Abashoramari 50 bo mu Rwanda bitabiriye inama muri Mozambique

  • NTAWITONDA JEAN CLAUDE
  • Gicurasi 23, 2022
  • Hashize imyaka 2
Image

Abashoramari basaga 50 bo mu Rwanda berekeje i Maputo muri Mozambique aho bitabiriye Inama y’Ubucuruzi ihuza u Rwanda na Mozambique nk’ibihugu bikomeje urugendo rw’ubufatanye mu nzego zitandukanye zijyanye no guteza imbere ubufatanye mu bucuruzi n’ishoramari.

Ubuyobozi bw’Urugaga rw’Abikorera mu Rwanda (PSF Rwanda) bwemeje ko iryo tsinda ryerekeje muri Mozambique ku gicamunsi cyo kuri uyu wa Mbere, nyuma y’uruzinduko mu Misiri rwatanze umusaruro, muri gahunda urwo rugaga rufatanyijemo na Access Bank Rwanda.

Iyo nama iteganyijwe kuri uyu wa Kabiri taliki ya 24-26 Gicurasi 2022, yitezweho gutanga umwanya uhagije wo kuganira ku bufatanye bw’ibihugu byombi mu kubyaza umusaruro amahirwe y’ubucuruzi n’ishoramari n’uburyo abacuruzi bayabyaza umusaruro mu nyungu z’iterambere ry’ibihugu byombi.

Biteganyijwe ko muri iyo nama hazasinywa amasezerano y’ubufatanye hagati ya PSF n’Ikigo cy’Ubucuruzi muri Mozambique, agamije gushyigikira ubutwererane no kwimakaza iterambere ry’ubucuruzi hagati y’ibyo bigo byombi n’abacuruzi muri rusange.

Nko muri Mozambique, itegeko ry’ishoramari riteganya isonerwa mu misoro na za gasutamo bitewe n’ingano y’ishoramari ryakozwe, aho riherereye n’urwego rw’ishoramari ribarizwamo.

Abashoramari baturutse mu mahanga bujuje ibisabwa babona inyungu zitandukanye zirimo guhabwa ubusonerwe ku bicuruzwa byinjizwa n’ibyoherezwa mu mahanga ndetse no ku bikoresho byifashishwa mu kubaka inganda.

Iki gihugu kibonekamo amahirwe y’ishoramari atandukanye guhera ku buhinzi ukageza ku bucukuzi bw’amabuye y’agaciro, ibikomoka kuri peteroli, ibikorwa remezo ndetse n’ingufu, ubukerarugendo n’andi mahirwe atandukanye.

Uru ruzinduko rubaye mu gihe mu kwezi k’Ukwakira 2021 u Rwanda na Mozambique byasinyanye amasezerano y’ubufatanye agamije kwihutisha iterambere ry’ubukungu binyuze mu bikorwa by’ubucuruzi n’ishoramari.

Ayo masezerao yashyizweho umukono n’Ubuyobozi bw’Ikigo cya Mozambique gishinzwe iterambere ry’Ishoramari n’Ibyoherezwa mu mahanga (APIEX) ndetse n’Urwego rwushinzwe Iterambere mu Rwanda (RDB), ubwo bufatanye bukaba bushingiye ku mubano mwiza usanzwe urangwa hagati y’ibihugu byombi.

Zimwe mu nzego ibihugu byombi bibonamo inyungu mu bucuruzi n’ishoramari, harimo ubufatanye mu guteza imbere ubuhinzi n’ubworozi, gutunganya umusaruro ubukomokaho, ubwikorezi bwo mu kirere, iterambere ry’inganda n’ibindi.

Mu ntangiriro z’uyu mwaka na bwo, Abagaba Bakuru b’Ingabo z’u Rwanda na Mozambique basinyanye amasezerano y’ubufatanye mu by’umutekano, yasinyiwe i Kigali.

Ni amasezerano yaje akurikira abasirikare n’abapolisi u Rwanda rwohereje mu Ntara ya Cabo Delgado kuva muri Nyakanga u Rwanda bakomeje gutanga umusanzu ukomeye mu guhashya ibyihebe  bigendera ku matwaara ya Al-Shabaab.

Izo ngabo zafashije Leta kwisubiza imijyi ikomeye nka Mocímboa da Praia, Mbau n’utundi duce twari ibirindiro n’indiri z’ibyo byihebe byari bimaze imyaka isaga inze byarayigaruriye.

  • NTAWITONDA JEAN CLAUDE
  • Gicurasi 23, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE