Abaturage bacanirwa amashanyarazi kuri nkunganire

  • KAYITARE JEAN PAUL
  • Gashyantare 20, 2024
  • Hashize amezi 2
Image

Abatuye mu duce tutaragerwamo amashanyarazi bagiye kujya bacanirwa kuri nkunganire, amashanyarazi akomoka ku mirasire. Birakorwa muri gahunda yiswe ‘Cana Uhendukiwe’.

Ubuyobozi bwa Banki y’Amajyambere y’u Rwanda (BRD), busobanura ko Cana uhendukiwe ari umushinga wa Leta y’u Rwanda unyuzwa muri Minisiteri y’Ibikorwa remezo.

Ushyirwa mu bikorwa na BRD ku nkunga ya Banki y’Isi ariko ugashyirwa mu bikorwa ku bufatanye n’Ikigo cy’Igihugu Gishinzwe ingufu ishami ryacyo rya EDCL.

Dusenge Philbert, Umuhuzabikorwa w’Umushinga Cana Uhendukiwe, asobanura ko bakorana n’ibigo by’abikorera mu bucuruzi bw’amashanyarazi akomoka ku mirasire y’izuba bityo umuturage akayakoresha kuri nkunganire.

Yabigarutseho ku mugoroba w’ejo ku wa Mbere tariki 19 Gashyantare 2024, ubwo hatangizwaga ubukangurambaga bwa ‘Cana Uhendukiwe’ mu Murenge wa Gahengeri mu Karere ka Rwamagana mu Ntara y’Iburasirazuba.

Agira ati “Nkunganire itangwa bijyanye n’ingano y’umurasire. Umurasire ufite ingufu (Watt) 10 kumanuka, uhabwa hagati ya 90,000 FRW na 100,000 FRW.

Hejuru ya 10W kugeza kuri 20 umuturage nabwo yishyurirwa nkunganire 90% y’igiciro cy’umurasire”.

Umushinga watangiye mu 2017 ukazarangira muri uyu mwaka wa 2024, ugamije gucanira ingo zitarabona amashanyarazi afatira ku muyoboro mugari.

Dusenge, Umuhuzabikorwa w’Umushinga Cana Uhendukiwe, yavuze ko umuturage ahabwa nkunganire kugira ngo ahendukirwe.

Umuturage agirana amasezerano na kampani imuha umurasire akawishyura ako kanya cyangwa mu myaka itatu ariko yunganiwe.

Iyo kampani idakoze neza ntiyishyurwa nkunganire ahubwo irafatirwa kugeza ikemuye ibyo bibazo.

Gahunda ya Leta ni ugukwirakwiza amashanyarazi mu ngo zitarabona amashanyarazi.

Kugeza ubu hamaze gucanirwa ingo zisaga 470,000 mu gihugu hose ukuyemo uturere tugize Umujyi wa Kigali.

Intego y’umushinga yagezweho kuko umushinga utangira, intego yari ugucanira ingo 445,000.

Ingo zihabwa amashanyarazi akomoka ku mirasire y’izuba, ni iziri ahantu hatazanyura umuyoboro mugari.

Amafaranga yose yagenewe umushinga ageze kuri miliyoni 45 z’amadolari y’Amerika, ni ukuvuga amafaranga asaga miliyari 50.

Gahunda ya Cana Uhendukiwe, Leta imaze gushoramo 67% by’amafaranga y’umushinga wose.

Abaturage bishimiye gahunda ya Cana Uhendukiwe

Kamari Edouard utuye mu Murenge wa Gahengeri avuga ko iyi gahunda ari iterambere nkuko bagezwaho amashuri, amazi n’ibindi.

Ati “Aya mashanyarazi atuma ahantu hakura hagatera imbere umuntu wese agacana, none se urumva gucana agatadowa hari ikintu byaba bimaze?”.

Nkangabenshi Pascal utuye mu Kagari ka Rweru mu Mudugudu wa Nyamugari, avuga ko nta cyamubuza gushimira Leta y’Ubumwe imutekerereza ikamukura ku gucana agatadowa agacana akoresheje umurasire.

Ashimangira ko umusanzu asabwa, yakora ibishoboka byose ariko akabona umurasire na we akabona urumuri nk’abandi.

Namara kubona umurasire asanga uzamufasha gutera imbere.

Ati “Gutaha ahabona ni cyo cya mbere kandi n’abana babona uko biga neza.

Njye ku giti cyanjye bibaye ngombwa urwo rumuri nkarubona, ruzamfasha byinshi runafashe n’umushyitsi wananzindukira”.

Dusenge Philbert, Umuhuzabikorwa w’Umushinga Cana Uhendukiwe muri BRD
  • KAYITARE JEAN PAUL
  • Gashyantare 20, 2024
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE