Abatuye Mageragere bishimiye ishuri bagiye kubakirwa

  • KAYITARE JEAN PAUL
  • Ukuboza 6, 2023
  • Hashize amezi 6
Image

Umurenge wa Mageragere uri mu Karere ka Nyarugenge mu Mujyi wa Kigali, ni Umurenge ufatwa nk’igice cy’icyaro. Abawutuye babwiye Imvaho Nshya ko bishimiye kubakirwa ishuri ibyo bakabihera ku miyoborere myiza n’umutekano bafite.

Babigarutseho ejo ku wa Kabiri mu Nteko z’Abaturage mu Murenge wa Mageragere ari nabwo Umuyobozi Nshingwabikorwa wa Nyarugenge, Ngabonziza Emmy ari kumwe na Rwiyemezamirimo Kamugwera Vestine bashyiraga ibuye ry’ifatizo ahatangiye kubakwa ishuri.

Nyuma y’ishuri rwiyemezamirimo arateganya kubaka ivuriro rizafasha abana baziga kuri iryo shuri ndetse n’abatuye hafi yaryo muri Mageragere.

Biteganyijwe ko rizuzura mu kwezi kwa Kanama 2025 ritwaye 1,420,530,031 Frw. Ryatanze abakozi 200 bagiye kuryubakaho.

Ni ishuri rizubakwa mu kibanza kiri ku buso bungana na m2 14 383, rizatangirana n’abana b’inshuke ndetse n’abiga mu mashuri abanza.

Murasira Faustin avuga ko babayeho igihe kinini bari mu bwigunge ariko ngo yishimira ko ibikorwa remezo birimo kugenda bibasanga.

Avuga ko azi Kamugwera nk’umugore ucukura amabuye y’agaciro, kuba ngo yatangiye kubaka ishuri ni ibigaragaza ko amafaranga ahakura yiyemeje kuyagumisha muri Mageragere.

Ati: “Uyu rwiyemezamirimo acukura amabuye y’agaciro hano none agiye gutangiza ishuri, ni ibintu twishimiye nk’abaturage”.

Mukamurenzi Eugenie ahamya ko iterambere ririmo kujya mu Murenge wa Mageragere rizasibanganya amateka mabi yaho kandi ngo bafite imyumvire iri hejuru yo kujyana n’imiyoborere myiza bifitiye.

Ngabonziza, Umuyobozi Nshingwabikorwa w’Akarere ka Nyarugenge, yavuze ko kubaka ishuri nk’iri bigaragaza uruhare rw’abikorera mu iterambere ry’igihugu.

Ibi kandi ngo bivuze impinduka ku mibereho y’abaturage mu gice kigaragara nk’icyaro Akarere kifuza ko gitera imbere.

Ahamya ko ari igice kitari kirimo ibikorwa remezo by’amashuri by’umwihariko ayiganjemo ay’abikorera.

Ni mu gihe kandi ari igice kirimo guturwamo umunsi ku wundi n’abantu batandukanye ndetse n’amashuri akaba yatangiye kubakwa.

Agira ati: “Kubaka ishuri Mageragere bisobanuye ikintu kinini cyane ku mibereho y’abaturage, cyane cyane iyo ugarutse ku burezi bufite ireme.

Wasangaga hano ibyumba by’amashuri byubatswe na Leta bidahagije ubwabyo.

Twari dukeneye abafatanyabikorwa baza gushora imari bagatinyuka no gushora imari mu burezi kuko ari hamwe mu hantu hatitabwaho cyane kandi ubona h’ingenzi hafasha igihugu kwihuta mu iterambere”.

Akarere ka Nyarugenge kafashe iya mbere mu kuganiriza abafatanyabikorwa bako bashobora gushora imari mu bikorwa by’uburezi. Ku rundi ruhande, ubuyobozi bw’Akarere bushimishijwe no kuba ari Umunyarwanda ukorera muri Mageragere ushoye imari mu burezi, mu gihe yari asanzwe ahakorera ubucukuzi bw’amabuye y’agaciro.

Umuyobozi wa Nyarugenge avuga ko iri shuri rizagabanya ingendo zakorwaga n’ababyeyi bajyaga gushaka amashuri mu gice cya Bugesera no muri Kicukiro ndetse na Nyarugenge mu gice cy’Umujyi.

Ati “Kuzana amashuri hano birafasha abaturage kuzamura ubumenyi kuko icyerekezo cy’igihugu ni ukugira umuturage ufite ubumenyi buhagije kandi bukenewe ku isoko”.

Kamugwera, rwiyemezamirimo wo mu Karere ka Nyarugenge, avuga ko kubaka ishuri ari intego yihaye nyuma y’uko Perezida wa Repubulika Paul Kagame ashishikarije umugore kwigira no kwihangira imirimo.

Ati: “Byatumye ntekereza kure negera basaza banjye kugira ngo duhange imirimo itandukanye kandi igirire akamaro abaturage n’abandi muri rusange”.

Avuga ko yahisemo gutangira kubaka ishuri kubera ikibazo cy’abana batajyaga ku ishuri biturutse ku burebure bw’urugendo bakora, ubu ngo bagiye kuzajya bajya ku ishuri bitabagoye.

Asaba abari n’abategarugori guhanga udushya bagatinyuka kuko ngo barashoboye.

  • KAYITARE JEAN PAUL
  • Ukuboza 6, 2023
  • Hashize amezi 6
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE