Abatuye mu maberishi y’Umujyi wa Musanze barasaba Kaburimbo

  • NGABOYABAHIZI PROTAIS
  • Ugushyingo 24, 2023
  • Hashize amezi 6
Image

Umujyi wa Musanze kugeza ubu mu nkengero zawo mu masibo anyuranye, hakozwe imihanda kugera kuri 90%, ariko abatuye mu gice cyiswe ibereshi mu Kagari ka Cyabararika ho baracyagenda bivuruguta mu byondo ndetse bisekura ku mabuye n’ibinogo.

Mu mujyi wa Musanze n’inkengero zawo habarirwa amabereshi 6, abayatuyemo bakaba bavuga ko basigaye inyuma kuko ari cyo gice cy’Umujyi kitarageramo kaburimbo.

Basaba ubuyobozi kububakira imihanda irimo kaburimbo kubera ko bagenda basayura ibyondo.

Muhamudu Dushime, umwe mu batuye mu ibereshi rya 1, avuga ko babangamiwe n’ibizenga biza imbere y’inzu zabo ndetse n’ibigo by’amashuri.

Yagize ati: “Umujyi wacu ugenda utera imbere, bakubaka amataje, imihanda myiza ndetse n’amahoteli, ariko twebwe hano usanga tumeze nk’abibagiranye. Reba imihanda ya Kaburimbo yageze no muri Susa inyuma iyo y’umujyi, amatara ku mihanda barayafite, ariko twebwe turi mu icuraburindi kandi turi hafi y’umuhanda Musanze-Kigali. Turifuza ko natwe manda itaha Perezida yazaduha imihanda ijya mu masibo imeze neza irimo kaburimbo”.

Bamwe mu banyeshuri bo ku Rwunge rw’Amashuri rwa Muhoza ya mbere, bavuga ko kwambuka bajya mu kigo biba ari ingorane kuko kugeza ubu ibizenga bikaze biri imbere y’ishuri ryabo.

Mwambutsa Fidele, umwe mu banyeshuri, yabwiye Imvaho Nshya ko hari ubwo bakuramo inkweto bagakaraba bageze mu kigo.

Yagize ati: “Urabona hano imbere y’ikigo bahaparika ibimodoka, hari izizana ibinyobwa bya BRALIRWA. Umuhanda uretse ko na wo usanzwe utari mwiza, imodoka zarawucukuye kugeza ubwo ikizenga kigera muri santimetero 30 z’ubujyakuzimu, twe rero kwambuka hano kimwe n’abarimu bacu dukuramo inkweto tugakarabira mu kigo, mbese hano ku muryango w’ikigo cyacu tuhita Nangumurimbo. Twifuza ko uyu muhanda baduha kaburimbo natwe tugasirimuka, bitaba ibyo se nibabe bashyizemo cya gitaka gitukura basibe ibi byobo.”

Mutesi Kabanyana Egidie yavuze ko kuba kiriya gice ngo nta mihanda kigira kubera ko Musanze ngo igenda icanira imihanda myinshi, ngo ibisambo byihindiye mu mabereshi byitwikiriye ijoro.

Yagize ati: “Kubera ko ibisambo byajyaga bihakubitira kaci. Muri za Susa, Kabaya na Muhe, none bakaba barashyizemo kaburimbo bakahashyira n’amatara yo ku mihanda, kugeza ubu ibisambo byihindiye iwacu kubera umwijima, turamutse rero iyo mihanda tuyibonye hano haba uburyo bworoshye bwo gucunga umutekano.

Ndetse hakaba ahantu harangwa n’isuku n’inzu zacu zikabona abakiliya kuko nk’abafite amacumbi abapangayi binubira kuhaza n’ubonetse akaguhenda.”

Umuyobozi w’agateganyo w’Akarere ka Musanze Bizimana Hamiss, yavuze ko mu minsi iri imbere na bo ibikorwa byo kububakira imihanda bizaba byatangiye.

Aragira ati: “Ni byo koko Umujyi wa Musanze uragenda wiyubaka mu buryo bwihuse ngira ngo mu gihe gito urabona inzu nziza zigerekeranye kandi zirimo kubakwa. Imihanda na yo ubu mu Midugudu n’Amasibo y’inkengero z’Umujyi, ibipimo byerekana ko tugeze heza mu kubaka kaburimbo.  Bariya rero bo mu mabereshi na bo mu minsi iri imbere bazagerwaho harimo harashakwa ingengo y’imari, ikibazo turakibona na twe rwose kandi twagishyizeho umutima.”

Igice cy’amaberishi cyakomeje kwitwa gutyo kubera ko ngo igihe Ababiligi bageraga muri uyu Mujyi wa Musanze ni ho, bakambitse maze bahita Camps Belges (mu rurimi rw’Igifaransa) ni uko izina ryagiye rikura gutyo.

  • NGABOYABAHIZI PROTAIS
  • Ugushyingo 24, 2023
  • Hashize amezi 6
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE