Abasenateri bo muri Somalia bavuze ko u Rwanda ari indorerwamo y’iterambere ry’abagore

  • KAYITARE JEAN PAUL
  • Mutarama 29, 2024
  • Hashize amezi 4
Image

Senateri Zam Zam Ibrahim Ali, Umuyobozi w’itsinda ry’Abasenateri ba Somalia baje kwigira ku Rwanda, yatangaje ko u Rwanda ari indorerwamo y’iterambere ry’abagore muri Politiki z’ibihugu.

Yabigarutseho kuri uyu wa Mbere tariki 29 Mutarama 2024, ubwo bagiranaga ibiganiro na bagenzi babo bo mu Inteko Ishinga Amategeko y’u Rwanda.

Abasenateri bo mu Nteko Ishinga Amategeko ya Somalia babanje kugirana ibiganiro na Perezida wa Sena Dr Kalinda François Xavier wabagaragarije akamaro ka Politiki y’ubwuzuzanye bw’abagabo n’abagore mu iterambere ry’igihugu.

Zam Zam yagize ati “Turifuza kubona amakuru, tugasangira n’ubunararibonye. Twahisemo u Rwanda kuko abagore ba ho babaye indashyikirwa muri Politiki”.

Yavuze ko Sena ya Somalia igizwe n’abasenateri 54. Abagore ni 14 mu gihe abandi abandi bose ari abagabo.

Akomeza agira ati “Icyakoze muri Komisiyo zigera ku munani dukoreramo, izigera kuri Enye ziyobowe n’abagore, natwe turimo kugenda tuzamura uruhare rwacu muri Politiki ari nayo mpamvu twaje hano”.

Abagize Ihuriro ry’Abanyarwandakazi bari mu Nteko Ishinga Amategeko (FFRP), bishimira uruhare rwabo mu gutora amategeko n’imyanzuro ikemura ibibazo bijyanye n’ibyibasira abana n’abagore.

Dr Kalinda, Perezida wa Sena y’u Rwanda, yavuze ko abagabo bagize Inteko Ishinga Amategeko y’u Rwanda bishimira umusaruro utangwa n’abanyarwandakazi bari mu Inteko Ishinga Amategeko.

Yagize ati “Twishimira umusanzu abagore bazana mu mibereho y’igihugu iyo ari yo yose.

Amategeko twari dusanganywe hari menshi yabaga arimo ikintu cy’ubusumbane buheza abagore, kuba rero bahari barabibona mbere y’abandi”.

Senateri Murangwa Ndangiza Hadija, Visi Perezida w’Ihuriro ry’Abanyarwandakazi bari mu Nteko Ishinga Amategeko y’u Rwanda, avuga ko iri huriro rigira uruhare runini mu iterambere ry’igihugu.

Yavuze ko mu 2018 hariho itegeko rikumira ariko ubu ngo hari itegeko rihana ihohoterwa iryo ari ryo ryose ku mutegarugori.

Ati “Ibi bintu, ni ibintu twishimira cyane kuko iryo tegeko mu Rwanda ntabwo ryari rihari”.

Avuga ko iryo tegeko ryatangijwe na FFRP kandi ngo rigamije kwita ku ihohoterwa iryo ari ryo ryose ryakorerwa umutegarugori.

Ryita kandi ku bijyanye n’itegeko ry’ubutaka mu Rwanda ndetse n’ibijyanye n’izungura.

Akomeza agira ati “Abagore nabo bandikwa ku butaka, ubundi mbere ntabwo mu mategeko byari bihari”.

Asobanura ko iyo umugabo yitabaga Imana atarabyaye abahungu, icyo gihe hazunguraga abo mu muryango w’iwabo.

U Rwanda na Somalia ni ibihugu bifitanye umubano ushingiye kuri dipolomasi.

Ibihugu byombi bigirana ubufatanye mu miryango mpuzamahanga itandukanye irimo Afurika Yunze ubumwe n’Umuryango uhuza ibihugu by’Afurika y’Iburasirazuba wahaye ikaze Somalia mu mpera z’umwaka ushize 2023.

  • KAYITARE JEAN PAUL
  • Mutarama 29, 2024
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE