Abarundi 29,593 batahutse ku bushake, 26 bagaruka mu Rwanda

  • NTAWITONDA JEAN CLAUDE
  • Werurwe 17, 2022
  • Hashize imyaka 2
Image

Ishami ry’Umuryango w’Abibumbye ryita ku mpunzi (UNHCR) ryasohoye raporo y’imiterere y’ibikorwa byo kwakira no kwita ku mpunzi byari bihagaze mu kwezi kwa Mutarama 2022, rigaragaza ko muri uko kwezi u Rwanda rwari rucumbikiye 127,012.

Muri uko kwezi, u Rwanda rwafashije gutahuka impunzi z’Abarundi 981 zagejeje abamaze gufashwa gusubira mu gihugu cyabo ku babariwa mu 29,593.

Iyo raporo igaragaza ko muri abo bafashijwe gutahuka harimo 69 babaga Rwanda n’abandi 912 binjiye mu Rwanda baturutse muri Uganda bashaka gusubira mu gihugu cyabo.

UNHCR ivuga ko abo baturage b’u Burundi uko ari 26 bacumbikiwe mu Nkambi y’Agateganyo ya Nyanza. Komite ishinzwe gukurikirana imibereho y’impunzi (RSD) yaganirije batanu muri uko kwezi mu gihe abandi bari bagitegereje kuganirizwa nyuma.

Kugeza taliki ya 31 Mutarama, abantu 24 barimo impunzi eshanu zitegereje gufashwa guhunguka n’abandi 19 bari barasubiye mu gihugu cyabo bakagaruka ni bo bari bakiri mu Nkambi y’Agateganyo ya Nyanza nk’uko bigaragara muri Raporo ya UNHCR y’uko kwezi

Mu kwezi kwa Mutarama Ibiro bya UNHCR bya Kabarore byakiriye impunzi z’Abarundi 1,249 binjiye mu Rwanda bitunguranye baturutse muri Uganda, bakaba ari bo bavuyemo ba bandi 912 bafashijwe gutahuka ku bushake.

Muri uku kwezi kandi Itsinda ryoherejwe n’Umuryango w’Ubumwe bw’u Burayi ryasuye Inkambi y’Agateganyo ya Gashora basobanurirwa imikorere y’iyo nkambi n’uko abakirwamo bashaka ubuhungiro mu mahanga bitabwaho mu buzima bwabo bwa buri munsi

Iyi raporo kandi igaragaza ko mu mpunzi zari mu Rwanda mu mpera za Mutarama harimo izaturutse muri Repubulika Iharanira Demokarasi ya Congo zingana na 60.7% mu gihe iz’u Burundi zingana na 38.9%. Ni mu gihe abandi bahungiye mu Rwanda cyangwa basaba ubuhungiro baturuka ahandi banganaga na 0.4 muri uko kwezi.

Muri miliyoni 86.8 z’amadolari y’Amerika yari akenewe mu gushyigikira ibikorwa by;’impunzi zicumbikiwe mu Rwanda, habashije kuboneka 5% muri uko kwezi mu gihe ibindi bikorwa byari bitaraterwa inkunga.

Gusa iyi raporo inagaragaza ibikorwa bitandukanye byakozwe mu nkambi z’impunzi byose bigamije guhindura imibereho yazo, uhereye kuri serivisi z’ubuvuzi n’ubuzima rusange, ibikorwa remezo, amahugurwa n’uburezi, serivisi z’imari n’izindi.

  • NTAWITONDA JEAN CLAUDE
  • Werurwe 17, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE