Abasirikare 2 b’u Rwanda bari bashimuswe na Congo barekuwe

Nkuko byasohotse mu itangazo ryasohowe n’Ubuyobozi Bukuru bw’Ingabo z’u Rwanda, buratangaza ko abasirikare babiri ba RDF bari bashimuswe mu mpera z’ukwezi kwa Gicurasi, barekuwe ndetse bakaba bagarutse amahoro.

Itangazo ryasohowe n’igisirikare cy’u Rwanda kuri uyu wa Gatandatu taliki 11 Kamena, rivuga ko abo basirikare babiri ba RDF bari bashimutiwe ku Mupaka w’u Rwanda na Repubulika Iharanira Demokarasi ya Congo RDC ku wa 28 Gicurasi Ubwo bari bacunze umutekano.

Iri tangazo riragira riti” RDF yishimiye kumenyesha ko abo basirikare babiri batekanye bamaze kugaruka mu Rwanda”.

Iri tangazo rikomeza rivuga ko abo basirikare barekuwe nyuma yuko habaye ibiganiro bya dipolomasi byabaye hagati y’Abakuru b’Ibihugu byombi (u Rwanda na Repubulika iharanira Demokarasi ya congo) ndetse n’Umukuru w’Igihugu w’Angola uri muri ibi biganiro nk’umuhuza.