarere ka Ngoma, bavuze ko gukoresha inzira yo mu mazi biborohera kugeza umusaruro ku masoko kandi bagacibwa amafaranga make.

Kubwimana Rose, umuhinzi w’urutoki akaba atwara umusaruro we, yagize ati: “Kugira ngo uzatege moto uve muri Mugesera cyangwa ibishyire ku magare biragoye kandi biranahendesha, ni yo mpamvu nkoresha inzira yo mu mazi kuko ubwato butwara imizigo ku buryo bworoshye kandi bwihuse, byagera ku mwaro hakurya muri Karenge nkabona kubishyira ku magare bikabona kujya ku masoko.”

Koperative ‘Ambutsa Abagenzi’ ivuga ko yahaye abandi akazi kuko bafite umukozi ushinzwe gucunga imari uhoraho uhembwa 50,000 ku kwezi.

Buri munyamuryango wa Koperative iyo agize ibyago mu muryango we akaba ahabwa 50,000 by’amafaranga y’u Rwanda yo kumufata mu mugongo.

Koperative ‘Ambutsa Abagenzi’ igizwe n’abagabo 27 ndetse n’abagore 5 ikaba ikorera ku mwaro wa Ipide uri mu Murenge wa Karenge, Akarere ka Rwamagana.

  • NSHIMIYIMANA FAUSTIN
  • Ukuboza 6, 2023
  • Hashize amezi 3
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE