Abaturage babona iterambere ry’Umujyi wa Musanze ryihuta ntiribarinde

  • Imvaho Nshya
  • Ugushyingo 5, 2023
  • Hashize amezi 4
Image

Mu gihe Umujyi wa Musanze ukomeje guturwa cyane, bamwe mu baturage baravuga ko umuvuduko w’iterambere ry’Umujyi ubasiga mu gihirahiro kuko ubuzima bari baramenyereye bubahindukiraho vuba, bityo imibereho mishya ikabasigira ibibazo byinshi batarabonera ibisubizo.

Mu ntangiriro z’uyu mwaka, uyu mujyi washyizwe ku rutonde rw’ibyerekezo 50 bihebuje kurusha ibindi biha ba mukerarugendo ubunararibonye bwihariye utasanga ahandi.

Mu gihe uyu mujyi umaze kumenyekana ku rwego mpuzamahanga, aho bamwe mu baturage babonaga hera imyaka myinshi kuri ubu hubatsweho imiturirwa n’ibindi bikorwa remezo.

Aho bafataga nk’inkengero z’Umujyi batekereza ko hazakomeza guhingwa, ubu na ho iterambere rikomeje kuhagera, bityo bakaba basaba ko hashakwa ubundi buryo bw’imiturire ariko amasambu yo guhinga ntakomeze gusatirwa, kugira ngo n’abamenyereye guhinga bakomeze kuba mu Mujyi ariko n’ibibateza imbere bigumeho.

 Aba baturage bavuga ko mu nkengero z’Umujyi batari biteze ko hazaturwa vuba, bityo bamwe bakaba bahangayikishijwe n’uko mu bihe biri imbere bashobora kwisanga gutura mu Mujyi bitakiri ibyabo, cyane ko abifite bagurira abatifite bakisanga bahunze iterambere kandi ari irya buri wese.

Nzabahimana Ezekiel yagize ati: “Ntabwo twari tuzi ko aha hantu hose hazuzura inzu tukabura ibidutunga kugeza ubwo ibirayi biguze amafaranga 1000. Ariko kubera uko imirima ino isigaye ihenda, n’umuvuduko w’iterambere muri uyu mujyi urabona ko batangiye kugenda baca ibibanza ku masite anyuranye. Njye nkibaza ni hehe tuzatuza abana bacu, cyangwa se tuzatungwa ni iki? Ndasaba ko Leta yashakira ikibazo cy’imiturire umuti urambye, abakire ntibakomeze kwirukana abatishoboye mu mujyi, iyo udashoboye kubaka kadasitire se ubwo urumva udakwiye kugurisha ukigendera?”.

Uwamaho Anisie wo mu Murenge wa Kimonyi we asanga abifite bakwiye kujya bubakira abatishoboye mu bibanza byabo igihe bifuje kubagurira, cyane ko ngo iyo udafite inzu nziza uri mu rwego ruciriritse hari abavuga ko ubabangamiye ubwo hakaba n’abashukishwa amafaranga rimwe na rimwe bo baba bumva ko ari menshi.

Yagize ati: “Leta itekereze nanone uburyo hajyaho itegeko rirengera abadafite amikoro yo gutura mu mijyi, yenda umukire akaza akagura ikibanza cyawe mukumvikana ku mafaranga make aguha, asigaye akayakubakiramo icyumba mukabana muri iyo nzu izaba na yo igeretse, yenda akaba hasi ukaba hejuru. Kandi gahunda y’Imidugudu y’icyitegererezo  igakomeza gushyirwamo ingufu  kuko ni bwo ibikorwa remezo nk’amazi, amashanyarazi bigera ku baturiye iyo midugudu vuba”.

Guverineri w’Intara y’Amajyaruguru Mugabowagahunde  Maurice,  mu biganiro agirana n’abaturage  cyane abifite abashishikariza kubaka inzu zigerekeranye kandi bagatura ahagenewe imiturire bubahiriza igishushanyo mbonera.

Kubaka inzu zigeretse bibonwa nk’igisubizo kizigama ubutaka

Yagize agize ati: “Tuvuge mpereye nko kuri uyu Mujyi wa Musanze. Ubutaka bwa hano burahenze kubera ko ari agace k’ubukerarugendo, kimwe n’ikirere cyaho, kuri ubu rero hagenda haganwa n’abantu benshi. Leta rero icyo itekereza ni uko abaturage batura mu Midugudu na yo ifite inzu zigerekeranye, ibi turabishishikariza n’abandi bishoboye gukomeza kubaka amataje ku butaka buto, ku buryo yenda zajya zikodeshwa, cyangwa se abashoramari bakazubaka zikajya zigurwa n’abafite imishahara bakaba bazihabwa bakazagenda bazishyura igihe kirekire”.

Guverineri akomeza avuga ko kandi Leta igenda itanga umurongo aho yubakira abatishoboye kimwe n’abari mu manegeka. Iyo na yo akaba ari imwe mu nkunga Leta igenda itera Abanyarwanda mu myubakire, kandi abatujwe muri iyo Midugudu kuri ubu ubutaka bari batuyeho barabuhinga kimwe n’ubundi bari bafite hirya no hino.

Yagize ati: “Ubu ngira ngo mugenda mubibona ko abatishoboye n’abandi bafite imibereho itari myiza Leta igenda ibatuza mu Midugudu y’Icyitegererezo kandi Leta na yo buriya ireba kure kuko tuzakenera n’aho guhinga ni ihame. Kuko ntitwakomeza kubaka inzu kugera ubwo tubura amasambu yo guhinga, kandi ubutaka ntibuteye kimwe ahatabasha guhingwa hakwiye guturwa, ahatanga umusaruro hakazigamwa. Ikindi ni uko nsaba abaturage gukomeza kubahiriza igishushanyombonera, bubaka ahagenewe kubakwa, ahagenewe ubuhinzi hagahingwa”.

Imibare igaragaza ko nko mu Karere ka Musanze imiturire ubucucike bw’abaturage buri ku kigero cya 1157 kuri kilometero kare, kakaba gatuwe n’abaturage 476.522 abagore 249.182, abagabo 227.340.

Mu gihe imibare y’abaturage b’u Rwanda imaze kurenga miliyoni 13.2, Umuyobozi w’Ishami rishinzwe ibarura mu Kigo cy’Igihugu cy’Ibarurishamibare mu Rwanda (NISR) Habarugira Venant, asanga abantu bakwiye kwitabira gutura mu mijyi mu rwego rwo guhangana n’ikibazo cy’ubucucike.

Yagize ati: “Kubera ko mu minsi iri imbere Leta ishobora kubura uko iteganyiriza abaturage, ni byiza ko abantu bagerageza gutura mu mijyi, ibi bifasha Leta kubagezaho ibikorwa remezo, binafasha ko abo baturage bashobora gutura mu nyubako zigerekeranyije bityo abantu bagatura neza kandi bagasigaza aho bazajya bahinga ibibatunga muri bwa butaka bwo mu cyaro cyangwa mu nkengero z’umujyi, kuko abaturage nibakomeza gutura mu buryo bw’akaduruvayo bizarangira babuze aho gutura no guhinga babure ibibatunga. Ikindi mbona ni uko ababyeyi bakwiye kubyara abo bashoboye kurangiriza inshingano z’umubyeyi ku mwana”.

Guverineri w’Intara y’Amajyaruguru Mugabowagahunde Maurice

Ibarura Rusange ry’Abaturage n’imiturire ryo ku wa 16-30/8/2022 rigaragaza ko abatuye u Rwanda 13.246.394 bivuze ko bari kugenda biyongera ugereranyije no mu mwaka wa 1978 aho abari batuye u Rwanda bari 4.831. 527.

Kugeza ubu u Rwanda rutuwe n’ingo 3312743 ni ukuvuga abagabo 48.5% n’abagore 51.5% aho biyongereye ku kigero cya 2.3% ugereranyije umwaka wa 2012 n’umwaka wa 2022 aho mu mwaka wa 2012 ibarura rigaragaza ko bari abaturage 10.515.973.

Imibare kandi igaragaza ko  mu Banyarwanda uko biyongera bagenda bajyana n’ibihe kuko ingo 22.8%  zikoresha murandasi (interneti) iyi mibare ikaba ari iyo mu mezi 12 ya nyuma y’umwaka wa 2022 aho abenshi muri aba ari abo mu Mujyi wa Kigali bangana na 54%.

Abo mu Ntara y’Iburasirazuba bakoresha Internet ni 18.6%, mu Ntara y’Amajyaruguru bakaba 17.2% mu Ntara y’iburengerazuba bakaba ari 17.1% naho Intara y’Amajyepfo ikaza ku mwanya wa nyuma aho abayikoresha bangana 16.1%.

ubucucike bw’abaturage mu Rwanda  ni 501 kuri kilometero kare, hakaba hari impungenge ko mu myaka iri imbere ubucucike buzaba bumaze kugera ku baturage 1000 kuri kilometero kare.

Abaturage basaba Leta gufata ingamba zihamye mu gukemura ikibazo cy’imiturire, hakarindwa ubutaka buhingwa

NGABOYABAHIZI PROTAIS

  • Imvaho Nshya
  • Ugushyingo 5, 2023
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE