Abatuye mu Mujyi wa Kayonza babangamiwe na ruhurura idatwikiriye

  • NSHIMIYIMANA FAUSTIN
  • Ugushyingo 27, 2023
  • Hashize amezi 3
Image

Bamwe mu baturage batuye n’abagenda mu Mujyi wa Kayonza mu Karere ka Kayonza, bahangayikishijwe na ruhurura idatwikiriye bavuga ko ari imbogamizi ku barema isoko rya Kayonza ndetse n’abafite ibikorwa by’ubucuruzi muri uyu mujyi.

Aba baturage bifuza ko hagira igikorwa vuba itarabateza ibyago kuko muri iyi minsi harimo kugwa imvura nyinshi.

Iyo ruhurura iva mu isanteri y’ubucuruzi ya Kayonza igakomeza inyuma ya Gare no ku isoko, batangaza ko iyi ruhurura idatwikiriye yateza ikibazo cyo kudakora ingendo mu buryo bworoshye cyane ku bava mu isoko bajya muri Gare ya Kayonza, kandi ngo ishobora kubatwarira ubuzima kubera ubunyerere buhari bakaba bayigwamo.

Ndayisenga Seth ucururiza mu isoko rya Kayonza yavuze ko kuba ruhurura idatwikiriye bishobora gushyira ubuzima bwe n’ubw’abaturage mu kaga.

Yagize ati: “Iyo imvura iguye akenshi tuba duhangayitse kuko urebye icyondo kiba hano mu isoko no mu nkengero zaryo gishobora guteza ibyago kuko ubunyereye buri hafi ya ruhurura wagwamo ukavunika cyangwa ukahaburira ubuzima.”

Kubwimana Ruth usanzwe uhahira mu isoko akanyura ahari ruhurura, na we yagize ati: “Aha hantu hashobora guteza ibyago byinshi kuko iyi ruhurura irangaye itya idutera ubwoba noneho bikaba akarusho mu bihe by’imvura bitewe n’inzira tunyuraho ko aba ari nto kandi na zo zikajyaho ibyondo, urumva ko ugize ibyago ukanyerera wagwamo.”

Abaturage bafite ubwoba bwo kuba bagwa muri iyi ruhurura ku bunyerere kandi ngo iruzura cyane

Aba baturage basaba Akarere ko katwikira iyi ruhura ku buryo guhangayika byavaho, bagatekereza ibindi byateza imbere imibereho yabo.

Umuyobozi w’Akarere ka Kayonza Nyemazi John Bosco, yavuze ko hari gahunda y’umushinga uyobora amazi mu Mujyi wa Kayonza yitezweho gukemura iki kibazo.

Yagize ati: “Mu ngengo y’imari y’uyu mwaka, turateganya gukora no gushyiraho uburyo (system) buyobora amazi muri uyu mujyi bungana na kilometero imwe buzakemura ibyo bibazo byose kuva mu Mujyi wa Kayonza kugenda kugera ahubatse uruganda rwa Soyco, twibaza yuko bizakemura icyo kibazo kuko iki kibazo turakizi ari nayo mpamvu twashyizeho uwo mushinga kugira ngo tugane mu mujyi uteye imbere kandi  ugezweho, tubashe no gukemura n’ibyo bibazo by’amazi bikibangamira abaturage”.

Ubuyobozi bw’Akarere ka Kayonza butangaza ko hari umushinga ungana na Kilometero imwe uzafasha kubaka no gukora inzira z’amazi ava mu Mujyi wa Kayonza ajyanwa mu gishanga cya Ntaruka.

NSHIMIYIMANA FAUSTIN

  • NSHIMIYIMANA FAUSTIN
  • Ugushyingo 27, 2023
  • Hashize amezi 3
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE