Nyaruguru: Abaturanye n’u Burundi bagowe n’ivuriro ribona umuganga rimwe mu cyumweru

  • AKIMANA JEAN DE DIEU
  • Mutarama 7, 2024
  • Hashize amezi 4
Image

Abaturage batuye mu Kagari ka Kirarangombe, Umurenge wa Busanze mu Karere ka Nyaruguru, barasaba ko Ivuriro ry’Ingoboka (Poste de Sante) begerejwe ryafashwa gukora neza bakaruhuka ingendo z’ibilometero birenga 15 bakora bajya kwivuza ku Kigo Nderabuzima cya Runyombyi.

Mu kiganiro bahaye Imvaho Nshya, bamwe bavuga ko iri Vuriro ry’Ingoboka rya Kirarangombe bari barahawe rikora nabi kugeza n’aho abajya kuhivuriza bashobora gutegereza umuganga uturuka ku Kigo Nderabuzima cya  Runyombyi bakamubura, bagataha amara masa.

Mukayiranga Prepetue avuga ko bajya kwivuza bagasanga umuganga ataraza, bakamutegereza bikarangira atahageze bagataha, naho abafite ubushobozi bagatega ipikipiki bakajaya i Runyombyi.

Yagize ati: “Bakituzanira iri vuriro twumvaga ko dukize ibibazo byo kwambuka tujya kwivuriza i Burundi kuko ni ho hafi ugereranyije no kujya i Runyombyi. Ariko tujya kwivuza tugategereza umuganga tukamuheba tugataha, ababishoboye bagatega ipikipiki bakajya kwivuza ku Kigo Nderabuzima cya Runyombyi.”

Kabayiza Simeon uvuga ko afite imyaka 55, yabwiye umunyamakuru ko kwivuza kuri iyi “Poste de Sante ya Kirarangombe” bisaba kwihangana ukanategereza kuko umuganga aza rimwe mu cyumweru, kandi hari n’igihe ashobora kumara ibyumweru 2 atahakandagiye.

Yagize ati: “Kwivuriza aha bisaba kwihangana kuko umuntu wumva ko yarembye niwe ujya kwivuriza i Runyombyi naho utarembye aguma mu rugo agategereza ko uluganga azaza kandi ashobora kumara ibyumweru 2 atarahakandagira niyo mpamvu dusaba ko baduha abaganga bahoraho tukababonera hafi nkuko batwegereje iri vuriro”.

Mukandanga Therese avuga ko urugendo rwo kujya i Runyombyi nibura bisaba amasaha hagati y’atanu n’atandatu kandi ugatanga amafaranga atari munsi ya 4,000 kugenda no kugaruka.

Yagize ati: “Nkanjye ufite umwana birangora kujya kumuvuza i Runyombyi mu gihe hano habuze umuganga, kuko binsaba nibura amasaha ari hagati 3 cyangwa 4 kugira ngo mvuze bikansaba andi 2 wenda ubwo abaye hafi 6.

Ngaho ibaze rero umuntu ufite intege nkeya gukora urwo rugendo adafite n’agatiki ko gutegesha icyamugezayo… Turasaba ko badufasha iri vuriro rigakora hakagabanyuka urugendo dukora”.

Umwe mu bakozi b’Umurenge wa Busanze utashatse ko hatangazwa amazina ye, yabwiye Imvaho Nshya ko imicungire y’aya mavuriro harimo ikibazo gikomeye ariko bayahaye abikorera byafasha kuko uwikorera yaba agenzurwa.

Ibyo ngo byatuma abo bikorera bakurikiranwa kandi ayo mavuriro akabona abaganga bahoraho bahaba umunsi ku munsi kugira ngo batange serivisi uko bikwiye ku baturage.

Umuyobozi w’Akarere ka Nyaruguru Dr Murwanashyaka  Emmanuel,  avuga ko iki kibazo kigiye kubonerwa umuti urambye bahabwa abaganga bahoraho kandi hanongerwe ubushobozi n’ibikoresho by’amavuriro yose yubatse mu Tugari duhana imbibi n’u Burundi.

Yagize ati: “Twabonye ko hari ahakiri imbogamizi bitewe n’imiterere y’Akarere kacu, ariko turateganya ko mu minsi ya vuba haboneka umuti urambye harimo guha amavuriro yose yubatse mu Tugari twegereye umupaka w’igihugu cy’u Burundi agomba guhabwa ubushobozi bwo ku rwego rwa Kabiri.”

Yakomeje agira ati: “Bivuze ko bazabahabwa abaganga bahoraho kandi bikazajyana no kongeramo serivisi zirimo kuvura amenyo gufata ibizamini no kubipima (Laburatwari), kuvura amaso no kubyaza ababyeyi, kandi natwe tubona ko hari abaturage bacu bakigorwa n’ibyo bibazo bitandukanye n’ingendo bakora.”

Muri gahunda ya Guverinoma y’imyaka 7 yo yo kwihutisha iterambere (NST1), Leta yateganyijemo kubaka amavuriro y’ingoboka kugira ngo Umuturarwanda wumvise ubuzima bwe butameze neza ajye yivuza bitamusabye gukora ingendo ndende.

Akarere ka Nyaruguru gafite Ibigo Nderabuzima 16 byunganirwa n’Amavuriro y’Ingoboka 36 harimo ayamaze gushyirwa ku rwego rwa 2 agahabwa ibikoresho ndetse n’abaganga kandi akora neza.

Bivugwa ko aya mavuriro y’ingoboka azahabwa abikorera bakaba ari bo bayacunga, bityo ikibazo cy’imikorere mibi yayo kigiye kuzakemuka vuba kuko amasoko yamaze gutangwa.

Umuyobozi w’Akarere ka Nyaruguru Dr Murwanashyaka  Emmanuel
  • AKIMANA JEAN DE DIEU
  • Mutarama 7, 2024
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE