Abarimu 7000 bamaze guhabwa ‘tablets’ bigishirizaho

  • Imvaho Nshya
  • Kanama 3, 2023
  • Hashize amezi 10
Image

Abayobozi b’ibigo by’amashuri n’abarezi bateguriwe amahugurwa, agamije kubaha ubumenyi ku ikoranabuhanga ryifashishwa mu gutanga amasomo bakoresheje ‘tablets’, bikazazamura ireme ry’uburezi.

Ni gahunda yatangijwe mu mashuri y’inshuke n’abanza na EQUIP (Rwanda Education Quality Improvement Program), hagenderwe kuzamura uburezi bw’u Rwanda hakoreshwa uburyo bushya bw’imyigishirize yifashisha ikoranabuhanga, umwarimu yigisha yifashishije ‘Tablet’.

Uwajeneza Clement Umuyobozi wa gahunda ya Rwanda EQUIP, yasobanuye ko iyo gahunda igamije gufatanya n’ibigo by’amashuri y’inshuke n’abanza mu guteza imbere ireme ry’uburezi hifashishijwe ikoranabuhanga, aho ibigo bikorerwamo iyo gahunda buri mwarimu ahabwa tablet.

Yagize ati: “Biteganyijwe ko muri aya mezi 2 agiye kuza tuzahugura abarimu 12 000 bo mu mashuri 511, buri mwarimu iyo arangije kwiga atahana “tablets”, mu mashuri twari tumaze igihe dukorana harimo abarimu 7 000 buri wese afite ‘tablet’, hari n’abinjiye muri ayo mashuri bashyashya nabo tuzabazana muri aya mahugurwa”.

Yagize ati: “Iryo koranabuhanga rifite akamaro kugira ngo imyigishirize igende neza cyane cyane hifashishijwe ururimi rw’icyongereza kuko integanyanyigisho itangwa mu rurimi rw’icyongereza. Bitanga umursaruro ku ireme ry’uburezi”.

Yakomeje asobanura ko iyo gahunda aho yageze hari itandukaniro n’ahandi.

Yagize ati: “Iyi gahunda yatangiriye ku mashuri 250, ariko mbere yatangiriye mu mashuri 100 mu bihembwe bibiri bya nyuma 2021/2022 byagaragaye ko mu Cyongereza kuva mu wa mbere kugera mu wa gatandatu basomaga ku kigereranyo cya 35% neza kurusha amashuri yandi iyi gahunda itari yageramo.

Mu mibare ho ugasanga byikubye kabiri, ugasanga abana bakora imyitozo y’imibare mu munota umwe bakora imyitozo yikubye kabiri ugereranyije n’amashuri atarimo iyi gahunda babasha gukora”.

Akomeza avuga ko intego ari uko babonye ko abanyeshuri basoma neza ku kigero cya 30% kurusha abatari muri yi gahunda, mu mibare 30% abatsinze ibizami bisoza abanza baba bari ku kigereranyo cyo hejuru kurusha ayandi mashuri. Ubu bagiye kugera ku mashuri 761.

Umuyobozi wa REB Urwego rw’Igihugu rushinzwe uburezi bw’ibanze, Mbarushimana Nelson yavuze hari intambwe imaze guterwa kandi ko Leta izakomeza kubaka ubushobozi kugira ngo iyi gahunda igere ku  ireme ry’uburezi.

Ati: “Uko imyaka igenda bitewe n’ingengo y’imari ihari, tunoza ibishoboka byose kugira ngo umwarimu abone ibikoresho byose akoresha, umunyeshuri na we akabibona, bityo imyigire n’imyigishirize ikamera neza. Intego ni uko umwarimu agomba kubona ibikoresho, ndetse n’umunyeshuri, imyigire n’imyigishirize bikagenda neza.”

Bahamya ko ikoranabuhanga ryitezweho kuzamura ireme ry’uburezi

Umuyobozi w’Ishuri ribanza rya Musenyi, mu Murenge wa Mbuye mu Karere ka Ruhango, Uwiragiye Eugenie yavuze ko gahunda yo kwigisha abarimu bifashsishije ikoranabuhanga rra tablet bizazamuraireme ry’uburezi.

Ati: “Iyi gahunda tuyitezeho kuzamura umusaruro wabonekaga mu kigo, abanyeshuri bazarushaho gutsinda, amafaranga twakoreshaga tugura ibikoresh bimwe na bimwe azagabanyuka, abanyeshuri  bazarushaho gukoresha ururimi rw’icyongerezaa,, abarimu nabo izabafasha gukoresha ururimi rw’icyongereza”.

Yagaragaje ko kuza ku ishuri ku gihe na byo bizazamuka kuko iryo koranabuhanga rinafasha imicungire y’ishuri kandi bikanatinyura abanyeshuri bakamenya ururimi rw’icyongereza.

Yagize ati: “Ku ishuri nyobora ubwitabire bw’abanyeshuri uburyo bazindukaga  byari nko kuri 87% bizazamuka  kuko burya kuzinduka k’umunyeshuri guterwa nuko umwarimu yazindutse, kuko iyi gahunda izadufasha gukurikirana ko abarezi bagerera ku kazi ku gihe, gukererwa kuzagabanyuka ku mpande zombi. Ndahamya ko abanyeshuri 5 bashoboraga gusubiza mu cyongereza bazazamuka bakageranko kuri 25”.

Ati: “Twiteze ko hazabaho kuvugurura imyigire n’imyigishirize hagamijwe guteza imbere ireme ry’uburezi, abana bakazarushaho kumva neza amasomo baba bateguriwe. Abarimu bazitabira ku gihe uburyo bazaba bakurikirana isaha ku yindi bifashishije tablets cyane cyane ko umuyobozi akurikirana uko amasomo atangwa. Umusaruro byatangaga nko mu mwaka ushize imitsindire mu wa 6, twari kuri 89,7% ndatekereza ko ubu twajya hejuru nko kuri 95%”.

Umuyobozi w’Ikigo cy’amashuri cya   GS Gicaca mu Murenge wa Musenyi mu Karere ka Bugesera, Nyirangirababyeyi Marie Solange   yahamije ko iyo gahunda ubwo ije, abarimu bakabona tablets abana bakabona ibitabo, abana batsindaga ku kigereranyo cya 85% bazatsinda ku kigereranyo nibura cya 90%.

Muri iyi gahunda  yo kwigishiriza bifashishije  ‘tablet’ ituma abarimu bavuga neza icyongereza kurushaho kuko ziriya nyigisho zanditse mu cyongereza, abanyeshuri batinyuka gusubiza, bavuga icyongereza kandi bakanagisoma.

Ntakababaro Joseph Umuyobozi w’ikigo cy’amashuri abanza cya Nyabicura mu Murenge wa Sovu, mu Karere ka Ngororero muyavuze kwigisha bifashishije ikoranabuhanga bizabafasha kuvugurura imyigishirize.

Biteganyijwe ko muri aya mezi 2 agiye kuza hazahugurwa abarimu 12 000 bo mu mashuri 511.

Yanditswe na NYIRANEZA JUDITH

  • Imvaho Nshya
  • Kanama 3, 2023
  • Hashize amezi 10
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE