Abasaga 80,000 biteguye kuvura abazagira ihungabana mu Kwibuka 28

  • NTAWITONDA JEAN CLAUDE
  • Mata 5, 2022
  • Hashize imyaka 2
Image

Harabura amasaha atagera kuri 48 ngo u Rwanda rwinjire mu bihe byo kwibuka ku nshuro ya 28 Jenoside yakorewe Abatutsi, ibitorohera umubare munini w’Abanyarwanda cyane cyane abarokotse Jenoside yakorewe Abatutsi bagizweho ingaruka z’iyo Jenoside yahitanye abasaga miliyoni mu gihe cy’iminsi 100 gusa.

Ubuyobozi bw’Ikigo cy’Igihugu cy’Ubuzima (RBC) bwatangaje ko imyiteguro yo gufasha abashobora kuzahura n’ihungabana n’ibindi bibazo byo mu mutwe muri iki gihe cyo kwibuka irimbanyije, mu rwego rwo kwirinda ko hari abazagira ibyo bibazo bakabura ubufasha n’ubutabazi bwihuse.

Umuyobozi w’Ishami rishinzwe kwita ku buzima bwo mu mutwe muri RBC Dr. Yvonne Kayiteshonga, yavuze ko ibibazo byo mu mutwe byinshi bikigaragara mu Rwanda bishingiye ku ngaruka za Jenoside yakorewe Abatutsi, ari na yo mpamvu Leta y’u Rwanda ishyira imbaraga nyinshi mu buvuzi no gukumira ko byarushaho kwiyongera by’umwihariko muri ibi bihe byo kwibuka.

Dr. Kayiteshonga yavuze ko mu gufasha abashobora guhura n’ihungabana muri ibi bihe Leta ifatanya n’abafatanyabikorwa batandukanye mu guharanira ko serivisi zo kwita ku buzima bwo mu mutwe zegerezwa abaturage.

Mu kiganiro n’abanyamakuru kuri uyu wa Kabiri taliki ya 5 Mata 2022 hatangajwe ko hejuru ya 90% by’amavuriro abarizwa mu gihugu atanga serivisi z’ubuvuzi bw’indwara zo mu mutwe, hakaba hari n’Abajyanama b’Ubuzima bahuguriwe kwita ku bafite ibyo bibazo by’ihungabana mu nzego z’ibanze.

Serivisi z’ubuvuzi bw’indwara zo mu mutwe zitangwa ku rwego rw’ibitaro by’icyitegererezo kugeza ku bigo nderabuzima. Hari kandi gahunda zihariye zijyanye n’imiterere y’ibibazo byo mu mutwe, zigamije guhangana n’izo ndwara aho byagaragaye ko ziganje.

Aho ni na ho yahereye avuga ko kuri ubu mu Rwanda hari inzobere mu buvuzi bwo mu mutwe, n’ababihuguriwe basaga 80 biteguye kuba bafasha umuntu wese wahura n’ibibazo by’ihungabana mu bice bitandukanye by’Igihugu.

Yagize ati: “Ibyinshi mu bibazo byo mu mutwe mu Rwanda twabitewe na Jenoside yakorewe Abatutsi muri 1994. Ikibazo kiza ku isonga ni ikibazo cy’ihungabana rikomatanyije n’ibindi bibazo byo mu mutwe, cyane cyane indwara y’agahinda gakabije. Mu bindi bitera ibibazo byo mu mutwe mu Gihugu harimo ihohoterwa, cyane cyane irishingiye ku gitsina. Kugira ngo duhangane n’ibyo bibazo, Leta y’u Rwanda yegereje Umunyarwanda wese serivisi z’ubuvuzi bw’indwara zo mu mutwe.”

Dr. Yvonne Kayiteshonga, Umuyobozi w’Ishami rishinzwe kwita ku buzima bwo mu mutwe muri RBC

Yavuze ko kuri ubu Leta y’u Rwanda yishimira uburyo Abanyarwanda bakomeje gusobanukirwa serivisi zo kwita ku buzima bw’indwara zo mu mutwe bakarushaho kuzitabira. Yavuze ko guhera mu 2019 kugeza mu 2021, abitabiriye izo serivisi bavuye ku 200,000 bagera ku basaga 400,000, bakaba barikubye inshuro zisaga eshatu.

Yavuze ko ubwo bwiyongere budashimangira ko ibibazo byo mu mutwe byiyongereye ahubwo bugaragaza ko abantu batangiye kugaragaza ubushake bwo kwisuzumisha no kwivuza indwara zo mu mutwe.

Dr. Kayiteshonga yashimangiye ko by’umwihariko mu gihe cy’icyunamo no mu minsi 100 yo kwibuka hashyizweho gahunda yo gufashiriza mu matsinda abazagira ibibazo by’ihungabana ku bufatanye n’imiryango itandukanye nka AERG, GAERG, AVEGA, Ibuka, Uyisenga n’iyindi.

Nsengiyaremye Fidèle, Umunyamabanga Nshingwabikorwa w’Umuryango w’abahoze ari abanyeshuri barokotse Jenoside yakorewe Abatutsi (GAERG) , yavuze ko ku bufatanye na RBC biteguye gufashiriza abagira ibibazo by’ihungabana mu matsinda bita imiryago bahuriramo.

Yagize ati: “Kuva mu mwaka wa 2019 twatangiye gahunda dufatanyamo na RBC ndetse n’abandi bafatanyabikorwa batandukanye barimo nka Imbuto Foundation ndetse n’indi miryango, gahunda zigamije kureba uko twarushaho gutanga ubufasha bw’Isanamitima n’ubudaheranwa mu muryago nyarwanda by’umwihariko no ku barokotse Jenoside yakorewe Abatutsi. Tugira amatsinda y’ibiganiro bivurana (healing groups) ariko AERG na GAERG dukorera mu buryo bw’imiryango mito kuko Jenoside yatwaye imiryango kuko iyo umuntu adafite umuryango ubuzima bwo mu mutwe burahungabana.”

RBC ivuga ko mu bihe byo kwibuka ku nshuro ya 27 Jenoside yakorewe Abatutsi mu mwaka ushize, abagaragayeho ihungabana bari 2,628 aho 39% bagize ikibazo cyoroheje bagafashwa bagahita bakira, mu gihe 61% bo bakomeje gufashirizwa mu miryango no muri ayo matsinda y’ibiganiro bivurana.

  • NTAWITONDA JEAN CLAUDE
  • Mata 5, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE